ប្រែសម្រួល : កញ្ញាដាលីស (ដេល្លីម៉េល) ៖ អាជ្ញាធរអាម៉េរិកកាលពីថ្ងៃចន្ទបានចោទប្រកាន់ក្រុមហ៊ុនរូបិយប័ណ្ណអេឡិចត្រូនិកយក្ស Binance ពីបទរំលោភច្បាប់មូលបត្រដែលរួមគ្នាទៅស្មើនឹងអ្វីដែលគេហៅថា “បណ្តាញបោកបញ្ឆោតទូលំទូលាយ” និង “ការគេចវេសពីច្បាប់ដោយចេតនា”។
ក្រុមហ៊ុន Binance ត្រូវបានចោទប្រកាន់ថាបានអនុញ្ញាតឱ្យប្រជាជនអាម៉េរិកធ្វើពាណិជ្ជកម្ម ទោះបីជាវេទិកានេះមិនត្រូវបានចុះបញ្ជីនៅក្នុងសហរដ្ឋអាម៉េរិកជាផ្សារមូលបត្រមួយក៏ដោយ។ បណ្តឹងនេះក៏ចោទប្រកាន់ក្រុមហ៊ុន Binance ថាបានប្រើប្រាស់មូលនិធិអតិថិជនខុសផងដែរ។
គណៈកម្មការមូលបត្រ (SEC)បានដាក់ពាក្យបណ្ដឹងរដ្ឋប្បវេណីមួយ ដោយរាយនាមការចោទប្រកាន់ចំនួន ១៣ ពាក់ព័ន្ធនឹងវេទិកា និងអង្គភាពវិនិយោគផ្សេងទៀត ដែលគ្រប់គ្រងដោយស្ថាបនិកលោក ចាងផឹង ចាវ (Changpeng Zhao) ដែលធ្លាប់ជាគូប្រជែងរបស់មហាសេដ្ឋីគ្រីបតូអាប់យស លោក សាម ប៊ែងមែន ហ្វ្រាយ (Sam Bankman-Fried)។
បណ្តឹងរបស់ SECបានកើតឡើងក្រោយមានការចោទប្រកាន់ក្នុងខែមីនាដោយនិយតករអាម៉េរិកមួយផ្សេងទៀតគឺ គណៈកម្មការអនាគតទំនិញប្រើប្រាស់និងមូលបត្រ។
SECបាននិយាយថា លោកចាវ និង Binance បានអះអាងជាសាធារណៈថា អតិថិជនអាម៉េរិកត្រូវបានរារាំងមិនឱ្យធ្វើប្រតិបត្តិការនៅលើវេបសាយ Binance.com ទេប៉ុន្តែវេទិកានេះបានអនុញ្ញាតឱ្យអតិថិជនមានតម្លៃខ្ពស់រក្សាការជួញដូរ “ស្ងាត់ៗ”។
លោកចាវបានអះអាងថា Binance.US មានឯករាជ្យពី Binance ប៉ុន្តែត្រូវបាន “គ្រប់គ្រងដោយសម្ងាត់” ដោយ Binance “នៅពីក្រោយឆាក” នេះបើយោងតាមពាក្យបណ្តឹង។
ទីភ្នាក់ងារនេះក៏បានចោទប្រកាន់ដែរថា លោកចាវ និង Binance “បានបញ្ជូលគ្នា” នូវទ្រព្យសកម្មរបស់អតិថិជន រួមទាំងអង្គភាពគ្រប់គ្រងដោយលោកចាវមួយផ្សេងទៀតគឺ Signa Chain ដែល “បានចូលរួមក្នុងការជួញដូរបោកបញ្ឆោត ដែលធ្វើឱ្យទំហំពាណិជ្ជកម្មរបស់វេទិកានេះកើនឡើងដោយសិប្បនិម្មិត”។
ប្រធាន SEC លោក ហ្គារី ជេនស្លឺ (Gary Gensler) បាននិយាយថា “តាមរយៈការចោទប្រកាន់ចំនួន១៣ យើងបានចោទប្រកាន់ថា លោកចាវនិងអង្គភាពរបស់ Binanceបានចូលរួមក្នុងបណ្តាញបោកប្រាស់យ៉ាងទូលំទូលាយ ទំនាស់ផលប្រយោជន៍ កង្វះការលាតត្រដាង និង ការគេចវេសពីច្បាប់ដោយចេតនា”។
“លោកចាវ និង Binance បានបំភ័ន្តវិនិយោគិនអំពីការគ្រប់គ្រងហានិភ័យរបស់ពួកគេនិងបរិមាណជួញដូរដែលខូច ខណៈលាក់បាំងអ្នកដែលកំពុងធ្វើប្រតិបត្តិការវេទិកានេះយ៉ាងសកម្ម ព្រមទាំងការជួញដូរបោកប្រាស់នៃក្រុមហ៊ុនផលិតទីផ្សារពាក់ព័ន្ធរបស់ខ្លួន និង សូម្បីទីកន្លែង និងអ្នក ដែលវិនិយោគិននិងទ្រព្យសកម្មគ្រីបតូផ្តល់មូលនិធិឱ្យ”។
លោកចាវបាននិយាយលើ Twitter ថា “ក្រុមការងាររបស់ Binance ទាំងអស់កំពុងប្រចាំការ ដោយធានាឱ្យប្រព័ន្ធមានស្ថិរភាព រួមទាំងការដកប្រាក់និងការដាក់ប្រាក់”។
“យើងនឹងចេញការឆ្លើយតបនៅពេលណាដែលយើងបានឃើញពាក្យបណ្តឹង។ មិនទាន់បានឃើញវានៅឡើយទេ។ ប្រព័ន្ធផ្សព្វផ្សាយទទួលបានព័ត៌មានមុនពេលយើងទទួលបានទៅទៀត”។
ដំណឹងនៃករណីនេះបានធ្វើឱ្យប៉ះពាល់ដល់តម្លៃលុយ Bitcoin ដែលបានធ្លាក់ចុះប្រហែលពីរភាគរយបន្ទាប់ពីមានចំណងជើងនៃការចោទប្រកាន់នេះ៕
គណៈកម្មការមូលបត្រអាម៉េរិកចោទប្រកាន់ចំនួន ១៣ ករណីពាក់ព័ន្ធនឹងក្រុមហ៊ុន Binance និងអង្គភាពវិនិយោគផ្សេងទៀត ដែលគ្រប់គ្រងដោយស្ថាបនិកលោក ចាងផឹង ចាវ