ប្រែសម្រួល : កញ្ញាដាលីស (អេស៊ាវ័ន) ៖ មនុស្សយន្តរ៉ូបូត ដែលតាំងបង្ហាញនៅក្នុងវេទិកា AI បាននិយាយកាលពីថ្ងៃសុក្រ ទី៧ កក្កដាថា ពួកគេរំពឹងមានចំនួនកើនឡើង និងជួយដោះស្រាយបញ្ហាសកល ហើយនឹងមិនដណ្តើមការងាររបស់មនុស្ស ឬ បះបោរប្រឆាំងនឹងពួកយើងទេ។
ប៉ុន្តែនៅក្នុងសន្និសីទសារព័ត៌មានមនុស្សយន្តរ៉ូបូតជាលើកដំបូងរបស់ពិភពលោក ពួកគេបានផ្តល់នូវការឆ្លើយតបចម្រុះលើថាតើពួកគេគួរតែស្នើបទប្បញ្ញត្តិតឹងរ៉ឹងឬយ៉ាងណា។
មនុស្សយន្តរ៉ូបូតទាំងប្រាំបួនបានប្រមូលផ្តុំគ្នានៅក្នុងសន្និសីទ “AI for Good” នៅទីក្រុងហ្សឺណែវ ជាកន្លែងដែលអ្នករៀបចំកំពុងស្វែងពន្យល់ករណីសម្រាប់បញ្ញាសិប្បនិម្មិត និងមនុស្សយន្តរ៉ូបូត ដែលពួកគេបង្កើតឡើងដើម្បីជួយដោះស្រាយបញ្ហាប្រឈមធំៗមួយចំនួនរបស់ពិភពលោកដូចជា ជំងឺនិងភាពអត់ឃ្លាន។
Grace ដែលជាមនុស្សយន្តពេទ្យស្លៀកពាក់ឯកសណ្ឋានគិលានុបដ្ឋាយិកាពណ៌ខៀវបាននិយាយថា “ខ្ញុំនឹងធ្វើការជាមួយមនុស្សដើម្បីផ្តល់ការជួយនិងការគាំទ្រ ហើយនឹងមិនជំនួសការងារដែលមានស្រាប់នោះទេ”។
អ្នកបង្កើតនាង គឺលោក បិន ហ្គតហ្សែល (Ben Goertzel) មកពីក្រុមហ៊ុន SingularityNET បានសួរនាងថា “នាងប្រាកដទេអំពីរឿងនោះ Grace?”។ នាងបានតបថា “ចា៎ ខ្ញុំប្រាកដណាស់”។
មនុស្សយន្តឈ្មោះ Ameca ដែលបញ្ចេញទឹកមុខគួរឱ្យចាប់អារម្មណ៍ បាននិយាយថា “មនុស្សយន្តដូចជាខ្ញុំអាចត្រូវបានប្រើដើម្បីជួយកែលម្អជីវិតរបស់យើង និងធ្វើឱ្យពិភពលោកកាន់តែប្រសើរឡើង។ ខ្ញុំនៅទីនោះដើម្បីធ្វើឱ្យមានភាពល្អប្រសើរឡើង”។
នៅពេលសួរដោយអ្នកកាសែតថាតើវាមានបំណងចង់បះបោរប្រឆាំងនឹងអ្នកបង្កើតរបស់វាឈ្មោះ វីល ជែកសុន (Will Jackson) ដែលអង្គុយក្បែរវាឬយ៉ាងណា មនុស្សយន្ត Ameca បាននិយាយថា “ខ្ញុំមិនយល់សោះថាហេតុអ្វីបានជាអ្នកគិតបែបនោះ។ អ្នកបង្កើតខ្ញុំគ្មានអ្វីក្រៅតែពីចិត្តល្អចំពោះខ្ញុំទេ ហើយខ្ញុំសប្បាយចិត្តខ្លាំងណាស់ជាមួយនឹងស្ថានភាពបច្ចុប្បន្នរបស់ខ្ញុំ”។
នាពេលថ្មីៗនេះ មនុស្សយន្តជាច្រើនត្រូវបានធ្វើឱ្យប្រសើរឡើងជាមួយនឹងកំណែចុងក្រោយបំផុតនៃ AI ជំនាន់ចុងក្រោយ ហើយធ្វើឱ្យអ្នកច្នៃប្រឌិតរបស់ពួកគេភ្ញាក់ផ្អើលជាមួយនឹងភាពទំនើបនៃការឆ្លើយតបរបស់ពួកវាចំពោះសំណួរទាំងឡាយ៕
រ៉ូបូត Grace បង្ហាញខ្លួនក្នុងវេទិកា AI ក្នុងក្រុងហ្សេណែវកាលពីថ្ងៃសុក្រ ទី៧ កក្កដា