ប្រែសម្រួល : កញ្ញាដាលីស (ដេល្លីម៉េល) ៖ យ៉ាងហោចណាស់មនុស្ស ២៣៣ នាក់បានស្លាប់ និងជាង៩០០ នាក់រងរបួសដោយធ្វើឱ្យវាក្លាយជាគ្រោះថ្នាក់រថភ្លើងដ៏ប្រល័យបំផុតនៅលើពិភពលោកក្នុងរយៈពេលពីរទសវត្សរ៍មកនេះ ខណៈក្រុមអ្នកជួយសង្គ្រោះកំពុងតស៊ូជួយសង្គ្រោះអ្នកនៅរស់ដែលជាប់នៅក្រោមកម្ទេចកម្ទី។
រថភ្លើងដឹកអ្នកដំណើរពីរគ្រឿងបានបុកគ្នានៅក្នុងទីក្រុងបាឡាសូរ៉េ (Balasore)រដ្ឋអូឌីសា (Odisha)ភាគខាងកើតប្រទេសឥណ្ឌាកាលពីថ្ងៃសុក្រទី២មិថុនាដោយក្រុមអ្នកជួយសង្គ្រោះកំពុងអន្ទះអន្ទែងស្វែងរកអ្នកផ្សេងទៀតដែលបារម្ភជាប់នៅក្រោមទូរថភ្លើងដែលក្រឡាប់។
រូបភាពពីទិដ្ឋភាពសោកនាដកម្មនេះបានបង្ហាញក្រុមអ្នកជួយសង្គ្រោះកំពុងឡើងលើបំណែកបាក់បែកដើម្បីស្វែងរកអ្នកនៅរស់។
អភិបាលរដ្ឋលោក ប្រាឌីប ជេណា (Pradeep Jena)បាននិយាយនៅក្នុង Twitter ថាចំនួនអ្នកស្លាប់រំពឹងកើនឡើង ដោយលោក ស៊ូដហានស៊ូ សារ៉ានជី (Sudhanshu Sarangi) អគ្គនាយកនៃនាយកដ្ឋានពន្លត់អគ្គិភ័យនៅរដ្ឋអូឌីសាបានបន្ថែមថា សាកសពចំនួន ២៣៣ នាក់ត្រូវបានរកឃើញរហូតមកទល់ពេលនេះ។
លោកសារ៉ានជីបានបន្ថែមថា “ឧបទ្ទវហេតុដ៏សោកសៅបំផុតនេះនិងការប៉ាន់ប្រមាណលទ្ធផលគឺមិនល្អទេ”។
វីដេអូ ដែលបានចែករំលែកនៅលើបណ្តាញសង្គម បានបង្ហាញការមកដល់នៃរថយន្តសង្គ្រោះបន្ទាន់ជាច្រើនគ្រឿងហើយមនុស្សត្រូវបានទាញចេញពីទូរថភ្លើងដែលក្រឡាប់។
សាក្សីម្នាក់បានប្រាប់ទីភ្នាក់ងារសារព័ត៌មានរ៉យទ័រតាមទូរស័ព្ទថា “ខ្ញុំបាននៅទីនោះត្រង់កន្លែងនោះ ហើយខ្ញុំអាចមើលឃើញឈាម ដៃជើងបាក់ និង មនុស្សស្លាប់នៅជុំវិញខ្ញុំ”។
យុវជនរាប់រយនាក់បានតម្រង់ជួរនៅខាងក្រៅមន្ទីរពេទ្យរដ្ឋាភិបាលក្នុងទីក្រុងសូរ៉ូ (Soro) នៃរដ្ឋអូឌីសាដើម្បីបរិច្ចាគឈាម។
រដ្ឋមន្ត្រីសហព័ន្ធផ្នែកផ្លូវដែកលោក អាស្វីនី វ៉ាអ៊ីសណាវ (Ashwini Vaishnaw) បាននិយាយនៅក្នុង Twitter កាលពីយប់ថ្ងៃសុក្រថា ក្រុមជួយសង្គ្រោះត្រូវបានប្រមូលផ្តុំពីទីក្រុងប៊ូបាណេស្វា (Bhubaneswar) ក្នុងរដ្ឋអូឌីសា និងក្រុងកុលកាតា (Kolkata) ក្នុងវេសបេងហ្គាល់ (West Bengal)។
កងកម្លាំងឆ្លើយតបគ្រោះមហន្តរាយជាតិបាននិយាយថា ក្រុមកងកម្លាំងឆ្លើយតបគ្រោះមហន្តរាយជាតិចំនួនបីកំពុងស្ថិតនៅកន្លែងកើតហេតុ ហើយក្រុមចំនួនប្រាំមួយទៀតកំពុងប្រមូលកម្លាំងដើម្បីមកជួយ។
ក្រុមមន្ត្រីផ្លូវដែកបាននិយាយថា ការបុកគ្នាបានកើតឡើងនៅម៉ោងប្រហែល ៧ យប់ ម៉ោងក្នុងស្រុក នៅពេលដែលរថភ្លើង Howrah Superfast Express ដែលរត់ពីទីក្រុងបានហ្កាឡ័រ (Bangalore) ទៅទីក្រុងហាវរ៉ា (Howrah) រដ្ឋវេសបេងហ្គាល់ បើកធ្លាក់ផ្លូវ ហើយបុកជាមួយរថភ្លើង Coromandel Express ដែលរត់ពីទីក្រុងកុលកាតាទៅទីក្រុងឈិនណៃ (Chennai)។
អភិបាលរដ្ឋអូឌីសា លោក ណាវីន ផាត់ណាអ៊ីក (Naveen Patnaik) បាននិយាយថា អាទិភាពរបស់អាជ្ញាធរគឺ “យកអ្នកនៅរស់ទៅមន្ទីរពេទ្យ”៕
រថភ្លើង Howrah Superfast Express បើកធ្លាក់ផ្លូវ ហើយបុកជាមួយរថភ្លើង Coromandel Express កាលពីយប់ថ្ងៃសុក្រ