ប្រែសម្រួល : កញ្ញាដាលីស (បាងកកប៉ុស្តិ៍) ៖ អង្គការសហប្រជាជាតិកាលពីថ្ងៃអង្គារបានព្រមានពិភពលោកឱ្យត្រៀមខ្លួនសម្រាប់ផលប៉ះពាល់ពីបាតុភូតអែលនីណូ (El Nino) ដោយនិយាយថា បាតុភូតអាកាសធាតុ ដែលបង្កឱ្យមានសីតុណ្ហភាពពិភពលោកកាន់តែខ្ពស់នេះ គ្រោងនឹងបន្តពេញឆ្នាំ ២០២៣។
El Nino គឺជាទម្រង់អាកាសធាតុដែលកើតឡើងដោយធម្មជាតិ ដែលជាធម្មតាត្រូវបានផ្សារភ្ជាប់ជាមួយនឹងការកើនឡើងកម្តៅទូទាំងពិភពលោក ក៏ដូចជាគ្រោះរាំងស្ងួតនៅក្នុងផ្នែកខ្លះនៃពិភពលោក និង ភ្លៀងធ្លាក់ខ្លាំងនៅកន្លែងផ្សេងទៀត។
បាតុភូតនេះកើតឡើងជាមធ្យមរៀងរាល់ ២ ទៅ ៧ ឆ្នាំម្តង ហើយវគ្គនីមួយៗជាធម្មតាមានរយៈពេលពី ៩ ទៅ ១២ ខែ។
អង្គការឧតុនិយមពិភពលោក (WMO) របស់អ.ស.បបានប្រកាសថា El Nino កំពុងដំណើរការហើយ ហើយបាននិយាយថាមានឱកាស ៩០ ភាគរយដែលវានឹងបន្តក្នុងឆមាសទីពីរនៃឆ្នាំ ២០២៣។
លោក ភីតធឺរី ថាឡាស (Petteri Taalas) អគ្គលេខាធិការ WMO បានព្រមានថា “ការចាប់ផ្តើមនៃ El Nino នឹងបង្កើនលទ្ធភាពនៃការបំបែកឯតទគ្គម្មសីតុណ្ហភាព និងបង្កឱ្យមានកម្តៅខ្លាំងបន្ថែមទៀតនៅក្នុងផ្នែកជាច្រើននៃពិភពលោកនិងក្នុងមហាសមុទ្រ”។
លោកថាឡាសបាននិយាយថា “ការប្រកាសអំពី El Nino ដោយ WMO គឺជាសញ្ញាផ្ញើទៅរដ្ឋាភិបាលជុំវិញពិភពលោក ដើម្បីប្រមូលផ្តុំការត្រៀមខ្លួនដើម្បីទប់ស្កាត់ផលប៉ះពាល់លើសុខភាព ប្រព័ន្ធអេកូឡូស៊ី និងសេដ្ឋកិច្ចរបស់យើង”។
“ការព្រមានជាមុននិងសកម្មភាពប្រមើលមើលជាមុននៃព្រឹត្តិការណ៍អាកាសធាតុធ្ងន់ធ្ងរដែលទាក់ទងនឹងបាតុភូតអាកាសធាតុដ៏សំខាន់បែបនេះគឺមានសារៈសំខាន់ក្នុងការជួយសង្គ្រោះជីវិតនិងជីវភាពរស់នៅ”៕
បាតុភូតអែលនីណូរំពឹងបន្តពេញមួយឆ្នាំ២០២៣