ប្រែសម្រួលៈបំណង(ដេល្លីម៉េល)៖ អភិបាលតំបន់បាននិយាយកាលពីថ្ងៃពុធទី៣១ឧសភាថា កងកម្លាំងអ៊ុយក្រែនបានបាញ់ផ្លោងដាក់ទីប្រជុំជនរុស្ស៊ីនៅជាប់ព្រំដែនជាលើកទីបីក្នុងរយៈពេលមួយសប្តាហ៍នេះ ដោយបានធ្វើអោយខូចអាគារនិងឆេះរថយន្ត។
អភិបាលតំបន់បែលហ្គោរ៉ូត(Belgorod)លោក វីយ៉ាឆេវស្លាវ ក្លាតកូវ(Vyacheslav Gladkov)បាននិយាយថា យ៉ាងហោចណាស់មនុស្សម្នាក់រងរបួសក្នុងអំឡុងពេលមានការវាយប្រហារដោយកាំភ្លើងធំលើទីប្រជុំ សេបេគីណូ(Shebekino)។
លោកបានបន្ថែមថា កាលពីថ្ងៃចន្ទ ទីតាំងឧស្សាហកម្មពីរនៅក្នុងទីប្រជុំជនខាងលើក៏រងការវាយប្រហារ និងកាលពីថ្ងៃសៅរ៍លោកបានស្ថិតក្រោមការវាយប្រហារពីកាំភ្លើងធំពេលលោកព្យាយាមចូលទីប្រជុំជនដែលនៅចម្ងាយ៧គីឡូម៉ែត្រពីព្រំដែនអ៊ុយក្រែន។
តំបន់បែលហ្គោរ៉ូត ជាប់តំបន់ខាគីវរបស់អ៊ុយក្រែន បានរងការវាយប្រហារម្តងហើយម្តងទៀតពីកងកម្លាំងអ៊ុយក្រែន ចាប់តាំងពីផ្ទុះសង្គ្រាមពេញទំហឹងនៅអ៊ុយក្រែនកាលពីខែកុម្ភៈឆ្នាំ២០២២។
កាលពីសប្តាហ៍មុន តំបន់នេះបានជួបការវាយប្រហារកាត់ព្រំដែនចេញពីទឹកដីអ៊ុយក្រែនធ្ងន់ធ្ងរបំផុតចាប់តាំងពីពេលផ្ទុះសង្គ្រាមកាលពី១៥ខែមុន។ព័ត៌មានស្តីពីការឆ្មក់ចូលវាយប្រហារនេះហាក់មិនច្បាស់លាស់ តែរុស្ស៊ីបន្ទោសលើកងកម្លាំងអ៊ុយក្រែន តែក្រុមរុស្ស៊ីចំនួនពីរបានអះអាងថាពួកគេបានចូលរួមក្នុងប្រតិបត្តិការនេះ ក្នុងបំណងទម្លាក់ប្រធានាធិបតីរុស្ស៊ី វ្ល៉ាឌីមៀ ពូទីន៕
រូបថតបង្ហោះដោយក្រសួងការពារជាតិរុស្ស៊ីបង្ហាញរថយន្តពាសដែកត្រូវបានបំផ្លាញនិងរឹបអូសក្រោយការប្រយុទ្ធគ្នានៅបែលហ្គោរ៉ូតកាលពីថ្ងៃ២៣ឧសភា។រុស្ស៊ីក៏អះអាងថា បានសម្លាប់សត្រូវ៧០នាក់ក្នុងការប្រយុទ្ធគ្នានៅក្នុងទឹកដីរុស្ស៊ីនេះ