ប្រែសម្រួល : កញ្ញាដាលីស (ដេល្លីម៉េល) ៖ កងទ័ពអាកាសអាម៉េរិកបាននិយាយថា យន្តហោះចម្បាំងរុស្ស៊ីបានហោះទៅជិតដ្រូនជាច្រើនរបស់អាម៉េរិកនៅលើទឹកដីស៊ីរីម្តងទៀតកាលពីថ្ងៃព្រហស្បតិ៍ ដោយព្រួសផ្កាភ្លើងនិងបង្ខំឱ្យដ្រូន MQ-9 Reaper កាច់ចង្កូតប្តូរទិសដើម្បីជម្លៀសខ្លួន។
វាជាលើកទីពីរក្នុងរយៈពេល២៤ម៉ោងដែលរុស្ស៊ីបានយាយីដ្រូនរបស់អាម៉េរិកនៅទីនោះ។
ឧត្តមសេនីយ៍ឯក អាឡិច ហ្គ្រីនកេវិច (Alex Grynkewich) ប្រមុខបញ្ជាការកណ្តាលកងទ័ពអាកាសអាម៉េរិក បាននិយាយថា “យើងជំរុញឱ្យកងកម្លាំងរុស្ស៊ីនៅក្នុងប្រទេសស៊ីរីបញ្ឈប់អាកប្បកិរិយាមិនប្រុងប្រយ័ត្ននេះហើយប្រកាន់ខ្ជាប់នូវស្តង់ដារនៃអាកប្បកិរិយាដែលរំពឹងទុករបស់កងកម្លាំងអាកាសដែលមានជំនាញវិជ្ជាជីវៈ ដូច្នេះយើងអាចបន្តការផ្តោតសំខាន់របស់យើងជាយូរលើការបំបាក់ពួក ISIS”។
លោកវរសេនីយ៍ឯក មីសែល អេនឌ្រូ (Michael Andrews)អ្នកនាំពាក្យបញ្ជាការកណ្តាលកងទ័ពអាកាស បាននិយាយថា “ការយាយីរបស់រុស្ស៊ី រួមទាំងការហោះហើរជិតៗ ដោយយន្តហោះ SU-34 មួយគ្រឿង និង SU-35 មួយគ្រឿង និងការព្រួសផ្កាភ្លើងដោយផ្ទាល់ដាក់ដ្រូន MQ-9 មានរយៈពេលជិតមួយម៉ោង។ ដូច្នេះវាមិនមែនជាការហោះកាត់លឿនៗនោះទេ ប៉ុន្តែជាអន្តរកម្មដែលមានលក្ខណៈច្រំដែលយូរនិងគ្មានវិជ្ជាជីវៈ”។
បញ្ជាការកណ្តាលកងទ័ពអាកាសអាម៉េរិកបានបញ្ចេញវីដេអូនៃឧបទ្ទវហេតុពីរដាច់ដោយឡែកពីគ្នានេះ ដែលបានកើតឡើងកាលពីថ្ងៃពុធនិងថ្ងៃព្រហស្បតិ៍។ នៅក្នុងឧបទ្ទវហេតុដំបូងដែលបានកើតឡើងនៅម៉ោងប្រហែល ១០៖៤០ នាទីព្រឹក ម៉ោងក្នុងស្រុកកាលពីថ្ងៃពុធនៅប្រទេសស៊ីរីភាគពាយព្យ យន្តហោះចម្បាំង SU-35 របស់រុស្ស៊ីបានហោះកៀកដ្រូន Reaper ហើយអ្នកបើកយន្តហោះរុស្ស៊ីម្នាក់បានបញ្ជាយន្តហោះរបស់ពួកគេហោះពីមុខដ្រូន ហើយបញ្ចេញផ្កាភ្លើងពីក្រោយយន្តហោះ SU- 35 ដែលបង្កើនល្បឿននិងសម្ពាធខ្យល់យ៉ាងខ្លាំង។
ការបញ្ចេញភ្លើងបែបនេះអាចបំផ្លាញគ្រឿងអេឡិចត្រូនិចរបស់ដ្រូន Reaper ហើយលោកហ្គ្រីនកេវិចបាននិយាយថា វាបានកាត់បន្ថយសមត្ថភាពរបស់ប្រតិបត្តិកររបស់ដ្រូនដើម្បីធ្វើប្រតិបត្តិការដ្រូនដោយសុវត្ថិភាព៕
យន្តហោះរុស្ស៊ីពីរគ្រឿងយាយីដ្រូនរបស់អាម៉េរិកនៅលើប្រទេសស៊ីរីកាលពីថ្ងៃពុធនិងព្រហស្បតិ៍