ប្រែសម្រួលៈបំណង(VnExpress)៖ ធនាគាររដ្ឋវៀតណាមVietinBank កំពុងដាក់លក់ឡៃឡុងទ្រព្យសម្បត្តិ៣៥៨មុខរបស់កូនបំណុលលែងមានលទ្ធភាពសង រួមមាសណ្ឋាគារផ្កាយបួននិងផ្កាយប្រាំ មានតំលៃសរុបប្រាំទ្រីលានដុង(៣៣៧,៦៩លានដុល្លារ)ដើម្បីប្រមូលបំណុលស្អុយមកវិញ។
ទ្រព្យសម្បត្តិរាប់រយមុខនេះនឹងត្រូវលក់បែបឡៃឡុងផងនិងចរចាតំលៃផង។
ធនាគារក៏លក់រថយន្ត ម៉ាស៊ីននិងបរក្ខារដទៃទៀតចំនួន៣៨។
ទ្រព្យត្រូវដាក់លក់ដែលមានតំលៃបំផុតគឺសណ្ឋាគារផ្កាយប្រាំមួយនៅក្រុងដាណាំង សង់លើផ្ទៃដី១.២០០ម៉ែត្រការ៉េ មាន២៣៦បន្ទប់ និងមានតំលៃប្រមាណ៦០០ពាន់លានដុង។ទ្រព្យមានតំលៃទីពីរ គឺសណ្ឋាគារផ្កាយបួននៅក្រុង ហូយអាន(Hoi An)ដែលមានប្រមាណ១០០បន្ទប់និងតំលៃប្រមាណ៤២០ពាន់លានដុង។
ធនាគារផ្តល់កំចីនេះក៏គ្រោងលក់ចេញសណ្ឋាគារនិងអចលនទ្រព្យជិត៦០ទៀតនៅហូយអាន។
Vietinbankក៏កំពុងប្រកាសលក់អាគារការិយាល័យ រួមមានអាគារមួយតំលៃ២១៣ពាន់លានដុងនៅក្រុងហូជីមិញ និងរោងចក្រប្រព្រឹត្តកម្មទឹកមួយតំលៃ១០៨ពាន់លានដុងនៅខេត្តយ៉ាឡាយ(Gia Lai)។
ក្រៅពីនេះធនាគារក៏លក់បំណុលរបស់អតិថិជនក្នុងតំលៃ៩០ភាគរយនៃតំលៃនៅសល់របស់វា។
សូមបញ្ជាក់ថា ធនាគារវៀតណាមមួយចំនួនទៀតក៏ប្រកាស់លក់ទ្រព្យបញ្ចាំ និងបំណុលស្អុយ(បំណុលលែងទទួលបានសំណង)របស់កូនបំណុលដែលលែងមានលទ្ធភាពសងនៅឆ្នាំនេះ ដើម្បីរៀបចំទ្រព្យឥណទានឡើងវិញ៕
និយោជិតនៃធនាគារVietinBank