ប្រែសម្រួលៈបំណង(ដេល្លីម៉េល)៖ចិនបានព្រមានអូស្ត្រាលីថាកុំផ្តល់ជម្រកសុវត្ថិភាពណាមួយដល់ជនល្មើសរត់គេចខ្លួន ក្រោយពីប៉ូលិសហុងកុងចេញដីកាចាប់ខ្លួនសកម្មជនពីរនាក់ដែលកំពុងសម្ងំរស់នៅអូស្ត្រាលី។
សូមបញ្ជាក់ថា អាជ្ញាធរហុងកុងបានប្រកាសផ្តល់ប្រាក់រង្វាន់១លានដុល្លារហុងកុង(១២.៧៧២ដុល្លារ)ចំពោះការចាប់ខ្លួនសកម្មជននៅបរទេសចំនួនប្រាំបីនាក់ក្រោយចោទប្រកាន់ពួកគេថាបានរំលោភសន្តិសុខជាតិក្រោយការបង្ក្រាបលើជនប្រឆាំងនយោបាយ។
សកម្មជនទាំងពីររូបនេះរួមមាន មេធាវីអូស្ត្រាលីខេវិន យ៉ាម(Kevin Yam)និងអតីតសមាជិកសភាហុងកុងលោកថេដ វ៉េ(Ted Hui)ដែលបច្ចុប្បន្នកំពុងរស់នៅអូស្ត្រាលី។
សកម្មជនខេវិន យ៉ាមនិងថេដ វ៉េ កំពុងរស់នៅអូស្ត្រាលី និងត្រូវអាជ្ញាធរចិនត្រូវការចាប់ខ្លួន
ប៉ូលិសហុងកុងប្រកាស់ផ្តល់ប្រាក់រង្វាន់១លានដុល្លារចំពោះការចាប់ខ្លួនមនុស្ស៨ នាក់រួមមានអតីតសមាជិកសភាហុងកុងបីនាក់
នៅពេលត្រូវបានសួរអំពីប្រតិកម្មចំពោះដីកាចាប់ខ្លួននេះ អ្នកនាំពាក្យក្រសួងការបរទេសចិនលោកស្រីម៉ៅនិញ បានចោទប្រកាន់លោកយ៉ាមនិងជនដទៃទៀតថាបានចូលរួមពាក់ព័ន្ធក្នុង«សកម្មភាពប្រឆាំងចិនក្នុងបំណងធ្វើអោយហុងកុងបាត់បង់ស្ថិរភាព»។
លោកស្រីបាននិយាយថា «យើងសោកស្តាយនិងប្រឆាំងប្រទេសមួយចំនួនដែលមួលបង្កាច់យើងនិងនិយាយមិនល្អអំពីច្បាប់សន្តិសុខជាតិសំរាប់តំបន់ហុងកុង ហើយព្យាយាមជ្រៀតជ្រែកក្នុងនីតិរដ្ឋនៅហុងកុង»។
«ប្រទេសពាក់ព័ន្ធគួរគោរពអធិបតេយ្យភាពរបស់ចិននិងនីតិរដ្ឋនៅហុងកុង ឈប់ផ្តល់ការគាំទ្រដល់សមាសភាពប្រឆាំងចិនដើម្បីធ្វើអោយហុងកុងបាត់បង់ស្ថិរភាពហើយផ្តល់ទីជម្រកសុវត្ថិភាពមួយដល់ជនល្មើសរត់គេចខ្លួន»។
តែលោកវ៉េបានហៅប្រាក់រង្វាន់សំរាប់ក្បាលរបស់លោកជារឿង«គួរអោយចង់សើច»។លោកបានប្រាប់វិទ្យុABកាលពីថ្ងៃពុធថា«វាជាកាយវិការនយោបាយដែលគេចង់បង្ហាញ។ពួកគេចង់សាបព្រួសការភ័យខ្លាចទូទៅ ដើម្បីធ្វើអោយអ្នកនៅបរទេសដែលគាំទ្រសេរីភាព…បិទមាត់និងឈប់រិះគន់ពួកគេទៀត»។
លោកវ៉េបានបន្ថែមថា លោក«មានអារម្មណ៍សុខស្រួលទាំងស្រុង»នៅអូស្ត្រាលី ដោយសាររដ្ឋាភិបាលបានអនុញ្ញាតអោយលោកស្នាក់នៅទីនេះ។
ចំណែកនាយករដ្ឋមន្ត្រីអូស្ត្រាលី បាននិយាយថាលោកមានការខកចិត្តចំពោះដីកាចាប់ខ្លួននេះ៕