ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតី ចូ បៃដិន និងនាយករដ្ឋមន្ត្រីអង់គ្លេស រីស៊ី ស៊ូណាក់កាលពីថ្ងៃព្រហស្បតិ៍បានរំលឹកឡើងវិញនូវការប្តេជ្ញាចិត្តរបស់អ្នកទាំងពីរដើម្បីជួយអ៊ុយក្រែនទប់ទល់ការឈ្លានពានជាបន្តរបស់រុស្ស៊ី ខណៈយល់ព្រមបង្កើនកិច្ចសហប្រតិបត្តិការលើបញ្ហាប្រឈមខាងសេដ្ឋកិច្ចរបស់ពួកគាត់ទាក់ទងនឹងបញ្ញាសិប្បនិម្មិត (AI) ថាមពលស្អាត និងរ៉ែសំខាន់ៗ។
មេដឹកនាំទាំងពីរបាននិយាយថា កិច្ចព្រមព្រៀង “ប្រភេទបែបនេះជាលើកដំបូង” ដែលពួកគាត់ហៅថា “សេចក្តីប្រកាសអាត្លង់ទិក”នឹងបម្រើជាក្របខ័ណ្ឌសម្រាប់ប្រទេសទាំងពីរលើការអភិវឌ្ឍបច្ចេកវិជ្ជាដែលកំពុងរីកចម្រើន ការការពារបច្ចេកវិជ្ជាដែលមានសារៈសំខាន់ចំពោះសន្តិសុខជាតិ និង បញ្ហាសន្តិសុខសេដ្ឋកិច្ចផ្សេងទៀត។
លោកបៃដិនបាននិយាយខណៈមេដឹកនាំទាំងពីរចាប់ផ្តើមកិច្ចពិភាក្សានៅក្នុងការិយាល័យពងក្រពើ យ៉ាងដូច្នេះថា “យើងនឹងដាក់តម្លៃរបស់យើងនៅខាងមុខនិងកណ្តាល”។ក្រោយមកគាត់បានបន្ថែមនៅក្នុងសន្និសីទសារព័ត៌មានរួមគ្នាថា កិច្ចព្រមព្រៀងនេះនឹងជួយប្រទេសទាំងពីរ “សម្របខ្លួននិងធ្វើឱ្យប្រសើរឡើងនូវភាពជាដៃគូរបស់យើងដើម្បីធានាថាប្រទេសរបស់យើងនៅតែមានប្រៀបឈ្នះនៅលើពិភពលោកដែលមានការផ្លាស់ប្តូរយ៉ាងឆាប់រហ័ស”។
ជាផ្នែកនៃសេចក្តីប្រកាសដែលបានប្រកាសកាលពីថ្ងៃព្រហស្បតិ៍ ភាគីទាំងពីរនឹងចាប់ផ្តើមការចរចាលើការប្រើប្រាស់រ៉ែពីចក្រភពអង់គ្លេសដែលមានសារៈសំខាន់ក្នុងការផលិតរថយន្តអគ្គិសនីដែលមានសិទ្ធិស្របច្បាប់ដើម្បីទទួលបានឥណទានពន្ធនៅសហរដ្ឋអាម៉េរិក។ រដ្ឋបាលបៃដិនក៏បានបើកកិច្ចពិភាក្សាជាមួយសហភាពអឺរ៉ុបនិងបានចុះហត្ថលេខាលើកិច្ចព្រមព្រៀងជាមួយជប៉ុនផងដែរ ដែលអនុញ្ញាតឱ្យវត្ថុធាតុដើមសំខាន់ៗមួយចំនួនសម្រាប់រថយន្ត EVត្រូវបានចាត់ទុកដូចជាមានប្រភពនៅក្នុងសហរដ្ឋអាម៉េរិក។
សម្ពន្ធមិត្តបានលើកឡើងពីការព្រួយបារម្ភអំពីការលើកទឹកចិត្តនៅក្នុងច្បាប់កាត់បន្ថយអតិផរណាដែលអនុគ្រោះដល់ឧស្សាហកម្មរថយន្តនៅអាម៉េរិកខាងជើង។ បញ្ញត្តិច្បាប់នេះ ដែលជាជ័យជម្នះគោលនយោបាយដ៏សំខាន់មួយរបស់លោកបៃដិន បានវិនិយោគប្រមាណ ៣៧៥ ពាន់លានដុល្លារ ដើម្បីផ្លាស់ប្តូរសហរដ្ឋអាម៉េរិកទៅរករថយន្តដែលមានថាមពលស្អាតជាងមុន និង ប្រភពថាមពលនានាផ្សេងទៀត។
លោកបៃដិននិងលោកស៊ូណាក់មានជំនួបទល់មុខគ្នាចំនួនបួនដងរួចមកហើយ ចាប់តាំងពីលោកស៊ូណាក់ក្លាយជានាយករដ្ឋមន្ត្រីក្នុងខែតុលា ប៉ុន្តែកិច្ចពិភាក្សានៅទីក្រុងវ៉ាស៊ីនតោនបានផ្តល់ឱកាសដល់មេដឹកនាំទាំងពីរសម្រាប់ទំនាក់ទំនងប្រកបដោយនិរន្តរភាពបំផុតមិនធ្លាប់មានរហូតមកទល់បច្ចុប្បន្ន៕
លោកស៊ូណាក់ (ឆ្វេង) និងលោកបៃដិនពិភាក្សាគ្នាក្នុងការិយាល័យពងក្រពើកាលពីថ្ងៃព្រហស្បតិ៍