ប្រែសម្រួល : កញ្ញាដាលីស (ដេល្លីម៉េល) ៖ អាជ្ញាធរបាននិយាយកាលពីថ្ងៃអង្គារថា មនុស្សបីនាក់បានស្លាប់ និងប្រាំបីនាក់ផ្សេងទៀតបានរងរបួស នៅពេលដែលបុរសមួយក្រុមបាញ់រះមិនរើសមុខទៅលើហ្វូងមនុស្សរាប់រយនាក់ដែលបានប្រមូលផ្តុំគ្នានៅក្នុងសង្កាត់នៃទីក្រុងមួយក្នុងរដ្ឋតិចសាស់ បន្ទាប់ពីពិធីបុណ្យមួយនៅក្នុងតំបន់នោះ។
ប៉ូលិសនិយាយថាមិនទាន់មានការចាប់ខ្លួនជនសង្ស័យឬការកំណត់អត្តសញ្ញាណជនសង្ស័យក្នុងការបាញ់ប្រហារនៅម៉ោងប្រហែល១១៖៤៧នាទីយប់ថ្ងៃចន្ទនៅក្នុងសង្កាត់ហ្វតវ៉ត (Fort Worth) នៃក្រុងកូម៉ូ (Como) នោះទេ។
ការបាញ់ប្រហារនេះបានផ្ទុះឡើងប្រហែលពីរម៉ោងបន្ទាប់ពីការបញ្ចប់នៃការប្រារព្ធទិវាឯករាជ្យដែលមានឈ្មោះថា ComoFest នៅក្នុងសង្កាត់ស្បែកខ្មៅជាប្រវត្តិសាស្ត្រនេះ។ ការប្រារព្ធពិធីនោះត្រូវបានធ្វើឡើងនៅក្នុងសួនមួយ ដែលនៅឆ្ងាយពីតំបន់បាញ់ប្រហារជាច្រើនប្លុកអគារ។
បើតាមប៉ូលិសការបាញ់ប្រហារនៅផ្លូវ Horne ជាកន្លែងដែលហ្វូងមនុស្សយ៉ាងច្រើនបានប្រមូលផ្តុំគ្នាគឺ “ដាច់ដោយឡែកពីគ្នានិងមិនទាក់ទងនឹងពិធីបុណ្យ ComoFest ទេ”។
ហេតុការណ៍ចលាចលមួយបានកើតឡើងបន្ទាប់ពីការបាញ់ប្រហារនេះ ខណៈមនុស្សព្យាយាមរត់គេចដោយថ្មើរជើងនិងតាមរថយន្ត ខណៈការបាញ់ប្រហារបានផ្ទុះឡើង នេះបើយោងតាមសមត្ថកិច្ច។
ប៉ូលិសបាននិយាយថា មន្ត្រីដែលចុះទៅដល់បានរកឃើញជនរងគ្រោះជាច្រើននាក់នៅចំណតរថយន្ត ក្នុងនោះមានម្នាក់ស្លាប់នៅកន្លែងកើតហេតុ។ អ្នកផ្សេងទៀតត្រូវបានបញ្ជូនទៅមន្ទីរពេទ្យតាមរថយន្តសង្គ្រោះបន្ទាន់ឬរថយន្តឯកជន។
ផូល វីលលីស (Paul Willis) អាយុ ១៨ ឆ្នាំបានស្ថិតក្នុងចំណោមអ្នកដែលត្រូវបានសម្លាប់ នេះបើយោងតាមម្តាយរបស់គេឈ្មោះ កាដេសា វីតធឺលី (Ka’Desha Weatherly) ប្រាប់ទៅសារព័ត៌មាន The Dallas Morning News ។ លោកស្រីវីតធឺលីបានប្រាប់កាសែតនេះថា បន្ទាប់ពីឮសំឡេងកាំភ្លើង ១០០ គ្រាប់កាលពីយប់ថ្ងៃចន្ទ លោកស្រីបានចាប់ផ្តើមរត់តាមដងផ្លូវដើម្បីស្វែងរកកូនប្រុសនិងក្មួយប្រុសរបស់គាត់។ លោកស្រីបានរកឃើញក្មួយប្រុសនៅរស់ ប៉ុន្តែមិនមែនកូនប្រុសរបស់គាត់ទេ។ លោកស្រីបាននិយាយថា លោកស្រីមិនបានដឹងខ្លួនថាលោកស្រីបានរត់កាត់សាកសពកូននោះឡើយ៕
ប៉ូលិសមកដល់កន្លែងកើតហេតុក្នុងសង្កាត់ហ្វតវ៉តនៃក្រុងកូម៉ូ