ប្រែសម្រួល : កញ្ញាដាលីស (ស្ត្រេតថែមស៍) ៖ ក្មេងស្រីអាយុ ១៣ ឆ្នាំម្នាក់នៅក្នុងប្រទេសចិន ដែលញៀននឹងហ្គេមទូរស័ព្ទ បានលួចកាតឥណពន្ធរបស់ម្តាយនាង ហើយបានចំណាយប្រាក់ ៤៤៩.៥០០ យ័ន (ជាង ៦៣.០០០ ដុល្លារ) លើកម្មវិធីហ្គេមក្នុងរយៈពេលបួនខែ។
ស្ត្រីជាម្តាយ ដែលចង់ឱ្យគេស្គាល់ត្រឹមតែឈ្មោះ វ៉ាង បានប្រទះឃើញចោរលួចលុយ នៅពេលដែលលោកស្រីទទួលទូរស័ព្ទពីគ្រូអនុវិទ្យាល័យរបស់កូនស្រីគាត់ដែលកត់សម្គាល់ឃើញក្មេងស្រីនេះកំពុងចំណាយពេលច្រើនឡើងនៅលើទូរស័ព្ទដៃរបស់នាង។
សារព័ត៌មានចិន Elephant News បានរាយការណ៍ថា លោកស្រីវ៉ាងពិតជាតក់ស្លុតដែលរកឃើញថា នៅសល់លុយតែ ០,៥ យ័ននៅក្នុងគណនីធនាគាររបស់លោកស្រីដោយសារតែការចំណាយរបស់កូនស្រីគាត់។
នៅក្នុងវីដេអូដ៏ល្បីមួយដែលបង្ហោះជាមួយនឹងរបាយការណ៍ព័ត៌មាននោះ លោកស្រីវ៉ាងមកពីខេត្តហឺណាន ភាគកណ្តាលប្រទេសចិន ត្រូវគេឃើញអង្គុយយំខណៈលោកស្រីរៀបរាប់ពីភាពតក់ស្លុតដែលលោកស្រីជួប នៅពេលបានឃើញទំព័រជាច្រើននៃប្រតិបត្តិការទូទាត់ត្រូវបានធ្វើឡើង។
លោកស្រីបាននិយាយថា “ខ្ញុំចង់តែបោកក្បាលនឹងដី ពេលខ្ញុំដឹងថាមានអ្វីកើតឡើង។ តើក្មេងស្រីអាយុ១៣ឆ្នាំអាចធ្វើរឿងបែបនេះដោយរបៀបណា?”។
នៅពេលឪពុករបស់ក្មេងស្រីសួរដេញដោលនាងអំពីការចំណាយ នាងបានសារភាពថាបានចំណាយប្រាក់ ១២០.០០០ យ័នលើហ្គេម ២១០.០០០ យ័នលើការទិញផ្សេងៗក្នុងហ្គេម និង ១០០.០០០ យ័នទៀតទិញហ្គេមឱ្យមិត្តរួមថ្នាក់របស់នាងយ៉ាងហោច ១០ នាក់។
ក្មេងស្រីនោះបាននិយាយនៅក្នុងវីដេអូថា នាងស្ទាក់ស្ទើរក្នុងការបង់ថ្លៃឱ្យមិត្តរួមថ្នាក់របស់នាង ប៉ុន្តែបានចុះចាញ់ ពេលពួកគេបន្តតាមរំខាននាង៕
លុយសន្សំរបស់គ្រួសារលោកស្រីវ៉ាងនៅសល់ ០,៥ យ័ន ក្រោយកូនស្រីលួចអស់ជាង៦ម៉ឺនដុល្លារទៅទិញហ្គេម