ប្រែសម្រួលៈបំណង(ស្ពុតនិច,ដេល្លីម៉េល)៖ មនុស្សប្រាំនាក់ត្រូវបានសម្លាប់និង១៩នាក់ទៀតរងរបួសក្នុងការបាញ់ផ្លោងចូលកសិដ្ឋានចិញ្ចឹមមាន់នៅភូមិមួយក្នុងសាធារណរដ្ឋប្រជាមានិតលូហ្កានសខ៍(LPR)នេះបើតាមការបញ្ជាក់អះអាងពីមន្ត្រីរុស្ស៊ីកាលពីថ្ងៃពុធ។
មន្ត្រីដដែលបានបន្ថែមថា កងកម្លាំងអ៊ុយក្រែនបានបាញ់កាំជ្រួចហាយម៉ាស(HIMARS)បួនគ្រាប់ចូលភូមិ កាប៉ាទី( Karpaty)ក្នុងសាធារណរដ្ឋប្រជាមានិតលូហ្កានសខ៍កាលពីថ្ងៃ៣១ឧសភា ។របាយការណ៍ដំបូងនិយាយថាកម្មករសំណង់បួននាក់បានស្លាប់និងមនុស្ស១៦នាក់ទៀតរងរបួស។
ពួកមន្ត្រីរុស្ស៊ីក៏បាននិយាយនៅថ្ងៃពុធនេះថា ដ្រូនអ៊ុយក្រែនមួយបានបង្កអគ្គិភ័យនៅរោងចក្រចម្រាញ់ប្រេងមួយនៅរុស្ស៊ីខាងត្បូង និងកងកម្លាំងអ៊ុយក្រែនបានបាញ់ផ្លោងចូលទីប្រជុំជាប់ព្រំដែនជាលើកទីបីនៅក្នុងពេលមួយសប្តាហ៍កន្លងទៅ ដោយបានបំផ្លាញអាគារនិងឆេះយានយន្ត។
នៅមួយថ្ងៃក្រោយពីរុស្ស៊ីចោទប្រកាន់អ៊ុយក្រែនថាបានបញ្ជូនដ្រូនទៅវាយប្រហារអាគារជាច្រើននៅក្រុងមូស្គូ អភិបាលតំបន់ក្រាស្នូដា(Krasnodar) របស់រុស្ស៊ីបាននិយាយថាដ្រូនមួយទំនងជាបានបង្កអគ្គិភ័យនៅរោងចក្រចម្រាញ់ប្រេងAfipsky។អគ្គិភ័យនេះត្រូវបានពន្លត់ភ្លាមនិងមិនមានមនុស្សស្លាប់ឬរងរបួសទេ។
មិនទាន់មានការអះអាងថានរណាបញ្ជូនដ្រូនមកវាយប្រហារទីតាំងរុស្ស៊ីទាំងនេះទេ តែរដ្ឋាភិបាលទីក្រុងមូស្គូបានចោទប្រកាន់រដ្ឋាភិបាលទីក្រុងគៀវថាបង្កើនការវាយប្រហារចូលក្នុងប្រទេសរុស្ស៊ីនៅប៉ុន្មានសប្តាហ៍ចុងក្រោយនេះ នៅពេលរុស្ស៊ីក៏បង្កើនការវាយប្រហារដោយដ្រូននិងកាំជ្រួចលើទីក្រុងគៀវ៕
រុស្ស៊ីអះអាងថា អ៊ុយក្រែនបានបាញ់ផ្លោងកាត់ព្រំដែនចូលតំបន់មួយក្នុងទឹកដៅរុស្ស៊ី