ប្រែសម្រួលៈបំណង(VNExpress)៖ នាយករដ្ឋមន្ត្រីវៀតណាមលោក ផាំ មិញ ជិញ(Pham Minh Chinh)បានអំពាវនាវអោយសាធារណជនសន្សំសំចៃចរន្តអគ្គិសនី ដោយបើកម៉ាស៊ីនត្រជាក់នៅពេលតែចាំបាច់ប៉ុណ្ណោះនិងកំណត់អង្សាវាត្រឹម២៦អង្សាសេឡើង។
នៅក្នុងសេចក្តីណែនាំចេញកាលពីថ្ងៃព្រហស្បតិ៍អំពីការសន្សំសំចៃចរន្តអគ្គិសនីនេះ លោកបានព្រមានថា ស្ថានភាពអគ្គិសនីកំពុងជួបការប្រឈមនៅពេលឥឡូវ ហើយនឹងនៅតែដូច្នេះនៅប៉ុន្មានឆ្នាំខាងមុខដោយសារតំរូវការកើនឡើង។
សារាចរបាននិយាយថា«ការប្រើប្រាស់ចរន្តអគ្គិសនីដោយប្រសិទ្ធភាពនិងអោយផលសេដ្ឋកិច្ច ជាដំណោះស្រាយដើម្បីធានាសន្តិសុខថាមពលអគ្គិសនី។ប្រជាជនគួរប្រើគ្រឿងបរិក្ខាអគ្គិសនីប្រភេទស៊ីភ្លើងតិច បិទឧបករណ៍អគ្គិសនីនៅពេលចេញពីបន្ទប់។ប្រជាជនគួរជៀសវាងប្រើអំពូលភ្លើងបំភ្លឺស៊ីភ្លើងខ្លាំង ហើយប្រើប្រព័ន្ធថាមពលបន្ទះស្រូបពន្លឺព្រះអាទិត្យ(សូឡា)ជំនួស។
វៀតណាមនឹងកាត់បន្ថយការប្រើចរន្តអគ្គិសនីត្រឹម២ភាគរយក្នុងមួយឆ្នាំ និងការបាត់បង់ចរន្តតាមខ្សែបញ្ជូនជាង៦ភាគរយនៅត្រឹមឆ្នាំ២០២៥។ត្រឹមឆ្នាំ២០៣០ យ៉ាងហោចណាស់ការិយាល័យនិងអាគារស្នាក់នៅ៥០ភាគរយគួរប្រើថាមពលសូឡាមកពីលើដំបូលផ្ទះដំបូលអាគារ ហើយមានតែអំពូលLEDគួរប្រើនៅតាមផ្លូវសាធារណៈនៅត្រឹមឆ្នាំ២០២៥។
ដើម្បីសំរេចគោលដៅនេះ បណ្តាទីភ្នាក់ងាររដ្ឋត្រូវតែសម្របសម្រួលជាមួយបណ្តាក្រុមហ៊ុនថាមពលមូលដ្ឋានដើម្បីអភិវឌ្ឍផែនការសន្សំសំចៃថាមពលអគ្គិសនី និងដាក់ចេញបទបញ្ញត្តិសន្សំសំចៃភ្លើងដើម្បីកាត់បន្ថយការប្រើយ៉ាងតិច៥ភាគរយក្នុងមួយឆ្នាំ។
សារាចរនិយាយទៀតថា ការឃោសនាផ្សាយពាណិជ្ជកម្មនៅតាមទីវាលនិងអាជីវកម្មដេក័រ (តុបតែងលម្អ)ចាំបាច់ប្រើតែអំពូលណាដែលស៊ីភ្លើងតិច ថាមពលសូឡានិងថាមពលគ្រប់គ្រងស្វ័យប្រវត្តិ។បណ្តាភោជ្ជនីយដ្ឋាន សណ្ឋាគារ ស្ថាប័នពាណិជ្ជកម្មផ្សេងៗ អាគារការិយាល័យនិងអាគារផ្ទះល្វែងត្រូវតែបិទភ្លើង យ៉ាងហោចណាស់ពាក់កណ្តាលនៃភ្លើងផ្សាយឃោសនានិងភ្លើងតុបតែងលម្អខាងក្រៅ។ស្ថាប័នពាណិជ្ជកម្មនិងផ្តល់សេវាចាំបាច់ត្រូវផ្សព្វផ្សាយព័ត៌មានស្តីពីការសន្សំសំចៃថាមពលនេះទៅកាន់អតិថិជន និងលើកទឹកចិត្តអោយប្រើថាមពលកកើតឡើងវិញ។
សេចក្តីណែនាំក៏ប្រាប់ទៅក្រសួងឧស្សាហកម្មនិងពាណិជ្ជកម្មអោយបង្កើតកម្មវិធីលើកទឹកចិត្តអោយស្ថាប័នក្រុមហ៊ុននិងគ្រួសារប្រើបន្ទះសូឡាដាក់លើដំបូល។
ត្រាន់ វៀត ហ័រ(Tran Viet Hoa) នាយកអាជ្ញាធរអគ្គិសនីវៀតណាម បាននិយាយថាការផ្គត់ផ្គង់ចរន្តអគ្គិសនីនៅភាគខាងជើងប្រទេសមានចំនួន១៧.៥០០ទៅ១៧.៩០០ម៉េហ្កាវ៉ាត(MW)នៅពេលសេចក្តីត្រូវការឡើងដល់២៣.០០០ទៅ២៤.០០០ម៉េហ្កាវ៉ាត ក្នុងអំឡុងពេលក្តៅខ្លាំង។តំបន់នេះប្រឈមការខ្វះចរន្ត៣០ទៅ៥០ម៉េហ្កាវ៉ាត។
ក្រោមឥទ្ធិពលបាតុភូត អែល នីណូ(El Nino) ដែលបណ្តាលអោយភ្លៀងតិចនិងកំដៅកើនឡើង ឆ្នាំនេះភាគខាងជើងវៀតណាមជួបរលកកំដៅដែលពេលខ្លះឡើងដល់៤០អង្សាសេ៕
វៀតណាមណែនាំអោយកាត់បន្ថយភ្លើងតាមដងផ្លូវនិងការផ្សាយពាណិជ្ជកម្ម ដោយសារការផ្គត់ផ្គង់ចរន្តអគ្គិសនីទាបជាងតំរូវការនិងលើកទឹកចិត្តអោយងាកទៅប្រើថាមពលកកើតឡើងវិញជាពិសេសបន្ទះសូឡា