ម៉េស​ស៊ី​ទៅដល់​ចិន​សម្រាប់​ការប្រកួត​មិត្តភាព​នៅ​ក្រុង​ប៉េកាំង​

​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កំពូល​តារាបាល់ទាត់​អា​ហ្សង់​ទីន លី​អូ​នែ​ល ម៉េស​ស៊ី បាន​មក​ដល់​ទីក្រុង​ប៉េកាំង​នៅ​ថ្ងៃ​សៅរ៍​នេះ​សម្រាប់​ការប្រកួត​មិត្តភាព​មួយ​មុនពេល​ចាកចេញ​ពី​​អាជីព​នៅ​អឺរ៉ុប​ទៅ​ចូលរួម​ជាមួយ​ក្រុម Inter Miami នៃ​ក្របខ័ណ្ឌ Major League Soccer ក្នុងនាម​ជា​កីឡាករ​ឥត​តម្លៃ​ខ្លួន​។​

​ការមកដល់​របស់​គាត់​ត្រូវបាន​ប្រកាស​នៅ​ក្នុង​សារ​បង្ហោះ​នៅលើ​វេបសាយ​បណ្តាញ​សង្គម Weibo ផ្លូវការ​របស់​អ្នករៀបចំ​ការប្រកួត​បាល់ទាត់​អន្តរជាតិ​ជា​មួយ​វីដេអូ​មួយ​បង្ហាញ​កីឡាករ​ចុះ​​ពីលើ​យន្តហោះ​នៅមុន​ការប្រកួត​រវាង​អា​ហ្សង់​ទី​ន​និង​អូស្ត្រាលីនៅ​ថ្ងៃ​ព្រហស្បតិ៍​ខាងមុខ​នៅក្នុង​កីឡដ្ឋាន Workers’ Stadium របស់​រដ្ឋធានី​ចិន ដែល​ទើបនឹង​សាងសង់​ថ្មី​។​

​ម៉េស​ស៊ី ដែល​បាន​លើ​កពាន​វើល​ខាប់​ក្នុង​ប្រទេសកាតា​កាលពី​ខែ​ធ្នូ​និង​ត្រូវបាន​ចាត់ទុកជា​កីឡាករ​ដ៏​អស្ចារ្យ​ម្នាក់ បាន​បញ្ជាក់​ក្នុង​សប្តាហ៍​នេះ​ថា គាត់​នឹង​ចាកចេញ​ពី​ម្ចាស់​ជើងឯក​បារាំង Paris St Germain សម្រាប់​លី​ក​អាម៉េរិក​។​

​នេះ​គឺជា​ដំណើរ​លើក​ទី​ប្រាំពីរ​របស់​ប្រធាន​ក្រុម​អា​ហ្សង់​ទី​ន​រូប​នេះ​ទៅ​កាន់​ប្រទេស​ចិន និង ជា​លើកដំបូង​របស់​គាត់​ចាប់តាំងពី​ឆ្នាំ ២០១៧​។​

​គាត់​បានទទួល​ការស្វាគមន៍​យ៉ាង​ក្លៀវក្លា​រាល់​ពេល​ទៅដល់​ចិន ដែល​មាន​អ្នកគាំទ្រ​បាល់ទាត់​យ៉ាងច្រើន ត្បិត​ក្រុម​ជម្រើសជាតិ​បុរស​របស់ខ្លួន​បាន​លេង​នៅវើ​លខាប់​តែម្តង​៕

​អ្នកគាំទ្ររង់ចាំការមកដល់របស់ម៉េស​ស៊ី​នៅក្រុង​ប៉េកាំង​នៅ​ថ្ងៃ​សៅរ៍​នេះ