ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីការបរទេសអ៊ុយក្រែន លោក ឌីមីត្រូ គូឡេបា (Dmytro Kuleba) បាននិយាយកាលពីថ្ងៃពុធទី៧មិថុនាថាការពិភាក្សាអំពីការដោះស្រាយជម្លោះជាមួយរុស្ស៊ីមិនអាចចាប់ផ្តើមដោយគ្រាន់តែបញ្ឈប់អរិភាពនោះទេ។
លោកបានថ្លែងក្នុងសន្និសីទសារព័ត៌មានតាមអនឡាញដែលផ្តោតទៅលើអ្នកកាសែតអាហ្វ្រិក ក្រោយដំណើរទស្សនកិច្ចទៅកាន់បណ្តាប្រទេសក្នុងទ្វីបអាហ្វ្រិកថា “ប្រសិនបើនរណាម្នាក់គិតថាពួកគេគួរបញ្ឈប់ជម្លោះហើយរកមើលវិធីដោះស្រាយនោះ ពួកគេមិនយល់ទេ”។
លោកបាននិយាយថា ការពិគ្រោះយោបល់និងការប៉ុនប៉ងជាង ១០០ ជុំនៅឯបទឈប់បាញ់ចាប់តាំងពីការកាត់យកគ្រីម៉េរបស់អ៊ុយក្រែនពីសំណាក់រុស្ស៊ីក្នុងឆ្នាំ ២០១៤បានត្រឹមនាំទៅដល់ការឈ្លានពានពេញទំហឹងលើអ៊ុយក្រែនក្នុងខែកុម្ភៈឆ្នាំ ២០២២ ប៉ុណ្ណោះ។
អ្នកនាំពាក្យរបស់ប្រធានាធិបតីអាហ្វ្រិកខាងត្បូង លោក ស៊ីរីល រ៉ាម៉ាហ្វូសា (Cyril Ramaphosa) បានប្រាប់ទីភ្នាក់ងារសារព័ត៌មានរ៉យទ័រកាលពីខែមុនថាគណៈប្រតិភូនៃប្រមុខរដ្ឋអាហ្វ្រិកមួយរំពឹងធ្វើទស្សនកិច្ចនៅអ៊ុយក្រែននិងរុស្ស៊ីក្នុងប៉ុន្មានថ្ងៃខាងមុខ ដោយសង្ឃឹមបញ្ចុះបញ្ចូលពួកគេឱ្យបញ្ឈប់អរិភាព។
លោកបាននិយាយកាលពីថ្ងៃពុធថាមិនទាន់កំណត់កាលបរិច្ឆេទសម្រាប់បេសកកម្មនេះនៅឡើយទេ។
សំណើបែបនេះមានន័យថា ទាហានរុស្ស៊ីនឹងនៅតែបន្តស្ថិតនៅលើទឹកដីអ៊ុយក្រែនដដែល បើទោះជាការចរចាសន្តិភាពចាប់ផ្តើមក៏ដោយ។ កន្លងមក អ៊ុយក្រែនបាននិយាយថាកងកម្លាំងរុស្ស៊ីគួរតែដកចេញសិន មុនពេលការចរចាបែបនេះអាចចាប់ផ្តើម ខណៈរដ្ឋាភិបាលក្រុងមូស្គូចង់ឱ្យរដ្ឋាភិបាលក្រុងគៀវទទួលស្គាល់អធិបតេយ្យភាពរុស្ស៊ីលើតំបន់គ្រីម៉េ ជាបុរេលក្ខខណ្ឌសម្រាប់ការចរចា។
ប្រធានាធិបតីសេណេហ្គាល់ លោក ម៉ាកគី សាល (Macky Sall) ជាប្រធានសហភាពអាហ្វ្រិកកាលពីឆ្នាំមុន បានដឹកនាំគំនិតផ្តួចផ្តើមនេះ។ ប្រធានសហភាពអាហ្វ្រិកបច្ចុប្បន្ន លោក អូតមែន ហ្គាហ្សាលី (Othman Ghazali) ប្រធានាធិបតីរបស់ប្រទេសកោះកូម៉ូរ៉ូស ត្រូវបានបន្ថែមទៅក្នុងគណៈប្រតិភូនេះនាពេលថ្មីៗនេះ។
វាក៏រួមបញ្ចូលផងដែរនូវប្រធានាធិបតី អាប់ឌែល ហ្វាតតា អែលស៊ីស៊ី (Abdel Fattah el-Sisi) នៃប្រទេសអេហ្ស៊ីប និង លោក ហាកាអ៊ីនដេ ហ៊ីឈីឡេម៉ា (Hakainde Hichilema) នៃប្រទេសសំប៊ី ដែលទាំងពីរបានបោះឆ្នោតគាំទ្រសេចក្តីសម្រេចចិត្តអ.ស.ប និង លោក ដេនីស សាសស៊ូ អិនក្វេសសូ (Denis Sassou Nguesso) ប្រធានាធិបតីនៃសាធារណរដ្ឋកុងហ្គោ និងលោក យ៉ូវើរី មូសេវេនី (Yoweri Museveni) នៃប្រទេសអ៊ូហ្គង់ដា បានបោះអនុប្បវាទទាំងពីរក៏ដូចជាអាហ្វ្រិកខាងត្បូងផងដែរ។
លោកគូឡេបាកំពុងបើកយុទ្ធនាការបញ្ចុះបញ្ចូលដ៏ទាក់ទាញនៅទ្វីបអាហ្វ្រិកដើម្បីទទួលបានការគាំទ្រនៅក្នុងទ្វីបមួយ ដែលប្រទេសចំនួន ៣០ ក្នុងចំណោមប្រទេសចំនួន ៥៤ នៅអាហ្វ្រិកបានបោះឆ្នោតគាំទ្រសេចក្តីសម្រេចចិត្តរបស់អ.ស.ប ដែលថ្កោលទោសការឈ្លានពានរបស់រុស្ស៊ី។
លោកគូឡេបាបាននិយាយថា “អ្វីដែលយើងឃើញនៅក្នុងទំនាក់ទំនងរបស់យើងជាមួយទ្វីបនេះនាពេលនេះគឺសមនឹងហៅថាការរស់ឡើងវិញនៃទំនាក់ទំនងអ៊ុយក្រែន-អាហ្វ្រិក”។
លោកមិនមានព័ត៌មានលម្អិតអំពីអ្វីដែលបេសកកម្មសន្តិភាពអាហ្វ្រិកនឹងបង្ហាញនោះទេ ប៉ុន្តែលោកបានស្វាគមន៍វា។
លោកបានបន្តថា “យើងកំពុងទន្ទឹងរង់ចាំការធ្វើជាម្ចាស់ផ្ទះទទួលប្រធានាធិបតីទាំងនេះនៅទីក្រុងគៀវ”៕
រដ្ឋមន្ត្រីការបរទេសអ៊ុយក្រែន លោក ឌីមីត្រូ គូឡេបា