ប្រែសម្រួល : កញ្ញាដាលីស (ដេល្លីម៉េល) ៖ អភិបាលតំបន់ទីក្រុងបែលហ្គោរ៉ូត (Belgorod) របស់រុស្ស៊ីនៅតាមព្រំដែនជាមួយអ៊ុយក្រែន បាននិយាយកាលពីថ្ងៃអាទិត្យថាការប្រយុទ្ធគ្នាកំពុងបន្តនៅខាងព្រំដែនរបស់លោក ហើយបានទទួលស្គាល់ថា កងកម្លាំងលម្អៀងខាងអ៊ុយក្រែនបានចាប់ជនជាតិរុស្ស៊ីធ្វើឈ្លើយសឹកក្នុងអំឡុងការប៉ះទង្គិចគ្នាឆ្លងព្រំដែន។
លោកអភិបាល វីយ៉ាឆេស្លាវ គ្លែដកូវ (Vyacheslav Gladkov) បាននិយាយថា លោកបានត្រៀមខ្លួនរួចជាស្រេចសម្រាប់ការចរចាដើម្បីយក “មនុស្សរបស់យើងមកវិញ”ពីក្រុមអ្នកប្រយុទ្ធដែលនិយាយថាពួកគេបានចាប់ទាហានរុស្ស៊ីធ្វើឈ្លើយសឹកនៅក្នុងតំបន់ទីក្រុងបែលហ្គោរ៉ូត។
វាជាលើកទីមួយហើយដែលមន្ត្រីរុស្ស៊ីសារភាពចំពោះការចាប់ឈ្លើយសឹកនៅលើទឹកដីរបស់រដ្ឋាភិបាលក្រុងមូស្គូដោយកងកម្លាំងលម្អៀងខាងអ៊ុយក្រែនក្នុងអំឡុងជម្លោះជាង ១៥ ខែមកនេះ។
ក្រុមដែលគាំទ្រខាងរដ្ឋាភិបាលក្រុងគៀវ ដែលរួមមានជនជាតិរុស្ស៊ី កងទាហានស្ម័គ្រចិត្តរុស្ស៊ី និងកងជីវពលរំដោះរុស្ស៊ីបានអំពាវនាវឱ្យអភិបាលក្រុងបែលហ្គោរ៉ូតមកជួបអ្នកប្រយុទ្ធដោយផ្ទាល់ហើយយកឈ្លើយសឹកទៅវិញ។
លោកគ្លែដកូវបាននិយាយថា “រឿងតែមួយគត់ដែលរារាំងខ្ញុំមិនឱ្យចរចាជាមួយពួកគេគឺមនុស្សរបស់យើងដែលនៅក្នុងដៃរបស់ពួកគេប្រហែលជាស្លាប់អស់ហើយ”។
លោកបាននិយាយថា ការប្រយុទ្ធគ្នាកំពុងបន្តនៅភូមិព្រំដែន ណូវ៉ាយ៉ា តាវ៉ុលហ្សានកា (Novaya Tavolzhanka)។
អ៊ុយក្រែនបានបាញ់ផ្លោងយ៉ាងខ្លាំងទៅលើតំបន់លំនៅឋានរបស់រុស្ស៊ីនៅតាមព្រំដែនក្នុងសប្តាហ៍នេះ ដោយបង្ខំឱ្យមនុស្សរាប់ពាន់នាក់ភៀសខ្លួនទៅកាន់កណ្តាលក្រុងបែលហ្គោរ៉ូដ។
លោកគ្លែដកូវបាននិយាយថា “ក្រុមវិទ្ធង្សនាបានចូលមក ហើយមានការប្រយុទ្ធនៅភូមិណូវ៉ាយ៉ា តាវ៉ុលហ្សានកា។ ខ្ញុំសង្ឃឹមថាពួកគេទាំងអស់នឹងត្រូវកម្ទេចចោល”៕
សពកុមារីអាយុ២ឆ្នាំត្រូវបានទាញចេញពីគំនរបាក់បែកក្នុងក្រុងឌីនីប្រូប្រទេសអ៊ុយក្រែន ក្រោយរងការវាយប្រហារតាមអាកាសពីសំណាក់រុស្ស៊ី