ប្រែសម្រួល : កញ្ញាដាលីស (ដេល្លីម៉េល) ៖ អគ្គលេខាធិការអង្គការណាតូ លោក ជែន ស្តូលធិនបឺក (Jens Stoltenberg) បាននិយាយថា អង្គការណាតូបានបញ្ជូនទាហានចំនួន ៧០០ នាក់បន្ថែមទៀតទៅកាន់កូសូវ៉ូ ដើម្បីជួយទប់ទល់នឹងការតវ៉ាហិង្សា ហើយបានដាក់កងវរសេនាតូចមួយទៀតឱ្យប្រុងជើងការក្នុងករណីដែលកុបកម្មរីករាលដាល។
លោកស្តូលធិនបឺកបានប្រាប់អ្នកយកព័ត៌មាននៅទីក្រុងអូស្លូបន្ទាប់ពីកិច្ចពិភាក្សាជាមួយនាយករដ្ឋមន្ត្រីន័រវែស ចូណាស ហ្គា ស្ត័រ (Jonas Gahr Store) យ៉ាងដូច្នេះថា “យើងបានសម្រេចចិត្តដាក់ពង្រាយកងទ័ពចំនួន ៧០០ នាក់បន្ថែមទៀតពីកម្លាំងបម្រុងប្រតិបត្តិការសម្រាប់តំបន់បាល់កង់ខាងលិច ហើយនឹងដាក់កងវរសេនាតូចបម្រុងមួយឱ្យប្រុងជើងការខ្ពស់ដូច្នេះទើបពួកគេអាចត្រូវបានដាក់ពង្រាយ ប្រសិនបើចាំបាច់។ ទាំងនេះគឺជាជំហានប្រកបដោយការប្រុងប្រយ័ត្ន”។
កងវរសេនាតូចមួយជាធម្មតាមានទាហានពី ៣០០ ទៅប្រហែល ១.០០០ នាក់។
លោកស្តូលធិនបឺកបានថ្កោលទោសអំពើហិង្សានៅកូសូវ៉ូ ដោយនិយាយថា “ការវាយប្រហារបែបនេះមិនអាចទទួលយកបានទេ ហើយត្រូវតែបញ្ឈប់”។ លោកបានព្រមានថា កងទ័ពណាតូ “នឹងចាត់វិធានការចាំបាច់ទាំងអស់ដើម្បីរក្សាបរិយាកាសសុវត្ថិភាពនិងសន្តិសុខសម្រាប់ពលរដ្ឋទាំងអស់នៅកូសូវ៉ូ”។
លោកបានជំរុញភាគីទាំងពីរឱ្យចាត់វិធានការដើម្បីបន្ថយភាពតានតឹង ទប់ឱ្យជាប់នូវ “អាកប្បកិរិយាមិនទទួលខុសត្រូវបន្ថែមទៀត” និងត្រឡប់ទៅរកកិច្ចពិភាក្សាដែលគាំទ្រដោយ EU លើការធ្វើឱ្យប្រសើរឡើងនូវទំនាក់ទំនង។
សេចក្តីថ្លែងការណ៍មួយកាលពីថ្ងៃអង្គារដោយកងកម្លាំងរក្សាសន្តិភាពពហុជាតិដែលគេស្គាល់ថាកងកម្លាំងថែរក្សាសន្តិភាពKFOR បាននិយាយថាទាហាន ៣០ នាក់ គឺអ៊ីតាលី ១១ នាក់និងហុងគ្រី ១៩ នាក់ “បានរងរបួសរួមទាំងការបាក់ឆ្អឹងនិងការរលាកពីឧបករណ៍បំផ្ទុះកែច្នៃ”។
សេចក្តីថ្លែងការណ៍បានបន្ថែមថា ទាហានហុងគ្រីបីនាក់បាន “រងរបួសដោយសារការប្រើអាវុធ” ប៉ុន្តែរបួសរបស់ពួកគេមិនគំរាមកំហែងដល់អាយុជីវិតនោះទេ។
