ដោយៈ តារារិទ្ធ / ភ្នំពេញ៖ នៅព្រឹកថ្ងៃទី៥ ខែមិថុនា ឆ្នាំ២០២៣ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវឲ្យអ្នកលេងបណ្តាញសង្គមទាំងអស់ បញ្ឈប់ការផ្សព្ធផ្សាយចម្រៀង “មរណភាពស្វាមីព្រះបាទជ័យវរ្ម័នទី៧” ដែលច្រៀងដោយ អ្នកចម្រៀង មាស សុខសោភា។
សម្ដេចតេជោ ហ៊ុន សែន បានអំពាវនាវឲ្យប្រជាពលរដ្ឋទាំងអស់ ដែលលេងបណ្ដាញ សង្គមបញ្ឈប់ការ Share និង Comment និងលុបចោលនូវចម្រៀងដែលច្រៀង ដោយអ្នកចម្រៀង មាស សុខសោភា ក្រុមចំណងជើងថា “មរណភាពស្វាមីព្រះបាទ ជ័យវរ្ម័នទី ៧” សូមបញ្ចប់ទៅ ។
សម្ដេចតេជោ បានអរគុណអ្នកចម្រៀង មាស សុខសោភា ដែលបានសុំទោស និងលុបចោលនូវបទចម្រៀងនេះ ចេញពីក្នុង facebook របស់ខ្លួន។
សម្ដេចបានបន្តថាៈ វាជារឿងប្រវត្តិសាស្ត្រ យើងមិនគួរធ្វើឲ្យមានការប៉ះពាល់ ទៅ ដល់ប្រវត្តិសាស្ត្រ ដែលយើងមិនដឹងច្បាស់លាស់ អំពីប្រវត្តិសាស្ត្រនោះទេ។
បើតាមសម្ដេច ចម្រៀង មាស សុខសោភា នេះ ធ្វើតាមតាបសមួយ នៅខេត្តព្រះ វិហារ ដែលសម្ដេច បានស្នើឲ្យមានការស៊ើបអង្កេតមើល តើមានបំណងបែបណា ក្នុងការតែងបទចម្រៀង បែបនេះ៕/V/R
