ដោយៈ តារារិទ្ធ / ភ្នំពេញ៖ នៅព្រឹកថ្ងៃទី១០ ខែមិថុនា ឆ្នាំ២០២៣ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជួបសំណេះសំណាល ជាមួយកម្មករ កម្មការិនី សរុប ១៦.២៧២ នាក់ មកពីរោងចក្រ សហគ្រាស ចំនួន១២ នៅស្រុកក ណ្តាលស្ទឹង ខេត្តកណ្តាល ។ ជំនួបសំណេះសំណាលនេះ ធ្វើឡើងនៅរោងចក្រ លីន វេន ជី សាន់បូ អេនធើប្រាយ (LIN WEN CHIH SUN BOW ENTERPRISE)។
លោក អុិត សំហេង រដ្ឋមន្ត្រីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថាៈ រោងចក្រ សហគ្រាសទាំង ១២ នេះ ជាប្រភេទរោងចក្រកាត់ដេរសម្លៀក បំពាក់ចំនួន៧, ផលិតស្បែកជើងចំនួន២, ប៉ាក់ព្រីនសម្លៀកបំពាក់ចំនួន២ និង ផលិតផលធ្វើដំណើរ និងកាបូបចំនួន១។ ផលិតផលរបស់រោងចក្រទាំងនេះ គឺនាំចេញទៅទីផ្សារអន្តរជាតិ ជាពិសេសសហគមន៍អឺរ៉ុប សហរដ្ឋអាមេរិក ប្រទេសកាណាដា ប្រទេសជប៉ុន ។ល។
នៅឆ្នាំ២០២៣ នេះ ខេត្តកណ្តាល មានរោងចក្រ សហគ្រាស ចំនួន ៤៨៣ មាន កម្មករនិយោជិត ជាង ១៥ ម៉ឺននាក់។ ក្នុងនោះ រោងចក្រសហគ្រាសវិស័យកាត់ដេរចំនួន ១៧១ មានកម្មករ និយោជិតសរុបជាង ១៣២.០០០ នាក់។ ខេត្តកណ្តាល ជាខេត្តទី៣ ដែលមានការអភិវឌ្ឍរោងចក្រ សហគ្រាសច្រើន ។
ក្នុងជំនួបជាមួយកម្មករ កម្មការិនីជុំទី២ កាលពីថ្ងៃទី២២ ខែឧសភា ឆ្នាំ២០២៣ កន្លងទៅ សម្ដេចតេជោ បានប្រកាសអនុវត្តកម្មវិធីចាស់ សកម្មភាពថ្មី និងបន្ថែមវិសាលភាពដល់កម្មការិនី ដែលមានផ្ទៃពោះនិងកុមារអាយុ ២ឆ្នាំ ។
ជំនួបថ្ងៃនេះ គឺជាជំនួបលើកទី៨ហើយ សម្រាប់ជុំទី២នេះ ។ ជំនួប៨លើកនេះ មានកម្មករ និយោជិត សរុបប្រមាណ ១៤៧.០០០ នាក់។ សម្តេចតេជោ គ្រោងជួប កម្មករ ចំនួន១១ លើកទៀត ដែលនឹងមានកម្មករ និយោជិត ចូលរួមសរុបប្រមាណ ១៨៨.០០០ នាក់ទៀត។
គូររំលឹកជូនថា សម្តេចតេជោ បានចុះជួបកម្មករ កម្មការិនីជុំទី១ កាលពីថ្ងៃទី២០ ខែសីហា ឆ្នាំ២០១៧ ដល់ថ្ងៃទី១ ខែឧសភា ឆ្នាំ២០១៩ សម្តេចតេជោ បានជួបសំ ណេះសំណាលជាមួយកម្មករ និយោជិត ចំនួន៧៧ លើក ដែលមានកម្មករ និយោជិតចំនួនប្រមាណ ១លាននាក់។
ជំនួបក្នុងជុំទី១ សម្តេចតេជោ នាយករដ្ឋមន្ត្រី បានផ្ដល់អនុសាសន៍គន្លឹះ១០ ចំណុច ដែលបានសម្រួលដល់បរិយាកាសវិនិយោគ, ផ្តល់នូវការលើកកម្ពស់សិទ្ធិអត្ថប្រយោជន៍ និងកិច្ចគាំពារសង្គមយ៉ាងច្រើន ដល់បងប្អូនកម្មករ និយោជិត ហើយដែលក្រសួងការងារ និងបណ្តុះ បណ្តាលវិជ្ជាជីវៈ បាននិងកំពុងសហការ ជាមួយក្រសួង ស្ថាប័ន អនុវត្តបានជោគជ័យ៕/V/R
