ប្រែសម្រួលៈបំណង(ស្ត្រេតថែមស៍)៖ ហ្វីលីពីនកាលពីថ្ងៃអង្គារបានហាត់បង្ក្រាបការគំរាមភេរវកម្មនៅឯនាយឆ្នេរខេត្តបាតាអាន់(Bataan)នៅក្នុងសមុទ្រចិនខាងត្បូង ជាផ្នែកនៃសមយុទ្ធកងឆ្មាំសមុទ្រលើកដំបូងរបស់ខ្លួនជាមួយសម្ពន្ធមិត្តអាម៉េរិកនិងជប៉ុន ចំពេលមានភាពតានតឹងជាមួយចិន។
ទាហានកងឆ្មាំសមុទ្រហ្វីលីពីន(PCG )នៅលើនាវាល្បាតមួយ បានហាត់ស្ទាក់នាវាមួយទៀតដែលចាត់ទុកជានាវារបស់ក្រុមភេរវកម្មនៅក្នុងដែនទឹកអន្តរជាតិ។ក្រុមPCGបានឃាត់នាវាMV Destroyerដែលធ្វើហាក់ដូចជានាវានេះដឹកសព្វាវុធមហាប្រល័យ មិនអោយចូលកំពង់ផែរបស់ប្រទេស។
ការហ្វឹកហាត់នេះជាផ្នែកសមយុទ្ធកងឆ្មាំសមុទ្រហ្វីលីពីនលើកដំបូងជាមួយសម្ពន្ធមិត្តអាម៉េរិកនិងដៃគូជប៉ុន ចំពេលប្រទេសទាំងបីប្រឈមុខជាមួយចិននៅសមុទ្រចិនខាងត្បូងនិងសមុទ្រចិនខាងកើត។
នាវាមកពីកងឆ្មាំសមុទ្រអាម៉េរិក(USCG)កងឆ្មាំសមុទ្រជប៉ុន(JCG)បានស្ថិតក្នុងសភាពត្រៀមខ្លួន នៅពេលពួគេទទួលការទាក់ទងតាមវិទ្យុអំពីប្រតិបត្តិការមកពីកងឆ្មាំសមុទ្រហ្វីលីពីន។នៅប៉ុន្មាននាទីក្រោយមកគេឃើញបុគ្គលិកនៃកងPCGចាប់ខ្លួនមនុស្សបួននាក់នៃនាវាMV Destroyer។
នាវាអាម៉េរិកStrattonនិងនាវាAkitsushimaរបស់ជប៉ុនបានចូលរួមក្នុងប្រតិបត្តិការនេះភ្លាមក្រោយពីមនុស្សប្រាំនាក់លោតចេញពីចូលក្នុងទឹក ដែលជាការចាប់ផ្តើមលំហាត់ស្វែងរកនិងសង្គ្រោះត្រីភាគី។
បុគ្គលិកកងឆ្មាំសមុទ្រជិត៥០០នាក់មកពីប្រទេសទាំងបីបានចូលរួមក្នុងសមយុទ្ធនៅចម្ងាយ២៤គីឡូម៉ែត្រពីឆ្នេរខេត្តបាតាអាន់ជាតំបន់ក្នុងសមុទ្រចិនខាងត្បូងមួយក្នុងតំបន់សេដ្ឋកិច្ចពិសេសរបស់ហ្វីលីពីន៕