ប្រែសម្រួលៈបំណង(ស្ត្រេតថែមស៍)៖យន្តហោះយោធាចិនប្រាំបីគ្រឿងបានហោះកាត់ខ្សែបន្ទាត់កណ្តាលនៃច្រកសមុទ្រតៃវ៉ាន់កាលពីព្រឹកថ្ងៃអង្គារទី៤កក្កដា នៅពេលចិនបង្កើនសម្ពាធយោធាលើកោះគ្រប់គ្រងតាមបែបប្រជាធិបតេយ្យនេះ។
ក្រសួងយោធាតៃវ៉ាន់បាននិយាយថា សរុបយន្តយោធាចិន២៤គ្រឿង រួមមានយន្តហោះប្រយុទ្ធនិងយន្តហោះទម្លាក់គ្រាប់បែកត្រូវបានប្រទះឃើញក្បែរកោះតៃវ៉ាន់កាលពីព្រឹកថ្ងៃអង្គារ ហើយនាវាចម្បាំងចិនបួនគ្រឿងក៏ចូលរួមល្បាតត្រៀមប្រយុទ្ធផងដែរ។
ក្នុងពេលជាមួយគ្នា តៃវ៉ាន់បានបញ្ជូនចេញនាវាចម្បាំងនិងយន្តហោះប្រយុទ្ធដើម្បីព្រមានអោយនាវានិងយន្តហោះចិនចេញឆ្ងាយ នៅពេលប្រព័ន្ធកាំជ្រួចតាមដានយន្តហោះចិនយ៉ាងដិតដល់។
សូមបញ្ជាក់ថា ចិនចាត់ទុកតៃវ៉ាន់ជាផ្នែកមួយនៃទឹកដីរបស់ខ្លួននិងមិនដែលបដិសេធការប្រើកម្លាំងដើម្បីចាប់យកវាមកនៅក្រោមការគ្រប់គ្រងរបស់ខ្លួនទេ។កាលពីខែមេសា ចិនបានធ្វើសមយុទ្ធយោធាជុំវិញកោះដើម្បីបញ្ចេញកំហឹងចំពោះជំនួបរវាងប្រធានាធិបតីតៃវ៉ាន់និងប្រធានសភាអាម៉េរិក ដោយផ្គើននឹងការព្រមានរបស់ចិន។
ការបង្ហាញវត្តមានយោធាចិននៅក្បែរកោះតៃវ៉ាន់នេះកើតឡើងតែមួយថ្ងៃក្រោយពីយោធាតៃវ៉ាន់បានធ្វើសមយុទ្ធបាញ់គ្រាប់ពិតនៅលើឆ្នេរយុទ្ធសាស្ត្រភាគខាងត្បូងរបស់ខ្លួនកាលពីថ្ងៃចន្ទ ដោយបាញ់កាំជ្រួចចេញពីរថពាសដែកចល័តដើម្បីកំទេចគោលដៅនៅក្បែរឆ្នេរក្នុងការហាត់សមធ្វើ់ដូចជាកំពុងប្រយុទ្ធវាយបណ្តេញកងកម្លាំងឈ្លានពាន។
អ្នកនាំពាក្យយោធាតៃវ៉ាន់ បានប្រាប់អ្នកយកព័ត៌មានថា «សមយុទ្ធនៅថ្ងៃនេះភាគច្រើនពាក់ព័ន្ធនឹងការបាញ់កាំភ្លើងធំជាក់ស្តែង ដោយផ្តល់អោយកងទ័ពរបស់យើងនូវជំនឿចិត្តនិងមានសមត្ថភាពការពារមាតុភូមិរបស់ខ្លួន»។
រថយន្តយោធាHumveesបាញ់កាំជ្រួចប្រឆាំងរថក្រោះTOWផលិតនៅអាម៉េរិកដើម្បីកំទេចគោលដៅនៅក្បែរឆ្នេរ
នៅចុងខែកក្កដានេះ តៃវ៉ាន់ក៏ធ្វើសមយុទ្ធសំខាន់បំផុតប្រចាំឆ្នាំឈ្មោះថាហានគួង( Han Kuang) ដោយផ្តោតលើការប្រយុទ្ធ ការបិទខ្ទប់និងរក្សាលទ្ធភាពប្រយុទ្ធរបស់កងកម្លាំងរបស់ខ្លួន។សមយុទ្ធនេះគេនឹងឃើញយន្តហោះយោធាចុះឡើងនៅអាកាសយានដ្ឋានស៊ីវិល ដើម្បីហាត់ប្រើប្រាស់ទីតាំងទាំងនោះក្នុងករណីដែលមូលដ្ឋានទ័ពអាកាសត្រូវបំផ្លាញក្នុងសង្គ្រាម៕