ប្រែសម្រួល : កញ្ញាដាលីស (ដេល្លីម៉េល) ៖ សេតវិមានបាននិយាយកាលពីថ្ងៃសុក្រថា រុស្ស៊ីហាក់កំពុងពង្រឹងកិច្ចសហប្រតិបត្តិការការពារជាតិរបស់ខ្លួនជាមួយអ៊ីរ៉ង់ហើយបានទទួលដ្រូនវាយប្រហាររាប់រយគ្រឿង ដែលខ្លួនកំពុងប្រើដើម្បីវាយប្រហារអ៊ុយក្រែន។
ដោយលើកឡើងពីព័ត៌មានមិនសម្ងាត់ថ្មីៗ សេតវិមានបាននិយាយថា ដ្រូន ឬ UAVត្រូវបានផលិតក្នុងប្រទេសអ៊ីរ៉ង់ ដឹកជញ្ជូនឆ្លងកាត់សមុទ្រកាសព្យែន (Caspian)ហើយបន្ទាប់មកប្រើប្រាស់ដោយកងកម្លាំងរុស្ស៊ីប្រឆាំងនឹងអ៊ុយក្រែន។
អ្នកនាំពាក្យសេតវិមាន លោក ចន កឺប៊ី (John Kirby)បាននិយាយនៅក្នុងសេចក្តីថ្លែងការណ៍មួយថា “រុស្ស៊ីកំពុងប្រើប្រាស់ UAV របស់អ៊ីរ៉ង់ក្នុងប៉ុន្មានសប្តាហ៍ថ្មីៗនេះដើម្បីវាយប្រហាររដ្ឋាភិបាលក្រុងគៀវនិងបំភ័យប្រជាជនអ៊ុយក្រែន ហើយភាពជាដៃគូយោធារវាងរុស្ស៊ីនិងអ៊ីរ៉ង់ហាក់កំពុងពង្រឹងកាន់តែស៊ីជម្រៅ”។
“យើងក៏មានការព្រួយបារម្ភដែរថា រុស្ស៊ីកំពុងធ្វើការជាមួយអ៊ីរ៉ង់ក្នុងការផលិត UAV របស់អ៊ីរ៉ង់ពីខាងក្នុងទឹកដីរុស្ស៊ី”។
លោកកឺប៊ីបាននិយាយថា សហរដ្ឋអាម៉េរិកមានព័ត៌មានថា រុស្ស៊ីកំពុងទទួលបានវត្ថុធាតុដើមពីអ៊ីរ៉ង់ ដែលតម្រូវឱ្យមានដើម្បីសាងសង់រោងចក្រផលិតដ្រូន ដែលអាចដំណើរការពេញលេញនៅដើមឆ្នាំក្រោយ។
លោកបាននិយាយថា “យើងកំពុងបញ្ចេញរូបភាពផ្កាយរណបនៃទីតាំងដែលបានគ្រោងទុកនៃរោងចក្រផលិត UAV នេះនៅក្នុងតំបន់សេដ្ឋកិច្ចពិសេសអាឡាប៊ូហ្គា (Alabuga) របស់រុស្ស៊ី”៕
សេតវិមានបាននិយាយថា ដ្រូន ឬ UAV ត្រូវបានផលិតក្នុងប្រទេសអ៊ីរ៉ង់ ដឹកជញ្ជូនឆ្លងកាត់សមុទ្រកាសព្យែន ហើយបន្ទាប់មកប្រើប្រាស់ដោយកងកម្លាំងរុស្ស៊ីប្រឆាំងនឹងអ៊ុយក្រែន។ក្នុងរូប ប៉ូលិសអ៊ុយក្រែនពិនិត្យបំណែកដ្រូនដែលអាជ្ញាធរអ៊ុយក្រែនគិតថាជាដ្រូនShahed-136ផលិតនៅអ៊ីរ៉ង់ដែលត្រូវបានបាញ់ទម្លាក់នៅតំបន់ខាគីវ