ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Apple កំពុងធ្វើការផ្លាស់ប្តូរតូចមួយប៉ុន្តែពិតជាអស្ចារ្យខ្លាំងមែនទែនចំពោះ Siriនៅក្នុង iOS 17 ថ្មី ដែលអ្នកប្រើប្រាស់អាចទម្លាក់ពាក្យ “Hey” ហើយគ្រាន់តែនិយាយថា “Siri” ប៉ុណ្ណោះ ដើម្បីដំណើរការជំនួយការនិម្មិត។
ការផ្លាស់ប្តូរនេះគឺជាលក្ខណៈពិសេសដែលចង់បានបំផុតរបស់អ្នកគាំទ្រប្រព័ន្ធប្រតិបត្តិការ iOS ហើយវាហាក់ដូចជា Apple ទីបំផុតបានស្តាប់ការទាមទាររបស់ពួកគេហើយ។
ប្រព័ន្ធប្រតិបត្តិការនេះក៏នឹងឃើញកម្មវិធីថ្មីៗផ្តោតលើសុខភាពផ្លូវកាយនិងផ្លូវចិត្តរបស់អ្នក រួមជាមួយនឹងផ្ទាំងរូបភាពផ្ទាល់ខ្លួនរបស់អ្នកប្រើប្រាស់ផងដែរ ដែលបង្ហាញរូបថត ឬ Emoji របស់ពួកគេទៅកាន់អ្នកទទួលការហៅទូរស័ព្ទ។
មុខងារសារជាសំឡេងផ្ទាល់ក៏ចម្លងសារដោយផ្ទាល់នៅលើអេក្រង់ផងដែរ ដោយអនុញ្ញាតឱ្យអ្នកមិនចាំបាច់អើពើឬឆ្លើយតបទៅនឹងការហៅទូរស័ព្ទ។
ក្រុមហ៊ុន Apple បាននិយាយថា ព្រឹត្តិការណ៍ WWDC ដែលបានចាប់ផ្តើមកាលពីថ្ងៃចន្ទនៅ Apple Park ក្នុងរដ្ឋកាលីហ្វ័រញ៉ា នឹងក្លាយជា “សប្តាហ៍នៃបច្ចេកវិជ្ជាដ៏អស្ចារ្យ”។
ព្រឹត្តិការណ៍ប្រចាំឆ្នាំនេះត្រូវបានប្រារព្ធឡើងដោយក្រុមហ៊ុន Apple តាំងពីឆ្នាំ ១៩៨៣ ទោះបីជាដំបូងវាមិនមានបំណងសម្រាប់ការប្រកាសឧបករណ៍ថ្មីៗក៏ដោយ។
វាគ្រាន់តែក្នុងរយៈពេល ២០ ឆ្នាំចុងក្រោយនេះប៉ុណ្ណោះដែល Apple បានប្រើសន្និសីទនេះជាកន្លែងបើកដំណើរការដ៏សំខាន់សម្រាប់ឧបករណ៍ថ្មីៗ រួមទាំងឧបករណ៍បំពងសំឡេង HomePod ក្នុងឆ្នាំ ២០០៧ និង iPhone 4 ក្នុងឆ្នាំ ២០១០។
ជាក់ស្តែង ព្រឹត្តិការណ៍សំខាន់នៅក្នុងប្រក្រតិទិនសម្រាប់អ្នកគាំទ្រ Apple គឺធ្វើឡើងនៅក្នុងពីរសប្តាហ៍ដំបូងនៃខែកញ្ញា នៅពេលដែលក្រុមហ៊ុនប្រកាស iPhone ថ្មីរបស់ខ្លួន បើទោះបីជាព្រឹត្តិការណ៍ WWDC អាចមានទំហំធំជាងមុននៅឆ្នាំនេះក៏ដោយ។
ទោះយ៉ាងណា យោងតាមអ្នកជំនាញម្នាក់ នៅឆ្នាំនេះ ក្រុមហ៊ុនត្រូវគេរំពឹងថានឹងប្រកាសឧបករណ៍ថ្មី ដែលអាច “ជំនួស iPhone” ក្នុងពេលឆាប់ៗ នោះគឺ វ៉ែនតា AR/VR ដែលលេចឮតែពាក្យចចាមអារ៉ាមជាយូរមកហើយ៕
សារជាសំឡេងអាចបញ្ជូនរូបភាពរបស់អ្នកទៅកាន់អ្នកទទួលនៅលើ iOS 17 ថ្មី