ប្រែសម្រួល : កញ្ញាដាលីស (ស្ត្រេតថែមស៍) ៖ ការប្រណាំងសេះអាយុកាលជាង ១៨០ ឆ្នាំនៅក្នុងប្រទេសសិង្ហបុរីនឹងឈានដល់ទីបញ្ចប់ដោយទីលានប្រណាំងតែមួយគត់របស់រដ្ឋបុរីនេះនឹងត្រូវបិទហើយត្រូវអភិវឌ្ឍឡើងវិញសម្រាប់លំនៅឋាន។
ក្លិបប្រណាំងសេះ Singapore Turf (STC)បាននិយាយថា កម្មវិធីប្រណាំងសេះចុងក្រោយគឺ Grand Singapore Gold Cup លើកទី ១០០ នឹងប្រព្រឹត្តទៅនៅខែតុលា ឆ្នាំក្រោយ។
ក្លិបនេះត្រូវបានបង្កើតឡើងក្នុងឆ្នាំ ១៨៤២ ដោយពាណិជ្ជករជនជាតិស្កុតឡែន និងអ្នកចូលចិត្តប្រណាំងសេះផ្សេងទៀត។ ទីលានប្រណាំងបច្ចុប្បន្ននៅក្រាន់ជី (Kranji) ត្រូវបានបើកក្នុងឆ្នាំ ២០០០ ដោយជំនួសទីលានចាស់ Bukit Timah។
លោក នីយ៉ាម ឆៀង ម៉េង (Niam Chiang Meng) ប្រធានក្លិប STC បាននិយាយនៅក្នុងសេចក្តីប្រកាសព័ត៌មានថា “យើងមានការសោកស្ដាយចំពោះការសម្រេចចិត្តរបស់រដ្ឋាភិបាលក្នុងការបិទក្លិប”។
លោកបានបន្ថែមថា “ក្នុងពេលជាមួយគ្នានេះ យើងយល់ពីតម្រូវការដីធ្លីរបស់សិង្ហបុរី រួមទាំងលំនៅឋាននិងការប្រើប្រាស់សក្តានុពលផ្សេងទៀត ដូចជាការលំហែ និងការកម្សាន្តជាដើម”។
STC បានទទួលស្គាល់ថាការចូលរួមទស្សនានៅទីលានប្រណាំងសេះបានថយចុះក្នុងរយៈពេលមួយទសវត្សរ៍កន្លងមកនេះ។
ក្លិបបាននិយាយថា ម្ចាស់សេះនិងគ្រូបង្វឹកនឹងត្រូវបានផ្តល់ការគាំទ្រសម្រាប់ការថែទាំនិងការនាំចេញសេះ។
យោងតាមប្រព័ន្ធផ្សព្វផ្សាយក្នុងស្រុក មានសេះប្រណាំងប្រហែល ៧០០ ក្បាលនៅក្លិបនេះ។
ដីនេះនឹងត្រូវប្រគល់ជូនរដ្ឋាភិបាលវិញក្នុងឆ្នាំ ២០២៧ ហើយផ្ទៃដីទំហំ ៣០០ ហិកតា នឹងត្រូវប្រើប្រាស់សម្រាប់លំនៅឋាន រួមទាំងលំនៅឋានសាធារណៈផងដែរ។
ក្រសួងអភិវឌ្ឍន៍ជាតិនិងក្រសួងហិរញ្ញវត្ថុបាននិយាយនៅក្នុងសេចក្តីថ្លែងការណ៍រួមថា “សិង្ហបុរីគឺជារដ្ឋបុរីដែលមានដីមានកម្រិត។ រដ្ឋាភិបាលបន្តពិនិត្យផែនការប្រើប្រាស់ដីរបស់ខ្លួនដើម្បីបំពេញតម្រូវការនាពេលបច្ចុប្បន្ន ខណៈធានាថាមានដីគ្រប់គ្រាន់សម្រាប់មនុស្សជំនាន់ក្រោយ”៕
ក្លិបប្រណាំងសេះ STC នឹងបិទដើម្បីយកដីសង់លំនៅឋាន