ដោយៈ ទេពកង្រី / កំពង់ឆ្នាំង: នៅថ្ងៃទី៧ ខែមិថុនា ឆ្នាំ២០២៣ នេះ លោកបណ្ឌិតសភា ចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជាអធិបតី បើកការដ្ឋាន ស្ថាបនាផ្លូវកៅស៊ូ ពីរជាន់ប្រភេទ DBST ចំនួន ១ខ្សែ ប្រវែង ១២ គីឡូម៉ែត្រ និង ៣៣០ ម៉ែត្រ ដែលមានទីតាំងតភ្ជាប់ពី ភូមិមានជ័យ ទៅដល់ភូមិកងមាស ក្នុងឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង ។
ក្នុងឱកាសបើកការដ្ឋាន ដែលប្រារព្ធធ្វើនៅបរិវេណវត្តធម្មសុវណ្ណ ហៅវត្តឈើត្រាច ភូមិឈើត្រាច ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំងនោះ ក៏មានវត្តមានចូលរួម ពីលោក យិន សាវ៉េន អភិបាលរងខេត្ត និងជាតំណាងលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោក ឡុង ឈុនឡៃ ប្រធានក្រុមប្រឹក្សាខេត្ត និងលោកស្រី កែវ ច័ន្ទម្នី តំណាងរាស្ត្រមណ្ឌលកំពង់ឆ្នាំង ព្រមទាំងប្រធានមន្ទីរ អង្គភាពពាក់ព័ន្ធ និងប្រជាពលរដ្ឋ ជាច្រើននាក់ ។
លោក យិន សាវ៉េន តំណាងលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឡើង អានបាយការណ៍ ស្តីពីស្ថានភាពនៃការរីកចំរើន នូវហេរចនាសម្ព័ន្ធ ប្រឡាយ នៅតាមបណ្តាឃុំ សង្កាត់ ក្រុង ស្រុក ក្នុងខេត្តកំពង់ឆ្នាំង រួមនឹងស្ថានភាពរស់នៅរបស់ ប្រជាពលរដ្ឋ មានការកើនឡើង ហើយផ្លូវមួយខ្សែនេះ សង្ឃឹមថា នៅពេលដែលបាន សាងសង់រួច ជួយសម្រួលដល់ការធ្វើដំណើរទៅមក របស់បងប្អូនប្រជាពលរដ្ឋ ពិសេសការដឹកកសិផល ងាយស្រួលទៅកាន់ទីផ្សារ និងទៅកាន់មន្ទីរពេទ្យ ហើយមួយផ្នែក ផ្លូវមួយខ្សែនេះ បានជួយសម្រួលដល់បងប្អូន នៅស្រុកជាប់គ្នា គឺស្រុកជលគីរី ផងដែរ។
នាឱកាសនោះ លោកបណ្ឌិតសភាចារ្យ អ៊ុករ៉ាប៊ុន បានមានប្រសាន៍ថាៈ នេះជាគម្រោង របស់រាជរដ្ឋាភិបាល ក្រោមជំនួយហិរញ្ញប្បទាន សហប្រតិបត្តិការ នៃគម្រោងពង្រឹង សមត្ថភាពផលិតភាពជនបទ ហៅកាត់ថា NRRPCP ដែលគាំទ្រដោយធនាគារវិនិយោគ ហេដ្ឋារចនាសម្ព័ន្ធអាស៊ី (Asian Infrastructure Investment BankAIIB) ។ ការសាងសង់ផ្លូវនេះ នឹងប្រើរយៈពេល ១២ ខែ ដោយគិតចាប់ពីថ្ងៃបើកការដ្ឋាននេះ រហូតដល់ដំណាច់ខែឧសភា ឆ្នាំ២០២៤ ដែលទទួលកិច្ចសន្យាសាងសង់ ដោយក្រុមហ៊ុន C.NO Construction & Investment Co., Ltd ក្នុងទឹកប្រាក់ចំនួន ២.២៥៤.៦៧៤,៩៥ ដុល្លារអាមេរិក។
