ប្រែសម្រួល : កញ្ញាដាលីស (ស្ត្រេតថែមស៍) ៖ ឆ្មាមួយក្បាលក្នុងទីក្រុងបាងកកប្រទេសថៃបានរួចជីវិតពីការធ្លាក់ពីអគារកម្ពស់៦ជាន់ ដោយគ្មានរបួសធ្ងន់ធ្ងរត្បិតការធ្លាក់របស់វាបណ្តាអោយធ្លុះបែកកញ្ចក់ក្រោយរថយន្តក្តី។
ម្ចាស់រថយន្ត ដែលមានឈ្មោះ អាពីវ៉ាត់ តូយ៉ូថាកា (Apiwat Toyothaka)បានចែករំលែករូបវីដេអូនៃហេតុការណ៍នេះកាលពីថ្ងៃសៅរ៍និងថាគាត់ត្រូវបានជូនដំណឹងអំពីឧបទ្ទវហេតុនេះដោយអ្នកគ្រប់គ្រងខុនដូរបស់គាត់នៅម៉ោង ៧ ព្រឹក។
អ្នកបង្កើតវីដេអូឌីជីថល ដែលជាម្ចាស់ឆ្មាផងដែរនេះ បាននិយាយថា គាត់មិនអាចខឹងទេ នៅពេលគាត់ឃើញឆ្មាភិតភ័យមួយក្បាលលាក់ខ្លួននៅក្រោមរថយន្តរបស់គាត់បន្ទាប់ពីលោតចេញពីប្រហោងដ៏ធំនៃកញ្ចក់ដែលខូចរបស់គាត់។
ឆ្មាឈ្មោះ ស៊ីហ្វ៊ូ (Shifu) តាមដឹងគឺដាក់ឈ្មោះតាមគ្រូក្បាច់គុន ស៊ីហ្វ៊ូ (Master Shifu) នៅក្នុងខ្សែភាពយន្ត Kung Fu Panda នេះបើយោងតាមកាសែត The Nation ។
វីដេអូកាមេរ៉ាសុវត្ថិភាពបានបង្ហាញឆ្មាទម្ងន់ ៨,៥ គីឡូក្រាមតោងយ៉រនៅជាន់ទី ៦ មុនពេលធ្លាក់ចុះក្រោម។ វាបានធ្លាក់បុកយ៉រជាន់ទី៣ មុននឹងធ្លាក់បុកកញ្ចក់ក្រោយនៃរថយន្តរបស់លោកអាពីវ៉ាត់។
លោកអាពីវ៉ាត់បាននិយាយថា ការថតកាំរស្មីអ៊ិចលើស៊ីហ្វ៊ូបានបង្ហាញថាមិនមានការបាក់ឆ្អឹងទេ ហើយវាបានបាត់បង់ក្រញ៉ាំតែពីរប៉ុណ្ណោះ៕
ស៊ីហ្វ៊ូពុំមានរបួសទេក្រោយធ្លាក់ពីលើជាន់ទី៦