ដោយ៖ រ៉ាម៉ន / ភ្នំពេញ៖ ប្រធានក្រុមប្រឹក្សារាជធានីភ្នំពេញ លោក ម៉ប់ សារិន បានថ្លែងនូវការកោតសរសើរចំពោះ រដ្ឋបាលរាជធានីភ្នំពេញ និងអាជ្ញាធរពាក់ព័ន្ធ ដែលបានសហការជាមួយថ្នាក់ជាតិ ក្នុងការខិតខំបំពេញការងារ គ្រប់មុខសញ្ញា ធ្វើឱ្យរាជធានីភ្នំពេញ មានសោភ័ណស្រស់បំព្រង និងការពារបាននូវសន្តិសុខ សណ្តាប់ធ្នាប់សាធារណៈ បានយ៉ាងល្អ ក្នុងការរៀបចំប្រារព្ធពិធីបិទស៊ីហ្គេមលើកទី៣២ ដែលបានធ្វើឱ្យកិត្យានុភាព នៃព្រះរាជាណាចក្រកម្ពុជា ល្បីរន្ទឺលើពិភពលោក។
ការថ្លែងការកោតសរសើរបែបនេះ ធ្វើឡើងនាព្រឹកថ្ងៃទី៨ ខែមិថុនា ឆ្នាំ២០២៣ នេះ ក្នុងឱកាសដែលលោកនិងលោក កើត ឆែ អភិបាលរងរាជធានីភ្នំពេញ តំណាងឱ្យលោក ឃួង ស្រេង អភិបាលរាជធានីភ្នំពេញ អញ្ជើញជាអធិបតីក្នុងកិច្ចប្រជុំសាមញ្ញលើកទី៤៩ របស់ក្រុមប្រឹក្សារាជធានីភ្នំពេញ អាណត្តិទី៣ នៅសាលារាជធានីភ្នំពេញ។
លោក ម៉ប់ សារិន បានមានប្រសាសន៍លើកឡើងថា៖ រដ្ឋបាលរាជធានីភ្នំពេញ និងអាជ្ញាធរពាក់ព័ន្ធ បានសហការយ៉ាងល្អជាមួយថ្នាក់ជាតិ ក្នុងការខិតខំបំពេញការងារ គ្រប់មុខសញ្ញា ដែលបានធ្វើឱ្យរាជធានីភ្នំពេញ មានសោភ័ណស្រស់បំព្រង និងការពារ បាននូវសន្តិសុខ សណ្តាប់ធ្នាប់សាធារណៈ ក្នុងការរៀបចំប្រារព្ធពិធីបិទស៊ីហ្គេមលើកទី ៣២ ក្រោមពាក្យស្លោក «កីឡារស់ក្នុងសន្តិភាព» ដែលកម្ពុជាម្ចាស់ផ្ទះ បន្ទាប់ពីបាន រង់ចាំអស់រយៈពេល ៦៤ឆ្នាំ បានបញ្ចប់ដោយជោគជ័យត្រចេះត្រចង់ និងទទួលបាន ចំណាត់ថ្នាក់លេខ៤ ដោយទទួលបានមេដាយ ២៨២គ្រឿង ក្នុងនោះ មេដាយមាស ៨១គ្រឿង, មេដាយប្រាក់ ៧៤គ្រឿង និងមេដាយ សំរិទ្ធ ១២៧គ្រឿង ដែលមិនធ្លាប់ មាន ក្នុងប្រវត្តិសាស្ត្រកីឡា ពីមុនមក។
លោក ម៉ប់ សារិន បានបន្តថា៖ តាមរយៈព្រឹត្តិការណ៍ ដ៏អស្ចារ្យនេះ ធ្វើឱ្យប្រជាជន មហាជនជាតិ អន្តរជាតិ ស្ងើចសរសើរ និងកាន់តែស្គាល់ពី អត្តសញ្ញាណកម្ពុជា បានច្បាស់ ជាពិសេស បានក្លាយជាកម្លាំងចលករថ្មីមួយទៀត គាស់ជំរុញសេដ្ឋកិច្ច កម្ពុជា ឱ្យងើបឡើង ថែមមួយកម្រិតទៀត។ ក្នុងនោះ ប្រជាពលរដ្ឋនៅទូទាំងប្រទេស និងបណ្តាប្រទេសអាស៊ាន ស្វាគមន៍ អបអរសាទរចំពោះ ការយកចិត្តទុកដាក់ខ្ពស់ របស់រាជរដ្ឋាភិបាលកម្ពុជា ដែលបានបើកទូលាយ មិនលក់សំបុត្រឱ្យប្រជាជន មិនលក់សំបុត្រឱ្យអ្នកគាំទ្រ មិនលក់សិទ្ធិផ្សព្វផ្សាយទៅបរទេស មិនយកប្រាក់ដែល ជាកាតព្វកិច្ចមានចែងក្នុងលក្ខន្តិកៈអាស៊ានហ្គេម ហើយបានចំណាយថវិកាជាច្រើន សម្រាប់ការស្នាក់នៅរបស់កីឡាករ ដែលធ្វើឱ្យកិត្យានុភាព នៃព្រះរាជាណាចក្រកម្ពុជា ល្បីរន្ទឺលើពិភពលោក។
បន្ថែមពីនេះ លោក ម៉ប់ សារិន ក៏បានថ្លែងនូវការកោតសរសើរ ចំពោះសមត្ថកិច្ច ពាក់ព័ន្ធផងដែរ ដែលបានរួមគ្នាធ្វើឱ្យបទល្មើសព្រហ្មទណ្ឌ នៅក្នុងខែឧសភានេះ បានថយចុះ ៤លើក (៤១លើក/៤៥លើក) ជាពិសេសបានស្រាវជ្រាវ បង្ក្រាបករណី ប្លន់អាជីវករលក់មាស នៅផ្សារ ស្ទឹងមានជ័យ ធ្វើឱ្យអាជីវករ ក្នុងរាជធានីភ្នំពេញ មានភាពកក់ក្ដៅ។
លោក កើត ឆែ បានមានប្រសាសន៍លើកឡើងថា៖ ការកោតសរសើររបស់ក្រុមប្រឹក្សា រាជធានីភ្នំពេញ ខាងលើក គឺជាការលើកទឹកចិត្ត ដើម្បីឱ្យអាជ្ញាធររាជធានីភ្នំពេញ អនុវត្តការងារទាំងនេះ ឱ្យកាន់តែល្អប្រសើរថែមទៀត ហើយចំពោះការណែនាំរបស់ ក្រុមប្រឹក្សារាជធានី ឱ្យមានការកែសម្រួលរបាយការណ៍ របស់រដ្ឋបាលរាជធានី ក៏ជាចំណុចល្អ និងអរគុណផងដែរ ដើម្បីឱ្យរដ្ឋបាលរាជធានីភ្នំពេញ បានបំពេញចំណុច ខ្វះខាត ក្នុងរបាយការណ៍៕ V / N
