ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីការបរទេសអាម៉េរិក លោក អានថូនី ប្លីងកិន បាននិយាយថាអារ៉ាប៊ីសាអូឌីតមិនត្រូវបានបង្ខំឱ្យជ្រើសរើសរវាងរដ្ឋាភិបាលក្រុងវ៉ាស៊ីនតោននិងប៉េកាំងនោះទេ ដោយបញ្ចេញសំឡេងបែបផ្សះផ្សានៅក្នុងទីក្រុងរីយ៉ាដ បន្ទាប់ពីភាពតានតឹងជាមួយសម្ពន្ធមិត្តចាស់វស្សាមួយនេះ។
លោកប្លីងកិន ដែលបង្ហាញខ្លួនជាមួយសមភាគីអារ៉ាប៊ីសាអូឌីត គឺព្រះអង្គម្ចាស់ ហ្វៃសាល ប៊ីន ហ្វាហាន (Faisal bin Farhan) នៅចុងបញ្ចប់នៃដំណើរទស្សនកិច្ចរយៈពេលបីថ្ងៃនោះ បានលើកឡើងថា ទំនាក់ទំនងដ៏កក់ក្តៅរបស់អារ៉ាប៊ីសាអូឌីតជាមួយចិនមិនមែនជាបញ្ហាសម្រាប់សហរដ្ឋអាម៉េរិកទេ។
លោកបានបន្ថែមថា សហរដ្ឋអាម៉េរិកគាំទ្រដល់គោលដៅមនុស្សធម៌ ដែលព្រះអង្គម្ចាស់ហ្វៃសាល បានមានបន្ទូលថានៅពីក្រោយការដកចេញនូវការព្យួរបេក្ខភាពស៊ីរីពីសម្ពន្ធអារ៉ាប់ ជាចំណាត់ការមួយត្រូវបានថ្កោលទោសដោយរដ្ឋាភិបាលក្រុងវ៉ាស៊ីនតោន។
លោកប្លីងកិនបានប្រាប់ប្រព័ន្ធផ្សព្វផ្សាយបន្ទាប់ពីកិច្ចប្រជុំនៃក្រុមចម្រុះសកលដែលកំពុងប្រយុទ្ធប្រឆាំងនឹងក្រុមរដ្ឋអីស្លាមថា “យើង…ច្បាស់ណាស់ថាយើងមិនស្នើឱ្យនរណាម្នាក់ជ្រើសរើសរវាងសហរដ្ឋអាម៉េរិកនិងចិនទេ”។
“យើងគ្រាន់តែព្យាយាមបង្ហាញពីអត្ថប្រយោជន៍នៃភាពជាដៃគូរបស់យើងនិងរបៀបវារៈបញ្ជាក់ដែលយើងនាំយកមកប៉ុណ្ណោះ”។
ចិនបានបង្ហាញឥទ្ធិពលរបស់ខ្លួននៅក្នុងតំបន់មជ្ឈិមបូព៌ា នៅពេលប្រទេសនេះជួយសម្របសម្រួលទំនាក់ទំនងដ៏គួរឱ្យភ្ញាក់ផ្អើលរវាងអារ៉ាប៊ីសាអូឌីតនិងអ៊ីរ៉ង់ក្នុងខែមីនា ពោលគឺប្រាំពីរឆ្នាំបន្ទាប់ពីប្រទេសគីឡូធ្ងន់ទាំងពីរកាត់ផ្តាច់ទំនាក់ទំនង។
ការពង្រឹងទំនាក់ទំនងរបស់រដ្ឋាភិបាលក្រុងរីយ៉ាដជាមួយប៉េកាំងបានធ្វើឡើងបន្ទាប់ពីភាពតានតឹងនាពេលថ្មីៗនេះរវាងអារ៉ាប៊ីសាអូឌីតនិងសហរដ្ឋអាម៉េរិក ដែលជាអ្នកធានាការពារសន្តិសុខរាប់ទសវត្សរ៍របស់ខ្លួន ដែលភាគច្រើនគឺផ្តោតលើបញ្ហាសិទ្ធិមនុស្សនិងតម្លៃប្រេង៕
លោកប្លីងកិនថាមិនបានបង្ខំអារ៉ាប៊ីសាអូឌីតជ្រើសរើសរវាងអាម៉េរិកនិងចិនទេ