ដោយៈ មុនីរ័ត្ន / ភ្នំពេញៈ ដំណើរការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ រយៈពេល ១០ ថ្ងៃ គឺចាប់ពីថ្ងៃទី១-១០ ខែកក្កដា ឆ្នាំ២០២៣ គឺបានប្រព្រឹត្តទៅដោយរលូន គ្មានអំពើហិង្សាកើតឡើង មានសណ្តាប់ធ្នាប់ល្អ និងមិនមានបញ្ហាអ្វីកើតឡើង គួរឲ្យកត់សម្គាល់នោះទេ។ នេះបើតាមការបញ្ជាក់របស់ អ្នកនាំពាក្យ គណៈកម្មាធិការជាតិរៀបចំការបោះឆ្នោត (គ.ជ.ប) ប្រាប់រស្មីកម្ពុជា កាលពីល្ងាចថ្ងៃទី១០ ខែកក្កដា ឆ្នាំ២០២៣ ។
លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ថាៈ “អំឡុងពេល នៃការឃោសនា បោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ រយៈពេល ១០ថ្ងៃ ពីថ្ងៃទី១-១០ ខែកក្កដា មកនេះ មានភាពល្អប្រសើរ គ្មានអំពើហិង្សា គ្មានការប៉ះទង្គិច រវាងគណបក្សនយោបាយ ដែលមាននិន្នាការខុសគ្នា ហើយក៏ជាការឃោសនាមួយ មានភាពល្អ ដែលអាចចាត់ទុកបានថា ជាការឃោសនាដែលមានសណ្តាប់ធ្នាប់ និងមានការរីករាយ ចូលរួមទាំងអ្នកគាំទ្រ ទាំងគណបក្សនយោបាយ ហើយនិងអាជ្ញាធរ ដែនដី ព្រមទាំងមន្ត្រី នៃគណៈកម្មាធិការជាតិរៀបចំការបោះឆ្នោតផងដែរ”។
អ្នកនាំពាក្យ គ.ជ.ប បានបន្តថាៈ ទាក់ទងការឃោសនាបោះឆ្នោត រយៈពេល ១០ ថ្ងៃ មកនេះ គឺមានបណ្តឹងចំនួនពីរ នៅខេត្តឧត្តរមានជ័យ ចំនួន ១បណ្តឹង និងរាជធានីភ្នំពេញ ចំនួន ១បណ្តឹង ដែលប្តឹងដោយគណបក្សប្រជាជនកម្ពុជា។ បណ្តឹងនៅខេត្តឧត្តរមានជ័យ មានបុរសម្នាក់ ឈ្មោះ កង សារ៉ាត់ ដែលបានបង្ហោះហ្វេសប៊ុក តិះទៀនដល់ក្បួនដង្ហែ របស់គណបក្សប្រជាជនកម្ពុជា ក្នុងថ្ងៃឃោសនា ហើយបានប្រើវោហាសាស្ត្រប៉ះពាល់ ដល់កិត្តិយស និងសេចក្តីថ្លៃថ្នូរ នៃថ្នាក់ដឹកនាំ របស់គណបក្សប្រជាជនកម្ពុជា។ ហើយតំណាងគណបក្សប្រជាជនកម្ពុជា បានប្តឹងទៅគណៈកម្មការឃុំសង្កាត់រៀបចំ ការបោះឆ្នោត។ ហើយបណ្តឹងនេះ បានបិទបញ្ចប់ការដោះស្រាយរួចហើយ ដោយខាងគណៈកម្មការឃុំ សង្កាត់ រៀបចំការបោះឆ្នោត បានធ្វើការសម្របសម្រួល ប៉ុន្តែសាម៉ីដើមបណ្តឹង មិនមានការយល់ស្របទេ។ ហើយការដាក់បណ្តឹងតមកទៀត ក៏មិនឃើញបន្ត ជានីតិវិធី បានបញ្ចប់នៅបណ្តឹងនេះហើយ។ បណ្តឹងមួយករណីទៀត តំណាងគណបក្សប្រជាជនកម្ពុជា នៅរាជធានីភ្នំពេញ បានប្តឹងករណីជនមិនស្គាល់មុខម្នាក់ បានយករូបសញ្ញារបស់គណបក្សប្រជាធិបតេយ្យ ទៅបិទលើរូបថតថ្នាក់ដឹកនាំ នៃគណបក្សប្រជាជនកម្ពុជា។ បណ្តឹងនេះ មានការស៊ើបអង្កេត ដើម្បីស្វែងរក ប៉ុន្តែមិនទាន់បានរកឃើញថា អ្នកណាជាអ្នកបិទនោះដែរ។ ហើយបណ្តឹងនេះ មិនមានបន្តមកដល់ គ.ជ.ប នោះទេ។ ហើយបណ្តឹងទាំងពីរ ត្រូវបានផុតរលត់រួចរាល់ ហើយដែរ។
សូមជម្រាបថា ការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ មានរយៈពេល ២១ ថ្ងៃ ចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣។ ហើយនៅថ្ងៃទី២៣ ខែកក្កដា ខាងមុខនេះ គឺជាថ្ងៃបោះឆ្នោតជ្រើសតាំងតំណាងរាស្ត្រ នីតិកាលទី៧ ដោយមានគណបក្សនយោបាយ ចំនួន ១៨ បានចូលរួមប្រកួតប្រជែង៕/V
