ប្រែសម្រួល : កញ្ញាដាលីស (The Drive) ៖ នាយករដ្ឋមន្ត្រីប៉ូឡូញ លោក ម៉ាទូស ម៉ូរ៉ាវីកគី (Mateusz Morawiecki) បាននិយាយថា ប្រទេសរបស់លោកចង់ចូលរួមកម្មវិធីចែករំលែកអាវុធនុយក្លេអ៊ែររបស់អង្គការណាតូ។
នេះជាការឆ្លើយតបដោយផ្ទាល់ចំពោះការដាក់ពង្រាយអាវុធនុយក្លេអ៊ែររបស់រុស្ស៊ីមួយចំនួនទៅប្រទេសជិតខាងបេឡារូស។ រឿងនេះក៏កើតឡើងផងដែរ នៅពេលដែលប៉ូឡូញកំពុងជំរុញទៅមុខជាមួយនឹងកិច្ចខិតខំប្រឹងប្រែងបំពាក់អាវុធធម្មតាទ្រង់ទ្រាយធំឡើងវិញ ដែលត្រូវបានពន្លឿនបន្ទាប់ពីមានការឈ្លានពានរបស់រុស្ស៊ីលើអ៊ុយក្រែនកាលពីឆ្នាំមុន។
នាយករដ្ឋមន្ត្រីម៉ូរ៉ាវីកគីបានធ្វើការកត់សម្គាល់អំពីបំណងរបស់ប៉ូឡូញក្នុងការក្លាយជាផ្នែកនៃផែនការចែករំលែកអាវុធនុយក្លេអ៊ែររបស់អង្គការណាតូក្នុងការឆ្លើយតបទៅនឹងសំណួរនៅក្នុងសន្និសីទសារព័ត៌មានមួយនៅខាងក្រៅកិច្ចប្រជុំមួយរបស់សហភាពអឺរ៉ុបក្នុងទីក្រុងព្រុចសែល ប្រទេសបែលហ្ស៊ិក កាលពីថ្ងៃទី៣០មិថុនា។
លោកម៉ូរ៉ាវីកគីបាននិយាយថា “ការសម្រេចចិត្តចុងក្រោយនឹងអាស្រ័យលើដៃគូអាម៉េរិកនិងអង្គការណាតូរបស់យើង។យើងប្រកាសអំពីឆន្ទៈរបស់យើងក្នុងការធ្វើសកម្មភាពយ៉ាងរហ័សក្នុងបញ្ហានេះ។ យើងមិនចង់អង្គុយនៅស្ងៀម ខណៈប្រធានាធិបតីរុស្ស៊ី វ្ល៉ាឌីមៀ ពូទីន បង្កើនការគំរាមកំហែងគ្រប់ប្រភេទនោះទេ” នេះបើយោងតាមសារព័ត៌មាន Polesat News។
លោកពូទីនបាននិយាយកាលពីដើមខែមិថុនាថា អាវុធនុយក្លេអ៊ែររបស់រុស្ស៊ីបានចាប់ផ្តើមទៅដល់ប្រទេសបេឡារូស ជាផ្នែកនៃកិច្ចព្រមព្រៀងដែលប្រទេសទាំងពីរបានធ្វើកាលពីរដូវក្តៅមុន។ ប្រធានាធិបតីបេឡារូស លោក អាឡិចសាន់ឌ័រ លូកាសេនកូ (Alexander Lukashenko) បាននិយាយកាលពីពាក់កណ្តាលខែមិថុនាថា “ផ្នែកសំខាន់” នៃចំនួនសរុបនៃអាវុធនុយក្លេអ៊ែរដែលរុស្ស៊ីគ្រោងនឹងដាក់នៅក្នុងប្រទេសរបស់គាត់ឥឡូវបានមកដល់ហើយ។
យោងតាមសេចក្តីថ្លែងការណ៍ពីមុនៗរបស់ពូទីន និងលូកាសេនកូ អាវុធទាំងនេះគឺជាការលាយគ្នានូវមីស៊ីលផ្លោងរយៈចម្ងាយខ្លី Iskander-M ដែលមានសមត្ថភាពនុយក្លេអ៊ែរ និងគ្រាប់បែកនុយក្លេអ៊ែរទម្លាក់ពីលើអាកាស ដែលអាវុធនុយក្លេអ៊ែរក្រោយគេនេះត្រូវបានកងទ័ពអាកាសបេឡារូសអះអាងថាមានសមត្ថភាពដាក់ឱ្យប្រើហើយ៕
ប៉ូឡូញចង់រក្សាទុកគ្រាប់នុយក្លេអ៊ែររបស់ណាតូដើម្បីទប់ទល់នឹងការគំរាមកំហែងពីរុស្ស៊ី