ប្រែសម្រួល : កញ្ញាដាលីស (ដេល្លីម៉េល) ៖ អ្នកជិះកង់បំបែកឯតទគ្គកម្មមួយរូបនឹងចាប់ផ្តើមការជិះកង់ចម្ងាយ ៣.០០០ ម៉ាយ (ជិត៥.០០០គីឡូម៉ែត្រ) លើកង់ឫស្សីធ្វើដោយដៃ ជុំវិញចក្រភពអង់គ្លេសដើម្បីបង្កើនការយល់ដឹងអំពីវិបត្តិអាកាសធាតុ។
លោកស្រី ខេត ស្ត្រង (Kate Strong)អាយុ ៤៤ ឆ្នាំបានគ្រងតំណែងឯតទគ្គកម្មពិភពលោកខាងជិះកង់ចំនួនបីនិងជាជើងឯកទ្រីយ៉ាត្លុង ប៉ុន្តែសង្ឃឹមថា ការជិះកង់រយៈពេល ៩០ ថ្ងៃរបស់លោកស្រីនឹងផ្តោតលើ “ការផ្សារភ្ជាប់គ្នា”។
លោកស្រីស្ត្រង ដែលធ្វើការក្រៅម៉ោងជាប្រធានផ្នែកផលប៉ះពាល់បរិស្ថានសម្រាប់អង្គការ Climategames នឹងចេញដំណើរពីទីក្រុងវេសមីនស្ទើ (Westminster) នៅថ្ងៃទី ៥ ខែមិថុនា ដោយជិះកង់ទៅទីក្រុងន័រវីច (Norwich) សម្រាប់ទីសំចតផ្លូវការដំបូងរបស់លោកស្រី មុនពេលធ្វើដំណើរទៅកាន់កន្លែងនានារួមទាំងទីក្រុងអេឌីនបឺក (Edinburgh) ទីក្រុងចនអូហ្គ្រោត (John O’Groats) ទីក្រុងក្លាសហ្គោ (Glasgow) និងទីក្រុងលីវើភូល (Liverpool)។
បន្ទាប់មកលោកស្រីគ្រោងនឹងជិះកង់តាមបណ្តោយឆ្នេរវែល (Wales) កាត់តាមក្រុងខាឌីហ្វ (Cardiff) និងព្រីស្តុល (Bristol) មុនពេលទៅដល់ក្រុងលែនស៍អិន (Land’s End) ក្នុងខេត្តខនវ៉ល (Cornwall) ហើយបន្ទាប់មកនឹងត្រឡប់ទៅទីក្រុងឡុងដ៍វិញដើម្បីបញ្ចប់ការជិះកង់ដ៏អស្ចារ្យនេះនៅថ្ងៃទី ២ ខែកញ្ញា។
លោកស្រីស្ត្រងមកពីទីក្រុងឡុងដ៍បានប្រាប់ទីភ្នាក់ងារសារព័ត៌មាន PA ថា “វាមានរយៈពេលបីឆ្នាំហើយ។ ខ្ញុំមិនដែលជិះកង់លើសពីប្រាំថ្ងៃជាប់គ្នាទេ ដូច្នេះខ្ញុំនឹងមាន ៩០ ថ្ងៃជាប់ៗគ្នា”។
“ក្រៅពីការរហែកដាច់ស្បែកជើង ខ្ញុំក៏មិនទាន់ច្បាស់ដែរទេថាតើខ្ញុំនឹងមានអារម្មណ៍បែបណា ហើយនោះជាមូលហេតុដែលខ្ញុំបើកផ្លូវឱ្យមនុស្សមកចូលរួមជាមួយខ្ញុំ”។
លោកស្រីស្ត្រងត្រូវបានបំផុសគំនិតឱ្យសម្រេចការជិះកង់ដ៏ឆ្ងាយនេះ ដោយសារលោកស្រីនិយាយថា វិបត្តិអាកាសធាតុត្រូវតែដោះស្រាយជាបន្ទាន់។
លោកស្រីបាននិយាយថា “ខ្ញុំមិនមែនជាអ្នកវិទ្យាសាស្ត្រទេ ហើយនេះគ្រាន់តែជាគំនិតរបស់ខ្ញុំ ប៉ុន្តែយើងត្រូវការសកម្មភាពជាបន្ទាន់ យើងត្រូវការវិធានការបន្ទាន់”។
“ហើយយើងមានកម្រិតមីក្រូបុគ្គលដែលសំខាន់ ប៉ុន្តែការផ្លាស់ប្តូរដ៏ធំបំផុតគឺចេញមកពីរដ្ឋាភិបាល។ យើងត្រូវការសកម្មភាពដ៏ធំ ប៉ុន្តែក្នុងកម្រិតបុគ្គល ហើយបន្ទាប់មកបញ្ជូនវាទៅរដ្ឋាភិបាលនិងមហាជនដើម្បីប្រាកដថាក្របខណ្ឌដែលយើងធ្វើ បានគាំទ្រដល់រូបភាពធំជាងនេះផងដែរ”៕
លោកស្រីស្ត្រងនឹងចាប់ផ្តើមជិះកង់ជិត៥០០០គីឡូម៉ែត្រនៅចក្រភពអង់គ្លេសនៅថ្ងៃចន្ទនេះ