ដោយៈ តារារិទ្ធ / ភ្នំពេញ៖ នៅព្រឹកថ្ងៃទី៨ ខែមិថុនា ឆ្នាំ២០២៣ ស្អែក សម្តេចអគ្តមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងបន្តចុះជួបសំណេះសំណាល ជាមួយកម្មករ កម្មការិនី សរុបជិត ២ ម៉ឺននាក់ មកពីរោងចក្រ សហគ្រាស ចំនួន ៥ ដែលកំពុងដំណើរអាជីវកម្ម ក្នុងស្រុកកំពង់ត្រឡាច ខេត្តកំពង់ឆ្នាំង។ ជំនួបសំណេះ សំណាល នឹងធ្វើឡើង នៅភូមិចម្ការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង។
លោក អិុត សំហេង រដ្ឋមន្ត្រីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថាៈ សម្រាប់ជំនួបនៅថ្ងៃស្អែក មានកម្មករកម្មការិនី ចូលរួមសរុបចំនួន ១៨.០៩៥ នាក់ មកពីរោងចក្រ សហគ្រាស ចំនួន៥ ដែលកំពុងដំណើរការអាជីវកម្ម ក្នុងស្រុកកំពង់ត្រឡាច ខេត្តកំពង់ឆ្នាំង។
បើតាមលោករដ្ឋមន្ត្រី បានឱ្យដឹងថាៈ រោងចក្រ សហគ្រាសទាំង៥ ជាប្រភេទរោងចក្រកាត់ដេរចំនួន៣, ផលិតផលធ្វើដំណើរ និងកាបូបចំនួន១ និងដេរស្បែកជើង ចំនួន១ ។ ផលិតផលរបស់រោងចក្រទាំងនេះ គឺនាំចេញទៅទីផ្សារអន្តរជាតិ ជាពិសេសសហគមន៍អឺរ៉ុប សហរដ្ឋអាមេរិក ប្រទេសកាណាដា ប្រទេសជប៉ុន ។ល។
នៅឆ្នាំ២០២៣ នេះ ខេត្តកំពង់ឆ្នាំង មានរោងចក្រ សហគ្រាស ចំនួន ១៧៣ មាន កម្មករនិយោជិតជាង ៥ ម៉ឺននាក់។ ក្នុងនោះរោងចក្រ សហគ្រាស វិស័យកាត់ដេរ ចំនួន២០ មានកម្មករ និយោជិតសរុបជាង ៤៧.០០០ នាក់ និងជាខេត្តទី៨ ដែលមានការអភិវឌ្ឍរោងចក្រ សហគ្រាសច្រើន។
សូមរំលឹកថា កាលដំណើរចុះជួបកម្មករ កម្មការិនីជុំទី១ បានចាប់តាំងពីថ្ងៃអាទិត្យ ទី២០ ខែសីហា ឆ្នាំ២០១៧ ដល់ថ្ងៃទី១ ខែឧសភា ឆ្នាំ២០១៩ សម្តេចតេជោ បានជួបសំណេះសំណាលជាមួយកម្មករ និយោជិត ចំនួន ៧៧ លើក ដែលមានកម្មករ និយោជិតចំនួនប្រមាណ ១ លាននាក់។
ជំនួបក្នុងជុំទី១ សម្តេចតេជោ នាយករដ្ឋមន្ត្រី បានផ្ដល់អនុសាសន៍គន្លឹះ ១០ ចំណុច ដែលបានសម្រួលដល់បរិយាកាសវិនិយោគ, ផ្តល់នូវការលើកកម្ពស់សិទ្ធិអត្ថប្រយោជន៍ និងកិច្ចគាំពារសង្គម យ៉ាងច្រើន ដល់បងប្អូនកម្មករ និយោជិត ហើយដែលក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងសហការជាមួយក្រសួង ស្ថាប័ន អនុវត្តបានជោគជ័យ។
សម្តេចតេជោ ហ៊ុន សែន ក៏បានដាក់ចេញកម្មវិធីចុះជួបកម្មករ កម្មការិនី ជុំទី២ ដោយចាប់ផ្តើមនៅថ្ងៃទី២២ ខែឧសភា ឆ្នាំ២០២៣ កន្លងទៅនេះ។ ជំនួបថ្ងៃស្អែកគឺជាជំនួបលើកទី៦ ហើយ សម្រាប់ជុំទី២នេះ។ ជំនួប ៦លើកនេះ មានកម្មករ និយោជិត សរុបប្រមាណ ១១៣.០០០ នាក់។ សម្តេចតេជោ គ្រោងជួបចំនួន ១៣ លើកទៀត ដែលនឹងជួបកម្មករ និយោជិត សរុបប្រមាណជាង ២២ ម៉ឺននាក់ទៀត។
សម្ដេចតេជោបានប្រកាសអនុវត្តកម្មវិធីចាស់ សកម្មភាពថ្មី និងបន្ថែមវិសាលភាពដល់កម្មការិនី ដែលមានផ្ទៃពោះ និងកុមារអាយុ២ឆ្នាំ៕ V / N
