ប្រែសម្រួល : កញ្ញាដាលីស (ស្ត្រេតថែមស៍) ៖ មុនពេលបុរសភាគច្រើននៅចិនចាប់ផ្តើមធ្វើតារាងថ្លៃបណ្តាការរបស់ពួកគេ ជាដំបូងពួកគេត្រូវគណនា “ថ្លៃទឹកដោះកូនក្រមុំ”ជាមុនសិនសម្រាប់ផ្តល់ជូនដល់ក្រុមគ្រួសារកូនក្រមុំអនាគតរបស់ពួកគេ។
ថ្លៃទឹកដោះសម្រាប់បុរសម្នាក់នៅក្រុងចឺជាំង (Zhejiang) ភាគខាងកើតមានចំនួន ៩,៩៨ លានយ័ន (១,៤១ លានដុល្លារ) ជាសាច់ប្រាក់សុទ្ធ ព្រមទាំងដុំមាសនិងនាឡិកាប្រណីតដែលគាត់បានបញ្ជូនកាលពីថ្ងៃអង្គារសប្តាហ៍មុនតាមឡានពាសដែកទៅកាន់ផ្ទះកូនក្រមុំរបស់គាត់។
នៅក្នុងវីដេអូដែលចែកចាយតាមអនឡាញ គេឃើញថ្លៃបណ្ណាការផ្ទេរដាក់ក្នុងហិបសុវត្ថិភាពចំនួនប្រាំមួយពណ៌ក្រហមភ្លឺចែងចាំងអមការពារដោយសន្តិសុខអាជីពចំនួនបួននាក់ទៅកាន់ទីកន្លែងនៃពិធីភ្ជាប់ពាក្យ ហើយបន្ទាប់មកសាច់ប្រាក់ត្រូវបានផ្ញើទៅធនាគារដើម្បីដាក់ចូលទៅក្នុងគណនីរបស់កូនក្រមុំ។
រូបថតមួយសន្លឹកទៀតបានបង្ហាញហិបសុវត្ថិភាពមួយចំនួនទៀត ដែលមានសាច់ប្រាក់សុទ្ធ ដុំមាស និងគ្រឿងអលង្ការមួយចំនួន ផ្ទេរដាក់លើតុ។
ថ្លៃទឹកដោះកូនក្រមុំច្រើនហួសហេតុ ឬហៅថា “កៃលី” (cai li)បានទាក់ទាញប្រតិកម្មទាំងការច្រណែននិងការរិះគន់តាមអនឡាញទោះបីជាកូនកំលោះព្យាយាមនិយាយសម្រាលអំពីថ្លៃបណ្តាការដ៏ច្រើនរបស់គាត់ក៏ដោយ នេះបើយោងតាមកាសែត Global Times។
បុរស ដែលប្រព័ន្ធផ្សព្វផ្សាយចិនស្គាល់ត្រឹមថាលោកយ៉ាន (Yan)អាយុ ៣០ ឆ្នាំបាននិយាយថា “នេះជាទំនៀមទម្លាប់ក្នុងតំបន់ វាជារឿងធម្មតានៅទីក្រុងតៃជូ (Taizhou)” ដោយសំដៅទៅទីក្រុងចឺជាំង។
គាត់បានបន្ថែមថា ពួកគេទាំងពីរនឹងរៀបការនៅចុងឆ្នាំ២០២៣៕
លោកយ៉ានដឹកលុយជាង១,៤១លានដុល្លារនិងមាសដុំទៅផ្ទះកូនក្រមុំកាលពីថ្ងៃអង្គារសប្តាហ៍មុននៅក្រុងចឺជាំង