ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតី ចូ បៃដិន បានអបអរ “ការបញ្ចៀសវិបត្តិ” នៅក្នុងសុន្ទរកថាដំបូងរបស់គាត់ទៅកាន់ប្រទេសជាតិចេញពីការិយាល័យពងក្រពើកាលពីល្ងាចថ្ងៃសុក្រ ដោយត្រៀមខ្លួនរួចរាល់ដើម្បីចុះហត្ថលេខាលើកិច្ចព្រមព្រៀងថវិកាមួយ ដែលលុបបំបាត់អស់រាល់លទ្ធភាពខកខានសងបំណុលរបស់រដ្ឋាភិបាលមិនធ្លាប់មានពីមុនមកដែលលោកនិយាយថាអាចនឹងក្លាយជាមហន្តរាយសម្រាប់សហរដ្ឋអាម៉េរិក និងសេដ្ឋកិច្ចពិភពលោក។
វិធានការរបស់បក្សទាំងពីរត្រូវបានអនុម័តដោយព្រឹទ្ធសភាកាលពីយប់ជ្រៅថ្ងៃព្រហស្បតិ៍បន្ទាប់ពីបានអនុម័តក្នុងសភាក្នុងសម័យប្រជុំមួយកាលពីថ្ងៃពុធ ដែលឈានដល់យប់ជ្រៅដូចគ្នា។លោកបៃដិនគ្រោងនឹងចុះហត្ថលេខាលើវិធានការនេះនៅសេតវិមាននៅថ្ងៃសៅរ៍នេះ ដោយសល់ពីរថ្ងៃទៀតនឹងដល់ថ្ងៃដែលក្រសួងរតនាគារចេញមកព្រមានថាសហរដ្ឋអាម៉េរិកនឹងមិនអាចបំពេញកាតព្វកិច្ចសងបំណុលរបស់ខ្លួនបាន។
លោកបៃដិនបាននិយាយថា “ការអនុម័តកិច្ចព្រមព្រៀងថវិកានេះគឺមានសារៈសំខាន់ណាស់។ វិបត្តិមិនគួរកើតឡើងខ្ពស់ជាងនេះបានទេ។ គ្មានអ្វីដែលអាចនឹងក្លាយជាមហន្តរាយជាងការខកខានសងបំណុលរបស់ប្រទេសនោះឡើយ”។
កិច្ចព្រមព្រៀងនេះត្រូវបានធ្វើឡើងដោយលោកបៃដិននិងប្រធានសភាលោក ខេវិន ម៉ាកកាធី (Kevin McCarthy)ដោយផ្តល់ឱ្យគណបក្សសាធារណរដ្ឋនូវការទាមទារកាត់បន្ថយការចំណាយរបស់សហព័ន្ធមួយចំនួន ប៉ុន្តែរក្សាបន្ទាត់អាទិភាពសំខាន់ៗរបស់បក្សប្រជាធិបតេយ្យ។ វានឹងដំឡើងពិដានបំណុលរហូតដល់ឆ្នាំ ២០២៥ បន្ទាប់ពីការបោះឆ្នោតប្រធានាធិបតីឆ្នាំ ២០២៤និងផ្តល់ឱ្យសមាជិកសភានូវគោលដៅថវិកាសម្រាប់រយៈពេលពីរឆ្នាំខាងមុខ ដោយសង្ឃឹមថានឹងធានាបាននូវស្ថិរភាពសារពើពន្ធនៅពេលដែលរដូវកាលនយោបាយក្តៅគគុកចូលមកដល់។
ដោយគូសបញ្ជាក់អំពី “ការសម្របសម្រួលនិងការឯកភាពគ្នា” នៅក្នុងកិច្ចព្រមព្រៀងនេះ លោកបៃដិនបាននិយាយថា “គ្មាននរណាម្នាក់ទទួលបានអ្វីគ្រប់យ៉ាងដែលពួកគេចង់បាននោះទេ ប៉ុន្តែប្រជាជនអាម៉េរិកទទួលបាននូវអ្វីដែលពួកគេត្រូវការ។ យើងបានបញ្ចៀសវិបត្តិសេដ្ឋកិច្ចនិងការដួលរលំសេដ្ឋកិច្ច”។
លោកបៃដិនបានប្រើឱកាសនេះដើម្បីបង្ហាញពីសមិទ្ធិផលនៃអាណត្តិដំបូងរបស់គាត់ ខណៈគាត់ឈរឈ្មោះសម្រាប់ការបោះឆ្នោតឡើងវិញ ក្នុងនោះរួមមានការគាំទ្រសម្រាប់ការផលិតបច្ចេកវិជ្ជាខ្ពស់ ការវិនិយោគលើហេដ្ឋារចនាសម្ពន្ធ និងការលើកទឹកចិត្តផ្នែកហិរញ្ញវត្ថុសម្រាប់ការប្រយុទ្ធប្រឆាំងនឹងការប្រែប្រួលអាកាសធាតុ ខណៈគូសបញ្ជាក់ផងដែរពីរបៀបដែលគាត់ទល់ទល់បាននូវការកាត់បន្ថយការចំណាយដែលជំរុញដោយបក្សសាធារណរដ្ឋ ដែលគាត់និយាយថាអាចនឹងធ្វើឱ្យរបៀបវារៈរបស់គាត់បរាជ័យ៕
លោកបៃដិនអបអរការបញ្ចៀសវិបត្តិបំណុលនៅការិយាល័យពងក្រពើ