ប្រែសម្រួលៈបំណង(ដេល្លីម៉េល)៖ មនុស្សជាច្រើននាក់បានស្លាប់និងរបួសកាលពីថ្ងៃព្រហស្បតិ៍ក្នុងការវាយប្រហារដ៏ធំបំផុតលើហេដ្ឋារចនាសម្ពន្ធស៊ីវិលក្នុងទីក្រុងល្វីវ(Lviv)ចាប់តាំងពីរុស្ស៊ីចូលឈ្លានពានអ៊ុយក្រែនកាលពីឆ្នាំមុន ដោយបំផ្លាញប្លុកអាគារមនុស្សរស់នៅមួយ។
រដ្ឋមន្ត្រីមហាផ្ទៃ អ៊ីហ័រ គ្លីមេនកូ(Ihor Klymenko)បានរាយការណ៍កាលពីថ្ងៃព្រហស្បតិ៍ថា មនុស្សបួននាក់ត្រូវបានសម្លាប់និងប្រាំបួននាក់ទៀតរងរបួសនៅពេលបុគ្គលិកក្រុមជួយសង្គ្រោះកំពុងស្វែងរកក្រែងមានមនុស្សជាប់ក្រោមគំនរបាក់បែកបន្ថែមទៀត។
ចំណែកប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី បានបង្ហោះសារតាមតេឡេក្រាម ដោយលោកនិយាយថា« ជាអកុសល មានមនុស្សស្លាប់និងរងរបួស។សូមផ្ញើការចូលរួមរំលែកទុក្ខដល់សាច់ញាតិ! ពិតជានឹងមានការឆ្លើយតបជាក់ស្តែងចំពោះសត្រូវ»។
លោកហ្សេឡេនស្គី ក៏បានបង្ហោះរូបថតពីដ្រូនដោយបង្ហាញអាគារបាក់បែក ដោយជាន់ទីបីនិងទីបួនត្រូវបំផ្លាញខ្ទេចដោយកាំជ្រួចរុស្ស៊ី។
កងទ័ពអាកាសអ៊ុយក្រែនបារាយការណ៍ថា ខ្លួនបានស្ទាក់កំទេចកាំជ្រួចចំនួនប្រាំពីរដើមក្នុងចំណោមកាំជ្រួចធុនKalibrចំនួនដប់ដើមដែលរុស្ស៊ីបាញ់ចេញពីសមុទ្រខ្មៅឆ្ពោះមកកាន់តំបន់ទីក្រុងល្វីវនៅម៉ោងប្រមាណ១រំលងអធ្រាត្រឈានចូលថ្ងៃព្រហស្បតិ៍។
ក្នុងពេលជាមួយគ្នា អភិបាលក្រុងលោក អង់ឌ្រីយ សាដូវយី(Andriy Sadovyi) បាននិយាយថា អាគារផ្ទះល្វែងប្រមាណ៦០និងរថយន្ត៥០គ្រឿងនៅក្នុងតំបន់រងការវាយប្រហារបានខូចខាត។
បុគ្គលិកសេវាគ្រាអាសន្ននៅក្រៅអាគារដែលខូចខាតដោយការវាយប្រហាររបស់រុស្ស៊ីដើម្បីស្វែងរកជនរងគ្រោះកាលពីថ្ងៃ៦កក្កដា
លោក អង់ឌ្រីយ សាដូវយី បាននិយាយថាវាជាការវាយប្រហារធំបំផុតលើហេដ្ឋារចនាសម្ពន្ធស៊ីវិលក្នុងក្រុងល្វីវ ចាប់តាំងពីរុស្ស៊ីបញ្ជូនកងកម្លាំងចូលអ៊ុយក្រែនកាលពីដើមឆ្នាំមុន៕