ប្រែសម្រួល : កញ្ញាដាលីស (ស្ត្រេតថែមស៍) ៖ ព្រះអង្គម្ចាស់ហារីនឹងក្លាយជារាជវង្សជាន់ខ្ពស់ដំបូងគេរបស់ចក្រភពអង់គ្លេសដែលនឹងផ្តល់ភស្តុតាងនៅក្នុងតុលាការក្នុងរយៈពេល ១៣០ ឆ្នាំនៅពេលទ្រង់ផ្តល់សក្ខីកម្មនៅសប្តាហ៍ក្រោយនៅក្នុងបណ្តឹងរបស់ទ្រង់ប្រឆាំងនឹងក្រុមហ៊ុនកាសែតមួយ ដែលទ្រង់ចោទប្រកាន់ពីបទប្រព្រឹត្តខុសច្បាប់។
ព្រះអង្គម្ចាស់ហារី ដែលជាបុត្រាពៅរបស់ស្តេចឆាល នឹងបង្ហាញព្រះភក្ត្រក្នុងក្រចកសេះនៅតុលាការជាន់ខ្ពស់ក្រុងឡុងដ៍ ជាផ្នែកនៃសំណុំរឿងដែលទ្រង់និងតារាល្បីៗព្រមទាំងឥស្សរជនជាន់ខ្ពស់ជាង ១០០ នាក់ផ្សេងទៀត បានចោទប្រកាន់ក្រុមហ៊ុនកាសែត Mirror Group (MGN) ដែលជាអ្នកបោះពុម្ពផ្សាយកាសែត Daily Mirror, Sunday Mirror និង Sunday People។
វានឹងក្លាយជាលើកទីមួយហើយដែលសែរាជវង្សជាន់ខ្ពស់ផ្តល់ភស្តុតាងនៅតុលាការ ចាប់តាំងពីទ្រង់ អេដវ៉ាដទី៧ (Edward VII)បានផ្តល់សក្ខីកម្មក្នុងនាមជាសាក្សីនៅក្នុងសំណុំរឿងលែងលះក្នុងឆ្នាំ ១៨៧០ ហើយ ២០ ឆ្នាំក្រោយមកបានធ្វើជាសាក្សីម្តងទៀតក្នុងសវនាការអំពីការបង្កាច់បង្ខូចជុំវិញការលេងល្បែងបៀ ដែលករណីទាំងពីរបានកើតឡើងមុនពេលទ្រង់ឡើងសោយរាជ្យ។
ព្រះអង្គម្ចាស់ហារី ដែលស្ថិតនៅលំដាប់ទីប្រាំនៅក្នុងរាជបល្ល័ង្កនោះ សឹងតែលេចមុខរាល់ថ្ងៃក្នុងសារព័ត៌មានក្នុងរយៈពេលប្រាំមួយខែចុងក្រោយនេះជុំវិញជម្លោះផ្លូវច្បាប់របស់ទ្រង់ជាមួយនឹងសារព័ត៌មានអង់គ្លេសនិងការចេញផ្សាយនូវសៀវភៅជីវប្រវត្តិរបស់ទ្រង់ និង ភាពយន្តឯកសារ Netflix ដែលទ្រង់បានចោទប្រកាន់រាជវង្សជាន់ខ្ពស់ដទៃទៀតអំពីការឃុបឃិតជាមួយកាសែតនានា។
ការបង្ហាញខ្លួនរបស់ទ្រង់នៅក្នុងតុលាការទំនងជាទាក់ទាញការចាប់អារម្មណ៍ទូទាំងពិភពលោក។
លោក ដេវីដ យែលលែន (David Yelland) ទីប្រឹក្សាទំនាក់ទំនងជាន់ខ្ពស់និងជាអតីតនិពន្ធនាយកនៃកាសែត The Sun របស់មហាសេដ្ឋី រូភឺត ម៉ួដុក (Rupert Murdoch) ជាកាសែតមួយដែលទ្រង់ហារីកំពុងប្តឹងដែរនោះ បាននិយាយថា រាជវង្សានុវង្សបានព្យាយាមជាយូរមកហើយដើម្បីគេចពីសំណុំរឿងរបស់តុលាការ ដោយសារតែពួកទ្រង់មិនអាចគ្រប់គ្រងស្ថានការណ៍បានទេ៕
ទ្រង់ហារីនឹងឡើងផ្តល់ភស្តុតាងនៅតុលាការនៅសប្តាហ៍ក្រោយក្នុងបណ្តឹងរបស់ទ្រង់ប្រឆាំងនឹងក្រុមហ៊ុនកាសែត Mirror Group