ប្រែសម្រួលៈបំណង(CGTN)៖ ចំនួនមនុស្សស្លាប់ពីគ្រោះថ្នាក់រថភ្លើងដឹកអ្នកដំណើរពីរបុកគ្នានៅរដ្ឋអូឌីសា(Odisha)នៅឥណ្ឌាភាគខាងកើតឡើងដល់២៨៨នាក់និង៨០៣នាក់ទៀតបានរងរបួសកាលពីថ្ងៃសៅរ៍។
សារព័ត៌មានThe Times of Indiaបានស្រង់សម្តីពួកមន្ត្រីផ្លូវដែកឥណ្ឌា ដែលបាននិយាយថា ជនរងគ្រោះដល់ជីវិត២៨៨នាក់ត្រូវបានកត់ត្រាឃើញនៅក្នុងការបុកទង្គិចដ៏រន្ធត់នេះ ដែលវាជាគ្រោះថ្នាក់រថភ្លើងសម្លាប់មនុស្សច្រើនបំផុតនៅឥណ្ឌាក្នុងរយៈពេលជាង២០ឆ្នាំមកនេះ។ អ្នកដំណើរដែលរងរបួស ត្រូវបានបញ្ជូនទៅកាន់មន្ទីរពេទ្យនៅទីក្រុង ហ្គោប៉ាល់ពួរ(Gopalpur) ខាន់តាប៉ារ៉ា(Khantapara) បាឡាសូរ៉េ(Balasore) បាតរ៉ាក់(Bhadrak)និងសូរ៉ូ(Soro)។
គ្រោះថ្នាក់នេះបានកើតឡើងកាលពីល្ងាចថ្ងៃសុក្រនៅក្បែរស្ថានីយបាហាណាហ្កា បាហ្សា(Bahanaga Bazar)នៅក្នុងស្រុក បាឡាសូរ៉េ ចម្ងាយ១៧១គីឡូម៉ែត្រពីទីក្រុង ប៊ូបាណេសស្វា(Bhubaneswar) រដ្ឋធានីរបស់រដ្ឋអូឌីសា។
យោងតាមមន្ត្រី រថភ្លើង Coromandel Expressដែលរត់ពីក្រុងកុលកាតា(Kolkata)ទៅឆេនណាយ(Chennai) បានបុកដុំកង់រថភ្លើងYashwantpur-Howrah Expressដែលបានជួបគ្រោះថ្នាក់ធ្លាក់ចេញពីផ្លូវ។រថភ្លើងដឹកទំនិញមួយទៀតក៏ត្រូវបានគេរាយការណ៍ថាបានពាក់ព័ន្ធនឹងគ្រោះថ្នាក់នេះដែរ។
ការបុកគ្នានេះបណ្តាលអោយស្ទះចរាចរណ៍ផ្លូវដែក ដោយសារព័ត៌មានបាននិយាយថា រថភ្លើង៤៨ខ្សែបានលុបចោលប្រតិបត្តិការដឹកជញ្ជូនតាំងពីពេលកើតហេតុមកនិង៣៩ខ្សែបង្វែរផ្លូវដោយសារតែឧបទ្ទវហេតុនេះ។
ពួកមន្ត្រីបាននិយាយថា កម្លាំងប៉ះទង្គិចខ្លាំងដល់ថ្នាក់ទូររថភ្លើងផ្លោងគរលើគ្នាបង្កការស្លាប់និងរបួសមនុស្សច្រើន។មនុស្សរាប់រយនាក់ក៏ជាប់ក្នុងទូររថភ្លើងក្រោយកើតហេតុ។
ក្រុមជួយសង្គ្រោះ បុគ្គលិកសុខាភិបាល ប៉ូលិសនិងផ្នែកសេវាអគ្គិភ័យរួមទាំងគ្រោះមហន្តរាយ បានប្រញាប់ប្រញាល់ទៅកាន់កន្លែងកើតហេតុភ្លាមដើម្បីបើកប្រតិបត្តិការសង្គ្រោះ។កងទ័ពអាកាសឥណ្ឌាក៏បានបញ្ជូនឧទ្ធម្ភាគចក្រMi-17ទៅជួយការងារសង្គ្រោះរហូតដល់រសៀលថ្ងៃសៅរ៍ ។រថយន្តពេទ្យជាង២០០ក៏ត្រូវបានបញ្ជូនទៅកាន់កន្លែងកើតមានគ្រោះថ្នាក់ដើម្បីដឹកជនរងគ្រោះទៅកាន់មន្ទីរពេទ្យខណៈក្រុមហ៊ុនរថយន្តក្រុងក្នុងមូលដ្ឋានក៏បានចូលរួមសេវាដឹកជញ្ជូនអ្នករបួស។
សារព័ត៌មានឥណ្ឌាបាននិយាយថា មនុស្សជាង៣.៥០០នាក់បានកំពុងធ្វើដំណើរពេលកើតមានគ្រោះថ្នាក់ រីឯមូលហេតុគេនៅមិនទាន់ដឹងនៅឡើយទេ។
នាយករដ្ឋមន្ត្រីឥណ្ឌាលោក ណារ៉េនដ្រា ម៉ូឌី បានបើកកិច្ចប្រជុំអំពីគ្រោះថ្នាក់រថភ្លើងនេះកាលពីព្រឹកថ្ងៃសៅរ៍ និងក្រោយមកបានធ្វើដំណើរទៅកាន់ក្រុងបាឡាសូរ៉េដើម្បីសួរសុខទុក្ខអ្នករងរបួសនៅមន្ទីរពេទ្យ៕