លោកបណ្ឌិតសភាចារ្យ អ៊ុក រ៉ាប៊ុន បានមានប្រសាសន៍បន្តទៀតថាៈ ផ្លូវមួយខ្សែនេះ ជាចំណងដៃថ្មីបន្ថែមទៀតពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងចំណោមសមិទ្ធផលជាច្រើនទៀត នៅក្នុងទឹកដីនៃ ខេត្តកំពង់ឆ្នាំងនេះ ដើម្បីបន្តរក្សានិរន្តរភាពសេដ្ឋកិច្ចជនបទ ពិសេសស្តារជីវភាពរស់នៅ របស់ប្រជាជន នៅជនបទ ឱ្យកាន់តែល្អប្រសើរឡើង បន្ទាប់ពីកម្ពុជា បាននិងកំពុងងើប ឡើងវិញ ពីវិបត្តិជំងឺកូវីដ-១៩ និងបានលើកឡើងពីសារៈសំខាន់ នៃការអភិវឌ្ឍហេដ្ឋា រចនាសម្ព័ន្ធ និងគមនាំកន៍ដឹកជញ្ជូននៅជនបទ ដែលប្រៀបដូចជាសរសៃឈាម សេដ្ឋកិច្ច ដ៏សំខាន់ សម្រាប់ផ្សារភ្ជាប់សកម្មភាព ធុរកិច្ចផ្សេងៗ ក្នុងតំបន់ ជាមូលដ្ឋាន គ្រឺះជំរុញកំណើនប្រាក់ចំណូល របស់ប្រជាជននៅលជនបទ ។
ជាមួយនេះ លោកបណ្ឌិតសភាចារ្យ បានអំពាវនាវដល់ ប្រជាពលរដ្ឋទាំងអស់ ត្រៀមឯកសារពាក់ព័ន្ធ និងអញ្ជើញទៅបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ឲ្យបានគ្រប់ៗគ្នា ដើម្បីបំពេញកាតព្វកិច្ចជាពលរដ្ឋ និងបោះឆ្នោតជូនគណបក្ស ប្រជាជនកម្ពុជា ដើម្បីបន្តគាំទ្រសម្តចតេជោ ហ៊ុន សែន ជានាយករដ្ឋមន្រ្តី សម្រាប់នីតិកាលទី៧ នៃរដ្ឋសភា និងគាំទ្រលោកបណ្ឌិត ហ៊ុន ម៉ាណែត ជាបេក្ខភាព នាយករដ្ឋមន្រ្តី សម្រាប់ពេលអនាគត។
បើយោងតាមរបាយការណ៍របស់លោក ជ្រាយ ប៉ុម អគ្គនាយកបច្ចេកទេស នៃក្រសួងអភិវឌ្ឍន៍ជនបទ និងជានាយកគម្រោង បានបញ្ជាក់ថាៈ ផ្លូវដែលកំពុងបើក ការដ្ឋានសាងសង់ នាពេលនេះ មានប្រវែងសរុប ១២ គីឡូម៉ែត្រ ៣៣០ ម៉ែត្រ ក្នុងនោះ ប្រវែង ១០ គីឡូម៉ែត្រ និង ២៦ គីឡូម៉ែត្រ ជាប្រភេទផ្លូវក្រាលកៅស៊ូ ពីរជាន់ DBST និង ២គីឡូម៉ែត្រ ៧ម៉ែត្រ ជាប្រភេទផ្លូវបេតុង មានទទឹងប្រវែង ៨ ម៉ែត្រ សាងសង់លូប្រអប់ ២ កន្លែង លូមូលកាត់ទទឹងផ្លូវ ២៣ កន្លែង និងលូមូលកាត់ផ្លូវបំបែក ២០ កន្លែង បំពាក់ស្លាក សញ្ញាសុវត្ថិភាព តាមបណ្តោយខ្សែផ្លូវ ស្លាកសញ្ញាចរាចរណ៍ ចំនួន ៨៧ កន្លែង គំនូសតាមអ័ក្សផ្លូវ និងមានគំនូសសម្រាប់ថ្មើរជើងឆ្លងកាត់ ចំនួន ៣ កន្លែង។
របាយការណ៍ បានបន្តថាៈ គម្រោង NRRPCP នឹងស្ថាបនាផ្លូវប្រវែងសរុប ២៣៥ គ.ម តាមផែនការ ក្នុងនោះផ្លូវក្រាលកៅស៊ូ មានប្រវែង ១៨៥ គ.ម និងផ្លូវបេតុងប្រវែង ៥០ គ.ម សាងសង់ស្រះសហគមន៍ ចំនួន ១៥០ ស្រះ ក្នុងខេត្តគោលដៅទាំង៥ គឺខេត្តកំពង់ឆ្នាំង ខេត្តព្រៃវែង ខេត្តត្បូងឃ្មុំ ខេត្តប៉ៃលិន និងខេត្តកោះកុង ។ គម្រោងនេះ ចាប់ផ្ដើមអនុវត្តពីឆ្នាំ២០២១ ដល់ឆ្នាំ២០២៤ ដែលមានថវិកាសរុប ចំនួន ៦៧ លានដុល្លារអាមេរិក ដែលក្នុងនោះ ថវិកាចំនួន ៦០ លានដុល្លារអាមេរិក ជាហិរញ្ញប្បទាន របស់ធនាគា AIIB និង ៧,៥ លានដុល្លារអាមេរិក ជាថវិកាបដិភាគរបស់ រាជរដ្ឋាភិបាលកម្ពុជា៕ V / N
