ប្រែសម្រួល : កញ្ញាដាលីស (VNExpress) ៖ ក្រុមហ៊ុនផ្គត់ផ្គង់របស់ Apple Inc គឺ Foxconn បាននិយាយកាលពីថ្ងៃពុធថា កម្មវិធីបញ្ញាសិប្បនិមិត្ត (AI)នឹងជំរុញយ៉ាងខ្លាំងដល់តម្រូវការសម្រាប់អាជីវកម្មសឺវើ (Server)របស់ខ្លួននៅឆ្នាំនេះ ប៉ុន្តែបានរំលឹកឡើងវិញថា ឆ្នាំ ២០២៣ ជារួមនឹងមានសភាពទ្រឹងសម្រាប់ក្រុមហ៊ុនដោយសារតែបញ្ហាសេដ្ឋកិច្ចពិភពលោក។
ប្រធានក្រុមហ៊ុន Foxconn លោក លីវ យ៉ុងវ៉េ (Liu Young-way) បានប្រាប់កិច្ចប្រជុំម្ចាស់ភាគហ៊ុនប្រចាំឆ្នាំរបស់ក្រុមហ៊ុនថា ក្រុមហ៊ុននៅតែប្រុងប្រយ័ត្នក្នុងឆ្នាំនេះដោយសារតែការរឹតបន្តឹងគោលនយោបាយរូបិយវត្ថុ ភាពតានតឹងភូមិសាស្ត្រនយោបាយ និងភាពមិនច្បាស់លាស់អំពីអតិផរណា ប៉ុន្តែសឺវើគឺជាចំណុចល្អប្រសើរជាងគេ ដោយសារតែការចាប់អារម្មណ៍កើនឡើងចំពោះ AI ។
លោកបាននិយាយថា “មនុស្សកាន់តែច្រើនឡើងកំពុងប្រើ ChatGPT។ អ្នកអាចមើលឃើញទីផ្សារសម្រាប់សឺវើ AI នឹងកើនឡើងលឿនជាងការរំពឹងទុក។យើងរំពឹងថាក្នុងឆមាសទីពីរនៃឆ្នាំនេះអាចនឹងមានការកើនឡើងបីខ្ទង់”។
លោកលីវបានបន្ថែមថា ក្រុមហ៊ុនតៃវ៉ាន់មានចំណែកទីផ្សារសកល ៤០ ភាគរយសម្រាប់សឺវើ ហើយមានបំណងបង្កើនបន្ថែមទៀត។
នៅក្នុងត្រីមាសទីមួយ ផ្នែកផលិតផលក្លោដ (Cloud)និងបណ្តាញណេតវើក (Newtwork) របស់ Foxconn ដែលរួមទាំងសឺវើ មានចំនួន ២២ ភាគរយនៃប្រាក់ចំណូលដែលស្ថិតនៅលំដាប់ទីពីរបន្ទាប់ពីគ្រឿងអេឡិចត្រូនិកឆ្លាតវៃ ដែលរួមមានស្មាតហ្វូន ៥៦ ភាគរយ។
Foxconn ក្នុងខែនេះបានប្រកាសពីការធ្លាក់ចុះ ៥៦ ភាគរយនៅក្នុងប្រាក់ចំណេញសុទ្ធនៅត្រីមាសទីមួយ ដោយទាបជាងការព្យាករណ៍ប្រចាំត្រីមាសរបស់ខ្លួនក្នុងរយៈពេលបីឆ្នាំមកនេះ ហើយនិយាយថា ការប្រមើលមើលសម្រាប់មួយឆ្នាំពេញគឺ “មានកម្រិត”៕
បុគ្គលិក Foxconn ឈរក្បែររថយន្តអគ្គិសនី EV Model V ក្នុងអំឡុងកិច្ចប្រជុំម្ចាស់ភាគហ៊ុនប្រចាំឆ្នាំរបស់ក្រុមហ៊ុនកាលពីថ្ងៃពុធ