ប្រែសម្រួល : កញ្ញាដាលីស (ដេល្លីម៉េល) ៖ ត្បូងទទឹមមួយគ្រាប់ត្រូវបានលក់នៅឯក្រុមហ៊ុនដេញថ្លៃ សូសេប៊ីស(Sotheby’s) ក្នុងទីក្រុងញូវយ៉កកាលពីថ្ងៃព្រហស្បតិ៍ទី៨មិថុនាក្នុងតម្លៃ ៣៤,៨ លានដុល្លារ ដោយបង្កើតឯតទគ្គកម្មថ្មីនៅឯការដេញថ្លៃសម្រាប់ត្បូងដ៏មានតម្លៃនេះ។
ត្បូង ៥៥,២២ ការ៉ាត់ ដែលមានឈ្មោះថាអ៊ីត្រេឡា ដឹ ហ្វ៊ូរ៉ា( Estrela de Fura) គឺជាត្បូងទទឹមដ៏ធំបំផុតមិនធ្លាប់មានពីមុនមក។
វាត្រូវបានកាត់ចេញពីថ្មរដិបរដុបទម្ងន់ ១០១ ការ៉ាត់ ដែលត្រូវបានរកឃើញកាលពីខែកក្កដាឆ្នាំមុននៅឯអណ្តូងរ៉ែត្បូងទទឹមម៉ុនតេពឺស (Montepeuz) ក្នុងប្រទេសម៉ូសំប៊ិកដែលដំណើរការដោយក្រុមហ៊ុន Fura Gems ។
ត្បូងនេះគឺជាតារាទាក់ទាញប្រចាំការលក់ដេញថ្លៃនេះ ដែលផ្តល់ជូននូវគ្រឿងអលង្ការចំនួន ១០០ មុខ។
ផ្តល់ជូនដំបូងក្នុងតម្លៃចាប់ផ្តើម ២១ លានដុល្លារ វាបានលក់ក្នុងតម្លៃ ៣០ លានដុល្លារ បូកនឹងថ្លៃសេវា និង កម្រៃជើងសារឱ្យទៅអ្នកទិញតាមទូរស័ព្ទអនាមិក។
ឯតទគ្គកម្មពីមុនគឺជារបស់ត្បូងទទឹមភូមាទម្ងន់ ២៥,៥៩ ការ៉ាត់ ដែលបានលក់ក្នុងតម្លៃសរុប ៣០,៣៣ លានដុល្លារដោយក្រុមហ៊ុន Sotheby’s នៅទីក្រុងហ្សឺណែវក្នុងឆ្នាំ ២០១៥៕
ត្បូងទទឹម Estrela de Fura លក់បាន ៣៤,៨ លានដុល្លារនៅឯក្រុមហ៊ុនដេញថ្លៃ Sotheby’s ក្នុងទីក្រុងញូវយ៉កកាលពីថ្ងៃព្រហស្បតិ៍
