ប្រែសម្រួល : កញ្ញាដាលីស (ដេល្លីម៉េល) ៖ លោក អេឡុន ម៉ាស និងរដ្ឋមន្ត្រីឧស្សាហកម្មចិនបានពិភាក្សាគ្នាអំពីវិធីក្នុងការអភិវឌ្ឍរថយន្តថាមពលថ្មីកាលពីថ្ងៃពុធពោលគឺមួយថ្ងៃគត់បន្ទាប់ពីនាយកប្រតិបត្តិក្រុមហ៊ុន Tesla រូបនេះបានហោះទៅក្រុងប៉េកាំង ហើយបានប្រកាសថាគាត់ចង់ពង្រីកអាជីវកម្មនៅក្នុងសេដ្ឋកិច្ចធំបំផុតទីពីររបស់ពិភពលោក។
ក្រសួងឧស្សាហកម្មនិងបច្ចេកវិជ្ជាព័ត៌មានបាននិយាយនៅក្នុងការសេចក្តីប្រកាសមួយថា កាលពីថ្ងៃពុធ លោកម៉ាសបានជួបជាមួយលោក ជីន ជួងឡុង (Jin Zhuanglong) ក្នុងទីក្រុងប៉េកាំង ដើម្បីពិភាក្សាអំពី “ការអភិវឌ្ឍយានយន្តថាមពលថ្មីនិងយានជំនិះឆ្លាតវៃ”។
ក្រសួងមិនបានចែករំលែកព័ត៌មានលម្អិតបន្ថែមទេ។ អ្នកតំណាងក្រុមហ៊ុន Tesla មិនបានឆ្លើយតបទៅនឹងសំណើសុំការបំភ្លឺពីទីភ្នាក់ងារសារព័ត៌មាន AFPសម្រាប់ព័ត៌មានបន្ថែមអំពីការធ្វើដំណើររបស់លោកម៉ាសនោះដែរ។
លោកម៉ាសមានផលប្រយោជន៍អាជីវកម្មយ៉ាងទូលំទូលាយនៅក្នុងប្រទេសចិន ហើយកាលពីថ្ងៃអង្គារបានប្រាប់រដ្ឋមន្ត្រីការបរទេស ឈិន កាង (Qin Gang) ថាក្រុមហ៊ុនរបស់គាត់”មានឆន្ទៈក្នុងការបន្តពង្រីកអាជីវកម្មរបស់ខ្លួននៅក្នុងប្រទេសចិន” នេះបើយោងតាមសេចក្តីប្រកាសព័ត៌មានរបស់ក្រសួងការបរទេស។
រដ្ឋមន្រ្តីការបរទេសចិនទទួលជួបនាយកប្រតិបត្តិក្រុមហ៊ុនTesla កាលពីថ្ងៃអង្គារ
ប្រព័ន្ធផ្សព្វផ្សាយចិនបានរាយការណ៍ថាក្រុមហ៊ុន Tesla បានស្វាគមន៍នាយកប្រតិបត្តិរបស់ខ្លួនមកកាន់ទីក្រុងប៉េកាំងកាលពីថ្ងៃអង្គារជាមួយនឹងអាហារពេលល្ងាចចំនួន ១៦ ឈុត ដែលរួមមានអាហារសមុទ្រ សាច់ចៀមនូវែលសេឡង់ និងគុយទាវសណ្តែកសៀងផ្អាប់បែបប្រពៃណីប៉េកាំង។
ចិនគឺជាទីផ្សាររថយន្តអគ្គិសនីដ៏ធំបំផុតរបស់ពិភពលោក ហើយក្រុមហ៊ុន Teslaបានប្រកាសកាលពីខែមេសាថា ខ្លួននឹងសាងសង់រោងចក្រធំទីពីរនៅទីក្រុងសៀងហៃដែលនឹងក្លាយជារោងចក្រទីពីររបស់ខ្លួននៅក្នុងទីក្រុងបន្ទាប់ពីរោងចក្រយក្សមួយ ដែលបានបើកដំណើរការក្នុងឆ្នាំ ២០១៩។
រដ្ឋាភិបាលក្រុងប៉េកាំងបាននិយាយថា នៅក្នុងជំនួបរបស់គាត់ជាមួយលោកឈិនកាលពីថ្ងៃអង្គារ លោកម៉ាសក៏បានសម្តែងការប្រឆាំងរបស់គាត់ចំពោះ “ការកាត់ផ្តាច់” សេដ្ឋកិច្ចរវាងចិននិងសហរដ្ឋអាម៉េរិកផងដែរ។
លោកម៉ាសបានបន្ថែមថា “ផលប្រយោជន៍របស់សហរដ្ឋអាម៉េរិកនិងចិនគឺជាប់ទាក់ទងគ្នា ដូចជាកូនភ្លោះជាប់គ្នាយ៉ាងអ៊ីចឹង ដែលមិនអាចបំបែកចេញពីគ្នាបានឡើយ”៕
លោកម៉ាសកំពុងនៅស្រុកចិននិយាយអំពីការបង្កើតយានយន្តថាមពលថ្មីជាមួយរដ្ឋមន្ត្រីឧស្សាហកម្មចិន