ប្រែសម្រួលៈបំណង(ដេល្លីម៉េល)៖ ការសន្ទនារវាងអាម៉េរិកនិងចិន«មានសារសំខាន់និងចាំបាច់»ដើម្បីបញ្ចៀសការគិតគូរខុសដែលអាចនាំដល់ជម្លោះ នេះបើតាមការលើកឡើងរបស់រដ្ឋមន្ត្រីការពារជាតិអាម៉េរិកលោក ឡយ អូស្ទីន កាលពីថ្ងៃសៅរ៍ទី៣មិថុនា បន្ទាប់ពីរដ្ឋាភិបាលទីក្រុងប៉េកាំងច្រានចោលជំនួបផ្លូវការមួយរវាងប្រមុខការពារជាតិនៃមហាអំណាចទាំងពីរ។
លោកអូស្ទីន និងរដ្ឋមន្ត្រីការពារជាតិចិនលោក លី សាងហ្វ៊ុយ(Li Shangfu)បានចាប់ដៃនិងនិយាយរកគ្នាបន្តិចជាលើកដំបូងនៅពិធីលាងសាយភោជន៍នៅជំនួបកំពូលការពារជាតិស៊ែងហ្គ្រីឡា ដាយឡក(Shangri-La Dialogue) នៅសិង្ហបុរីកាលពីយប់មិញ តែវានេះមិនសមតាមបំណងរបស់ក្រសួងការពារជាតិសំរាប់ការផ្លាស់ប្តូរយោបល់ពិស្តារមួយទេ។
សូមបញ្ជាក់ថាប្រមុខការពារជាតិអាម៉េរិកកំពុងធ្វើទស្សនកិច្ចអាស៊ី ដែលមុននេះបាននាំលោកទៅកាន់ជប៉ុនហើយលោកនឹងបន្តទៅកាន់ឥណ្ឌាជាផ្នែកនៃកិច្ចខិតខំរបស់អាម៉េរិកដើម្បីពង្រឹងសម្ពន្ធភាពនិងភាពជាដៃគូនៅក្នុងតំបន់ក្នុងគោលបំណងទប់ទល់ចិន។
លោកអូស្ទីនបាននិយាយនៅជំនួបShangri-La Dialogueថា« សហរដ្ឋអាម៉េរិកជឿថា ការបើកខ្សែទាក់ទងជាមួយសាធារណរដ្ឋប្រជាមានិតចិន(ចិនប៉េកាំង)មានសារសំខាន់ចាំបាច់ ជាពិសេសរវាងមេដឹកនាំយោធានិងការពារជាតិនៃប្រទេសទាំងពីរ»។
«កាន់តែជួបពិភាក្សាគ្នា យើងកាន់តែអាចបញ្ចៀសការយល់ខុសនិងការគិតគូរខុសដែលអាចនាំដល់វិបត្តិឬជម្លោះ»។
សហរដ្ឋអាម៉េរិកបានអញ្ជើញលោកលី អោយជួបប្រជុំគ្នានៅក្រៅកិច្ចប្រជុំកំពូលសន្តិសុខនេះ តែរដ្ឋាភិបាលទីក្រុងប៉េកាំងបានបដិសេធ នេះបើតាមអ្នកនាំពាក្យក្រសួងការពារជាតិអាម៉េរិកម្នាក់។
តាមពិតលោកលីជាប់ទណ្ឌកម្មអាម៉េរិកនៅឆ្នាំ២០១៨រឿងចិនទិញសព្វាវុធពីរុស្ស៊ី តែក្រសួងការពារជាតិអាម៉េរិកបាននិយាយថា រឿងហ្នឹងវាមិនរារាំងជំនួបរវាងលោកអូស្ទីននិងលោកលីទេ។
ប្រមុខការពារជាតិអាម៉េរិកបាននិយាយថាលោក«ព្រួយបារម្ភជាខ្លាំងដែលចិនមិនមានចេតនាចូលរួមពាក់ព័ន្ធអោយខ្លាំងក្លាឡើងស្តីពីយន្តការសំរាប់ការគ្រប់គ្រងវិបត្តិរវាងយោធានៃប្រទេសទាំងពីរ។លោកចង់និយាយដំដៅទៅរកការបើកស្ទាក់មុខយន្តហោះឈ្លបយកការណ៍អាម៉េរិកនិងសម្ពន្ធមិត្តដ៏គ្រោះថ្នាក់ពីសំណាក់យន្តហោះយោធាចិន រួមទាំងហេតុការណ៍ដូច្នេះមួយកាលពីសប្តាហ៍មុន។
នៅជំនួបនៅសិង្ហបុរីនេះ លោកអូស្ទីនបាននិយាយទៀតថា អាម៉េរិក«នៅតែប្តេជ្ញារក្សាស្ថានភាពបច្ចុប្បន្នមិនអោយផ្លាស់ប្តូរ»នៅច្រកសមុទ្រតៃវ៉ាន់ ហើយ«នឹងបន្តប្រឆាំងការផ្លាស់ប្តូរជាឯតោភាគីស្ថានភាពបច្ចុប្បន្នមកពីភាគីណាមួយ។អាម៉េរិកគាំទ្រកិច្ចចរចាចំពោះជម្លោះនេះ»។
រដ្ឋមន្ត្រីការពារជាតិអាម៉េរិកឡយ អូស្ទីន នៅជំនួបកំពូលសន្តិសុខអាស៊ី នៅសិង្ហបុរី បាននិយាយបញ្ចុះបញ្ចូលរកការគាំទ្រសំរាប់ទស្សនៈរបស់រដ្ឋាភិបាលទីក្រុងវ៉ាស៊ីនតោនអំពី«តំបន់ឥណ្ឌូប៉ាស៊ីហ្វិកមួយសេរី បើកចំហនិងមានសន្តិសុខក្នុងពិភពច្បាប់និងសិទ្ធិ»មួយ
នៅថ្ងៃសៅរ៍នេះលោកអូស្ទីន បានបញ្ជាក់ទៀតថា រដ្ឋាភិបាលទីក្រុងវ៉ាស៊ីនតោននឹងមិនឈរនៅស្ងៀមចំពោះ«ការបង្ខិតបង្ខំនិងការសម្លុតគំរាម»សម្ពន្ធមិត្ត រួមទាំងដៃគូរបស់អាម៉េរិកពីសំណាក់ចិនឡើយ៕