ប្រែសម្រួលៈបំណង(ដេល្លីម៉េល)៖ ទាហាន ប៉ូលិសនិងបុគ្គលិកជួយសង្គ្រោះហ្វីលីពីន កំពុងជម្លៀសអ្នកស្រុកនៅក្បែរភ្នំភ្លើងម៉ាយ៉ុន(Mayon)ទាំងបង្ខំកាលពីថ្ងៃសុក្រ នៅពេលវាកាន់តែកម្រើកដែលបង្ហាញសញ្ញាថាភ្នំភ្លើងនេះប្រុងផ្ទុះនៅប៉ុន្មានថ្ងៃឬប៉ុន្មានសប្តាហ៍ខាងមុខ។
តំបន់ចម្ងាយប្រាំមួយគីឡូម៉ែត្រពីមាត់ភ្នំភ្លើង ត្រូវបានចាត់ទុកជាកន្លែងហាមឃាត់ ដោយសារតែលទ្ធភាពវាយប្រហារពីផេះ កំអែភ្នំភ្លើងនិងការធ្លាក់ចុះដុំថ្មរួមទាំងវត្ថុគ្រោះថ្នាក់ផ្សេងមកលើ។តែពួកអ្នកភូមិក្រីក្រ បានសាងសង់ផ្ទះនិងបង្កើតកសិដ្ឋាននៅតំបន់គ្រោះថ្នាក់ពីការផ្ទុះភ្នំភ្លើងនេះអស់ពេលរាប់ឆ្នាំមកហើយ។
ប្រធានាធិបតី ហ្វែរឌីណង់ ម៉ាកូស ជូនៀ បាននិយាយថា ការជម្លៀសអ្នកស្រុកចេញពីតំបន់គ្រោះថ្នាក់កំពុងធ្វើឡើងនិងបានសន្យាផ្តល់ជំនួយដល់អ្នកត្រូវបានជម្លៀសរហូតដល់ចប់វិបត្តិ។
លោកម៉ាកូសបានប្រាប់អ្នកយកព័ត៌មានថា«ឥឡូវ អ្វីដែលយើងកំពុងធ្វើគឺត្រៀមនិងរើប្រជាជនចេញពីតំបន់នោះអោយទាន់ពេល…។ខ្ញុំរំពឹងថាវានឹងមិនកើតឡើង តែជាអកុសល វិទ្យាសាស្ត្រប្រាប់យើងថាវាអាចកើតឡើងដោយសារគម្របភក់ភ្នំភ្លើងលើកំពូលភ្នំកើនឡើងសន្សឹមៗ»។
អាជ្ញាធរក្នុងពេលជាមួយគ្នាបានបង្កើនកំរិតព្រមានសំរាប់ភ្នំភ្លើនៅក្នុងខេត្ត អាល់បេ(Albay)នេះកាលពីថ្ងៃព្រហស្បតិ៍ក្រោយវាបញ្ចេញចំហាយក្តៅ កំទេចកំទីនិងដុំថ្មក្រហមធ្លាក់ចុះតាមជម្រាលភ្នំប៉ែកខាងលើ ដែលនេះជាសញ្ញាបង្ហាញសកម្មភាពនៅក្រោមផ្ទៃលើដែលអាចនឹងផ្ទុះបង្កគ្រោះថ្នាក់។
ភ្នំភ្លើងម៉ាយ៉ុន បានបាញ់ផ្សែងពណ៌សកាលពីថ្ងៃព្រហស្បតិ៍
ភ្នំភ្លើងកំពស់២.៤៦២ម៉ែត្រនេះបានផ្ទុះលើកចុងក្រោយកាលពីឆ្នាំ២០១៨ ដោយនាំអោយមានការជម្លៀសមនុស្សចេញរាប់ពាន់នាក់៕