ក្រុមមន្ត្រីសែប៊ីបាននិយាយថា មនុស្ស៥២នាក់បានរងរបួស ក្នុងនោះមាន៣នាក់របួសធ្ងន់។ យោងតាមប៉ូលិសកូសូវ៉ូ បាតុករបួននាក់ត្រូវបានឃុំខ្លួន។
ភាពតានតឹងបានកើនឡើងជាលើកដំបូងកាលពីចុងសប្តាហ៍កន្លងទៅ បន្ទាប់ពីក្រុមមន្ត្រីដើមកំណើតអាល់បានីបានជាប់ឆ្នោតក្នុងការបោះឆ្នោត ដែលត្រូវបានធ្វើពហិការលើសលប់ដោយជនជាតិសែប បានចូលទៅក្នុងអគារសាលាក្រុង។
នៅក្នុងសារវីដេអូដែលបានចេញផ្សាយកាលពីល្ងាចថ្ងៃអង្គារ នាយករដ្ឋមន្ត្រីកូសូវ៉ូ លោក អាល់ប៊ីន គួទី (Albin Kurti) បាននិយាយថា អភិបាលក្រុងជាប់ឆ្នោតក្នុងការបោះឆ្នោតកាលពីថ្ងៃទី ២៣ ខែមេសា “គឺជាមនុស្សតែម្នាក់គត់ដែលមានភាពស្របច្បាប់ក្នុងការចូលទៅអគារសាលាក្រុង និងសេវាកម្មរបស់ប្រជាពលរដ្ឋ”។
នៅពេលដែលជនជាតិសែបព្យាយាមរារាំងពួកគេ ប៉ូលិសកូសូវ៉ូបានបាញ់ឧស្ម័នបង្ហូរទឹកភ្នែកដើម្បីបំបែកហ្វូងមនុស្ស។
ជាការឆ្លើយតប ប្រទេសសែប៊ីបានដាក់កម្លាំងយោធារបស់ប្រទេសឱ្យប្រុងជើងការខ្ពស់បំផុត ហើយបានបញ្ជូនទាហានបន្ថែមទៀតទៅកាន់ព្រំដែនជាមួយកូសូវ៉ូ។ជនជាតិសែបបានតវ៉ាម្តងទៀតកាលពីថ្ងៃចន្ទ ដោយទទូចឱ្យទាំងអភិបាលក្រុងជនជាតិអាល់បានីនិងប៉ូលិសកូសូវ៉ូត្រូវតែចាកចេញពីភាគខាងជើងកូសូវ៉ូ។
ការប្រឈមមុខដាក់គ្នាគឺកាន់តែអាក្រក់ទៅៗ នៅពេលដែលជនជាតិសែបព្យាយាមចូលទៅក្នុងការិយាល័យសាលាក្រុងនៅក្នុងទីក្រុងហ្ស៊ីវេកាន់ (Zvecan) ស្ថិតនៅចម្ងាយ ៤៥ គីឡូម៉ែត្រពីភាគខាងជើងរដ្ឋធានីព្រីស្ទីណា (Pristina)។
ពួកគេដំបូងបានប៉ះទង្គិចគ្នាជាមួយប៉ូលិសកូសូវ៉ូ ហើយបន្ទាប់មកជាមួយកងរក្សាសន្តិភាពអន្តរជាតិដែលបានដាក់ពង្រាយនៅទីក្រុងហ្ស៊ីវេកាន់។
ការផ្ទុះហិង្សានេះបានញ៉ាំងឱ្យមានកិច្ចខិតខំប្រឹងប្រែងជាអន្តរជាតិដើម្បីធ្វើឱ្យស្ថានការណ៍ស្ងប់ស្ងាត់វិញ៕
កងកម្លាំង Kforឈរការពារអគារសាលាក្រុងហ្ស៊ីវេកាន់ ក្រោយការប៉ះទង្គិចជាមួយជនជាតិសែបនៅកូសូវ៉ូ