ប្រែសម្រួលៈបំណង(abs-cbn)៖ អ្នកផ្សាយវិទ្យុម្នាក់ ត្រូវបានបាញ់សម្លាប់នៅក្រៅផ្ទះរបស់គាត់នៅហ្វីលីពីនភាគកណ្តាលនៅថ្ងៃពុធទី៣១ឧសភា ។លោកក្រេសសិនស្យាណូ ប៊ុនឌីគ្វីន(Cresenciano Bunduquin)អាយុ៥០ឆ្នាំ ត្រូវបានខ្មាន់កាំភ្លើងជិះទោចក្រយានយន្ត(ម៉ូតូ)មកជិតនិងបាញ់សម្លាប់នៅទីក្រុង កាឡាប៉ាន ស៊ីធី(Calapan City)នៅក្នុងខេត្ត អីរៀនថល មីនដូរ៉ូ(Oriental Mindoro) នេះបើតាមការបញ្ជាក់ពីមន្ត្រីប៉ូលីស។
ឃាតករម្នាក់បានស្លាប់ក្រោយពីកូនប្រុសរបស់លោកប៊ុនឌីគ្វីនបើករថយន្តបុកខណៈពួកឃាតករបើកម៉ូតូគេចខ្លួនចេញពីកន្លែងកើតហេតុនៅក្នុងការវាយប្រហារមុនព្រឹកព្រលឹម។
មន្ត្រីប៉ូលីសបាននិយាយថា« ជនសង្ស័យនៅសល់ម្នាក់ទៀតបានរត់រួចខ្លួន តែប្រតិបត្តិការតាមស្វែងរកកំពុងធ្វើ»។
សូមបញ្ជាក់ថា ប្រជាជាតិកម្រងកោះនៅអាស៊ីអាគ្នេយ៍នេះ ជាកន្លែងគ្រោះថ្នាក់បំផុតនៅក្នុងលោកសំរាប់អ្នកកាសែត និងឃាតករភាគច្រើនមិនត្រូវបានចាប់មកផ្តន្ទាទោសទេ។
លោក ប៊ុនឌីគ្វីន កាន់កម្មវិធីផ្សាយមួយសំរាប់វិទ្យុ101.7 DWXR ព្រមទាំងការផ្សាយលើហ្វេសប៊ុក។លោកជាបុគ្គលិកនិយាយរិះគន់មិនសំចៃមាត់អំពីបញ្ហាសង្គម និងចុងក្រោយលោកនិយាយរឿងការកំពប់ហៀរប្រេងដែលប៉ះពាល់ខេត្តរបស់គាត់ ការលេងល្បែងខុសច្បាប់និងនយោបាយ។
ប្រធានស្ថានីយវិទ្យុបានប្រាប់ទីភ្នាក់ងារសារព័ត៌មានបារាំងAFPថា «គាត់បានប្រាប់ខ្ញុំថា គាត់បានទទួលការគំរាម តែគាត់មិនព្រមសហការ។គាត់ក៏បានបង្ហាញបំណងដូរការងារទៅបើកកសិដ្ឋានចិញ្ចឹមមាន់ ដោយសារចង់បានភាពស្ងប់ស្ងាត់»។
ប៊ុនឌីគ្វីន ជាអ្នកកាសែតទីបីដែលត្រូវបានសម្លាប់ចាប់តាំងពីប្រធានាធិបតី ហ្វែរឌីណង់ ម៉ាកូស ជូនៀ ចូលកាន់តំណែងកាលពីខែមិថុនាឆ្នាំមុន។វាក៏បានកើតឡើងនៅជាងមួយឆ្នាំក្រោយពីអ្នកសារព័ត៌មានវិទ្យុល្បីម្នាក់ត្រូវបានបាញ់សម្លាប់នៅក្នុងទីក្រុងម៉ានីល ពេលលោកជិះរថយន្តទៅកាន់ស្ថានីយ៕
លោក ប៊ុនឌីគ្វីន ត្រូវបានបាញ់សម្លាប់នៅមុនព្រឹកព្រលឹមថ្ងៃ៣១ឧសភា