ប្រែសម្រួល : កញ្ញាដាលីស (ដេល្លីម៉េល) ៖ លីអូនែល ម៉េសស៊ី កាលពីថ្ងៃពុធបានប្រកាសថាគាត់នឹងចុះហត្ថលេខាចូលរួមជាមួយក្លិប Inter Miami នៃក្របខណ្ឌ Major League Soccer ដោយជ្រើសរើសសហរដ្ឋអាម៉េរិកជាទិសដៅបន្ទាប់របស់គាត់ជាជាងជួបជុំគ្នាឡើងវិញជាមួយ Barcelona ឬ ធ្វើកិច្ចព្រមព្រៀងដ៏ថ្លៃដើម្បីលេងនៅអារ៉ាប៊ីសាអូឌីត។
ខ្សែប្រយុទ្ធអាហ្សង់ទីនវ័យ ៣៥ ឆ្នាំរូបនេះបានចំណាយពេលពីររដូវកាលចុងក្រោយនៅក្លិប Paris Saint-Germain ដោយលេងការប្រកួតចុងក្រោយរបស់គាត់សម្រាប់ក្លិបកាលពីថ្ងៃសៅរ៍បន្ទាប់ពីផ្ទេរពី Barcelona ក្នុងឆ្នាំ ២០២១ ជាកន្លែងដែលគាត់បានចំណាយពេលភាគច្រើននៃអាជីពរបស់គាត់។
ម៉េសស៊ីបាននិយាយថាគាត់មិនចង់រង់ចាំ Barcelona ស្វែងរករូបមន្តដើម្បីចុះហត្ថលេខាទិញគាត់នោះទេ បើផ្អែកលើស្ថានភាពហិរញ្ញវត្ថុរបស់ពួកគេ។ ពួកគេមិនអាចរក្សាគាត់បានទេ មុនពេលគាត់ផ្ទេរទៅ PSG ដែលនាំឱ្យមានការចាកចេញទាំងទឹកភ្នែក។
ក្របខណ្ឌ MLS និង Inter Miami បានបញ្ជាក់ព័ត៌មាននេះនៅលើបណ្តាញសង្គម ទោះបីជាលីកអាម៉េរិកកត់សម្គាល់ថា “នៅសល់ការងារដទៃទៀតត្រូវធ្វើដើម្បីបង្ហើយកិច្ចព្រមព្រៀងផ្លូវការក៏ដោយ”។
ម៉េសស៊ីបានប្រាប់កាសែតអេស្ប៉ាញ Diario Sport និង Mundo Deportivo ថា “ខ្ញុំបានសម្រេចចិត្តថាខ្ញុំនឹងទៅក្លិប Miami ខ្ញុំមិនទាន់សម្រេច (កិច្ចព្រមព្រៀង) ១០០% ឬប្រហែលជាមានអ្វីនៅសល់ត្រូវធ្វើ ប៉ុន្តែយើងបានសម្រេចចិត្តបន្តវិថីរបស់យើងនៅទីនោះ”។
“(ខ្ញុំបានសម្រេចចិត្ត) ចាកចេញពីអឺរ៉ុប…បន្ទាប់ពីឈ្នះវើលខាប់ហើយមិនអាចត្រឡប់ទៅ Barca វិញបាន វាដល់ពេលដែលត្រូវទៅក្របខណ្ឌ MLS ដើម្បីរស់នៅជាមួយបាល់ទាត់តាមរបៀបផ្សេង ហើយរីករាយនឹងជីវិតប្រចាំថ្ងៃរបស់ខ្ញុំបន្ថែមទៀត”។
“ជាក់ស្តែងគឺជាមួយនឹងទំនួលខុសត្រូវដូចគ្នានិងបំណងប្រាថ្នាចង់ឈ្នះ ហើយធ្វើអ្វីៗឱ្យបានល្អ ប៉ុន្តែមានភាពស្ងប់ស្ងាត់ជាងមុន”៕
ម៉េសស៊ីយល់ព្រមផ្ទេរទៅក្លិប Inter Miami របស់អាម៉េរិក