ដោយៈ វ៉ៃកូ / ស្វាយរៀង៖ លោក លី ធុជ ប្រធានក្រុមការងារគណបក្សចុះមូលដ្ឋាន ក្រុងបាវិត ខេត្តស្វាយរៀង ក្នុងនាមសម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋាន ខេត្តស្វាយរៀង នៅព្រឹកថ្ងៃទី១០ ខែមិថុនា ឆ្នាំ២០២៣ នេះ បានមានប្រសាសន៍ថាៈសម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា បាននឹងកំពុងខិតខំលះបង់ និងវិនិយោគគ្រប់បែបយ៉ាង គឹសម្រាប់អនាគតកាន់តែ ប្រសើរឡើងរបស់ប្រជាជនកម្ពុជា និងកូនចៅខ្មែរ ជំនាន់ក្រោយៗទៀត។
លោកបានមានប្រសាសន៍ដូច្នេះ ក្នុងឱកាសដែលលោក បានជួបសំណេះសំណាល ជាមួយ មេគ្រួសារបក្សចំនួន ១០១៣ នាក់ មកពីភូមិចំនួន ៧ ក្នុងចំណោម ១៥ ភូមិ នៅសង្កាត់ច្រកម្ទេស ក្រុងបាវិត ខេត្តស្វាយរៀង ដើម្បីឆ្ពោះទៅរកការបោះឆ្នោត ជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។
លោក លី ធុជ បានបញ្ជាក់បន្ថែមថាៈ សម្តេចតេជោ គឺជាបិតាស្ថាបនិកសន្តិភាព និងជាបិតាបង្រួបបង្រួម សាមគ្គីភាពខ្មែរតែមួយ នៅទូទាំងប្រទេសកម្ពុជា តាមរយៈ នយោបាយឈ្នះឈ្នះ ដែលទើបមានអាយុកាល ២៥ ឆ្នាំប៉ុណ្ណោះ ហើយសន្តិភាពនេះ គឺជាកត្តាស្លាប់រស់ និងសំខាន់បំផុត សម្រាប់ភាពសុខដុមរមនា របស់ប្រជាជនកម្ពុជា និងកំណើនសេដ្ឋកិច្ចជាតិ។ គណបក្សប្រជាជនកម្ពុជា មានគុណតម្លៃច្រើនណាស់ ជាប្រវតិ្តសាស្រ្ត សម្រាប់ជាការជ្រើសរើស ដ៏ត្រឹមត្រូវរបស់ប្រជាជនកម្ពុជា ក្នុងការបន្ត ដឹកនាំប្រទេសជាតិ និងការអភិវឌ្ឍ។
លោកប្រធាន បានបន្តទៀតថាៈ ការសម្រេចចិត្តរបស់បងប្អូន បោះឆ្នោតជូន គណបក្សប្រជាជនកម្ពុជា គឺបន្តគាំទ្រការដឹកនាំរបស់ សម្តេចតេជោ ហ៊ុន សែន និងការពារទ្រទ្រង់ព្រះរាជបល្ល័ង្គ។ គណបក្សប្រជាជន នឹងបន្តថែរក្សាសន្តិភាព និងការអភិវឌ្ឍន៍ប្រទេសជាតិ ដើម្បីប្រជាជនកម្ពុជាទាំងអស់គ្នា។
ក្នុងឱកាសនោះ លោកបានថ្លែងអំណរគុណយ៉ាងជ្រាលជ្រៅដល់ប្រជាជនកម្ពុជា សមាជិក សមាជិកាគណបក្សទាំងអស់ ដែលតែងតែផ្តល់ការគាំទ្រ និងមានស្វាមីភក្តិ ចំពោះការដឹកនាំរបស់សម្តេចតេជោ និងគណបក្សប្រជាជនកម្ពុជា ព្រមទាំងបានអំពាវ នាវឲ្យប្រជាពលរដ្ឋ ដែលគ្រប់អាយុបោះឆ្នោត អញ្ជើញទៅបោះឆ្នោតជូនគណបក្ស ប្រជាជនកម្ពុជា ដែលមានលេខរៀងទី១៨ សម្រាប់នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ជាមួយគ្នានេះ លោក លី ធុជ បានជំរុញបន្ថែមឲ្យសមាជិក សមាជិកាគណបក្ស ទាំងអស់ បន្តផ្សព្វផ្សាយអំពីកម្មវិធីនយោបាយរបស់ គណបក្សប្រជាជនកម្ពុជា ដែលដាក់ចេញ និងចូលរួមជួយរំលែកទុក្ខលំបាករបស់ប្រជាពលរដ្ឋ តាមមូលដ្ឋាន ឲ្យកាន់តែសកម្ម៕ V / N
