ប្រែសម្រួលៈបំណង(VNExpress)៖ រដ្ឋមន្ត្រីការពារជាតិចិនលោកលី សាងហ្វ៊ុយ(Li Shangfu)បាននិយាយនៅថ្ងៃអាទិត្យទី៤មិថុនានេះថា ជម្លោះជាមួយអាម៉េរិកនឹងជា«មហន្តរាយដ៏ខ្លោចផ្សា»មួយតែថាប្រទេសលោកស្វះស្វែងរកការចរចាគ្នាអំពីការប្រឈមមុខ។
ថ្លែងនៅជំនួបកំពូលស្តីពីសន្តិសុខអាស៊ី សាងហ្គ្រី-ឡា ដាយឡក(Shangri-La Dialogue)នៅសិង្ហបុរី លោកលីក្នុងឯកសណ្ឋានឧត្តមសេនីយ៍នៃកងទ័ពរំដោះប្រជាជនចិន បាននិយាយថា ពិភពលោកនេះធំល្មមសំរាប់ចិននិងអាម៉េរិករីកចំរើនធំធាត់ទៅជាមួយគ្នា។
«ចិននិងអាម៉េរិកមានប្រព័ន្ធខុសគ្នានិងខុសគ្នាក្នុងផ្លូវជាច្រើនទៀត។ទោះជាយ៉ាងណា វានឹងមិនរារាំងមិនអោយភាគីទាំងពីរស្វែងរកមូលដ្ឋាននិងផលប្រយោជន៍រួមដើម្បីធ្វើអោយទំនាក់ទំនងទ្វេភាគីរីកចំរើននិងកិច្ចសហប្រតិបត្តិការកាន់តែរឹងមាំឡើងឡើយ។វាមិនអាចប្រកែកបានឡើយថា ជម្លោះធ្ងន់ធ្ងរណាមួយឬការប្រឈមមុខរវាងចិននិងអាម៉េរិកនឹងជាគ្រោះមហន្តរាយដ៏ឈឺចាប់មួយសំរាប់ពិភពលោក»។
សូមបញ្ជាក់ថា ទំនាក់ទំនងរវាងមហាអំណាចទាំងពីរបានធ្លាក់ដល់កំរិតទាបបំផុតដោយសារតែបញ្ហាមួយចំនួនធំ រួមមានកោះតៃវ៉ាន់ សមុទ្រចិនខាងត្បូងនិងការបិទខ្ទប់ការនាំចេញបន្ទះឈីបនិងបច្ចេកវិទ្យាផលិតបន្ទះឈីបកំរិតខ្ពស់ទៅកាន់ចិន។
ក្នុងជម្លោះចុងក្រោយ យោធាចិនបានរិះគន់អាម៉េរិកនិងកាណាដាដែលបានបញ្ជូននាវាចម្បាំងបើកកាត់ច្រកសមុទ្រតៃវ៉ាន់កាលពីម្សិលមិញដោយចិនចោទប្រកាន់អាម៉េរិកថា«មានចេតនាបង្កហានិភ័យ»ពីការប្រឈមមុខគ្នា។
តែក្នុងសុន្ទរកថាកាលពីថ្ងៃសៅរ៍នៅជំនួបShangri-La Dialogue រដ្ឋមន្ត្រីការពារជាតិអាម៉េរិកលោក ឡយ អូស្ទីន បានរិះគន់ចិនចំពោះការបដិសេធកិច្ចពិភាក្សាយោធារវាងបរមុខការពារជាតិនៃប្រទេសទាំងពីរ ជាហេតុនាំអោយមហាអំណាចទាំងពីរមិនអាចដោះស្រាយការខ្វែងគំនិតគ្នា។
អូស្ទីន កាលពីថ្ងៃសៅរ៍ បាននិយាយថាអាម៉េរិកមិនស្វះស្វែងរកការប្រឈមមុខឬជម្លោះទេ តែក៏នឹងមិនឳនក្បាលចំពោះការសម្លុតគំរាមឬការបង្ខិតបង្ខំណាមួយឡើយ
លោកលីហាក់ខំអត់ធ្មត់នៅក្នុងសុន្ទរកថារបស់លោក ទោះជាយ៉ាងណាលោកបាននិយាយបញ្ឆិតបញ្ឆៀងដាក់អាម៉េរិក ដោយចោទប្រកាន់ប្រទេសខ្លះថាបង្កើនការត់ប្រឆាំងសព្វាវុធនិងជ្រៀតជ្រែកកិច្ចការផ្ទៃក្នុងរបស់ប្រទេសដទៃទាំងខុសច្បាប់។
លោកថា«គំនិតសង្គ្រាមត្រជាក់មួយកំពុងលេចឡើងហើយឥឡូវ ដោយវាកាន់តែបង្កើនហានិភ័យសន្តិសុខ ហើយការគោរពគ្នាគួរអោយតំលៃជាងការសម្លុតគំរាមនិងអនុត្តរភាព»៕
រដ្ឋមន្ត្រីការពារជាតិចិនលោកលី សាងហ្វ៊ុយ ចូលរួមក្នុងជំនួបកំពូលសន្តិសុខIISS Shangri-La Dialogueទី២០នៅសិង្ហបុរី