ប្រែសម្រួល : កញ្ញាដាលីស (ប៊ីប៊ីស៊ី) ៖ ពួកជួញដូរគ្រឿងញៀនបានរកឃើញវិធីថ្មីនៃការរត់ពន្ធថ្នាំញៀនមេតំហ្វេតាមីនគ្រីស្តាល់ ដែលគេស្គាល់ថាម៉ាទឹកកកចេញពីអាស៊ីអាគ្នេយ៍ទៅកាន់អតិថិជនដែលមានប្រាក់ចំណូលខ្ពស់នៅខាងក្រៅតំបន់ នេះបើយោងតាមរបាយការណ៍របស់អង្គការសហប្រជាជាតិ។
ក្រុមឧក្រិដ្ឋជនកំពុងចល័តគ្រឿងញៀនកាន់តែច្រើនឡើងតាមសមុទ្រដើម្បីគេចពីការល្បាតជើងគោកក្នុងប្រទេសថៃនិងចិន ដោយធ្វើឱ្យពិបាករកឃើញគ្រឿងញៀន។
ការិយាល័យអ.ស.បទទួលបន្ទុកគ្រឿងញៀននិងឧក្រិដ្ឋកម្មបាននិយាយថា ពួកគេបានរៀន “គិតគូរទុកជាមុន សម្របខ្លួន និងព្យាយាមគេចពីមន្ត្រីអនុវត្តច្បាប់”។
ម៉ាទឹកកកត្រូវបានលក់នៅក្នុងប្រទេសជប៉ុន កូរ៉េខាងត្បូង អូស្ត្រាលី និង នូវែលសេឡង់។
ទីភ្នាក់ងារអ.ស.បនេះបានព្រមានថា ការជួញដូរថ្នាំមេតំហ្វេតាមីននិងថ្នាំញៀនខុសច្បាប់ផ្សេងទៀតក្នុងទ្រង់ទ្រាយធំបែបនេះដែលភាគច្រើនហូរចេញពីទីតាំងផលិតកំពូលៗនៅក្នុងផ្នែកខ្លះនៃប្រទេសមីយ៉ាន់ម៉ា ក៏មិនបានបង្ហាញសញ្ញានៃការថមថយនោះដែរ។
រដ្ឋសានក្នុងប្រទេសមីយ៉ាន់ម៉ាគឺជាកន្លែងដែលមនុស្សភាគច្រើនជឿថាជាកន្លែងជួញដូរថ្នាំញៀនធំជាងគេរបស់ពិភពលោក។ ក្រុមជួញដូរបានដឹកគ្រឿងញៀនចេញតាមព្រំដែនឡាវ កម្ពុជា និងថៃ ដែលជាតំបន់មួយត្រូវគេស្គាល់ថា តំបន់ត្រីកោណមាស។
លោក ជេរ៉េមី ឌូក្លាស (Jeremy Douglas) អ្នកតំណាងប្រចាំតំបន់របស់ទីភ្នាក់ងារអ.ស.បបាននិយាយថា “ក្នុងឆ្នាំ ២០២២យើងបានឃើញពួកគេធ្វើការនៅជុំវិញព្រំដែនថៃច្រើនជាងពេលកន្លងទៅ”។
“ពួកជួញដូរបានបន្តដឹកគ្រឿងញៀនក្នុងចំនួនយ៉ាងច្រើនឆ្លងកាត់ឡាវនិងភាគខាងជើងថៃ ប៉ុន្តែក្នុងពេលជាមួយគ្នានេះដែរពួកគេបានជំរុញការផ្គត់ផ្គង់ដ៏សំខាន់ឆ្លងកាត់ភាគកណ្តាលប្រទេសមីយ៉ាន់ម៉ាទៅកាន់សមុទ្រអានដាម៉ាន់ (Andaman)ដែលមនុស្សតិចណាស់ចាប់អារម្មណ៍”៕
ក្រុមឧក្រិដ្ឋជនកំពុងចល័តគ្រឿងញៀនកាន់តែច្រើនឡើងតាមសមុទ្រដើម្បីគេចពីការល្បាតជើងគោកក្នុងប្រទេសថៃនិងចិន