ប្រែសម្រួល : កញ្ញាដាលីស (VnExpress) ៖ វៀតណាមបានក្លាយជាដៃគូពាណិជ្ជកម្មធំបំផុតរបស់កម្ពុជាក្នុងចំណោមសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន) ខណៈពាណិជ្ជកម្មទ្វេភាគីមានចំនួនជិត ៥០% នៃចំនួនពាណិជ្ជកម្មសរុបរវាងកម្ពុជានិងវៀតណាមក្នុងរយៈពេលប្រាំខែដំបូងនៃឆ្នាំ ២០២៣។
ក្នុងរយៈពេលប្រាំខែ ពាណិជ្ជកម្មរវាងប្រទេសទាំងពីរបានកើនឡើងដល់ ២,៨ ពាន់លានដុល្លារ គឺកើនឡើងជិត ៣% ធៀបនឹងឆ្នាំមុន។ ក្រសួងពាណិជ្ជកម្មកម្ពុជាបានឱ្យដឹងថា កម្ពុជាបាននាំចេញទំនិញមានតម្លៃប្រមាណ ១,៣ ពាន់លានដុល្លារទៅកាន់ប្រទេសក្បែរខាងភាគខាងត្បូងរបស់ខ្លួននិងនាំចូលទំនិញសរុបជាង ១,៥ ពាន់លានដុល្លារពីប្រទេសវៀតណាម។
ជាមួយនឹងកំណើនពាណិជ្ជកម្មជាវិជ្ជមានបែបនេះ វៀតណាមមិនត្រឹមតែជាប្រទេសធំជាងគេក្នុងអាស៊ានប៉ុណ្ណោះទេ តែថែមទាំងជាប់ចំណាត់ថ្នាក់ទី៣ ក្នុងចំណោមដៃគូពាណិជ្ជកម្មទាំងអស់របស់កម្ពុជាទៀតផង បន្ទាប់ពីចិននិងសហរដ្ឋអាម៉េរិកក្នុងអំឡុងពេលនោះ។
កំណើននៃការនាំចេញរបស់កម្ពុជាទៅកាន់ប្រទេសវៀតណាមត្រូវបានជំរុញជាចម្បងដោយការនាំចេញកសិផលកាន់តែខ្ពស់ ដោយសារការកើនឡើងនៃការប្រមូលផល។ ការនាំចេញសំខាន់ៗរបស់កម្ពុជារួមមាន អង្ករ កៅស៊ូ ស្វាយចន្ទី ដំឡូងមី ពោត ចេក ស្វាយ ថ្នាំជក់ និង ធនធានធម្មជាតិ។
ទន្ទឹមនឹងនោះ ការនាំចូលសំខាន់ៗពីប្រទេសវៀតណាម រួមមាន សម្ភារៈសំណង់ គ្រឿងម៉ាស៊ីន ប្រេងឥន្ធនៈ ឧបករណ៍អគ្គិសនីនិងអេឡិចត្រូនិច ជី គ្រឿងទេស បន្លែ និង ផ្លែឈើ។
ចំណូលពាណិជ្ជកម្មរវាងប្រទេសទាំងពីរបានកើនឡើងជាបន្តបន្ទាប់ក្នុងប៉ុន្មានឆ្នាំថ្មីៗនេះ ដោយកើនជាមធ្យមប្រចាំឆ្នាំ ១៨,៥% ក្នុងអំឡុងឆ្នាំ ២០១០-២០១៥ និងលើសពី ២១% ក្នុងអំឡុងឆ្នាំ ២០១៥- ២០២០។
ចំពេលមានការរីករាលដាលនៃជំងឺកូវីដ១៩ វៀតណាមក៏នៅតែជាដៃគូពាណិជ្ជកម្មកំពូលមួយក្នុងចំណោមដៃគូពាណិជ្ជកម្មកំពូលទាំងបីរបស់កម្ពុជាផងដែរ ដោយពាណិជ្ជកម្មទ្វេភាគីបានកើនឡើងជាង ៧៩% ពីឆ្នាំ ២០២០ រហូតដល់ ៩,៥៤ ពាន់លានដុល្លារក្នុងឆ្នាំ ២០២១។ ទិន្នន័យរបស់ក្រសួងពាណិជ្ជកម្មកម្ពុជាបានបង្ហាញកាលពីឆ្នាំមុនថា ក្នុងឆ្នាំ ២០២២ តួលេខនេះមានចំនួន ១០,៥៧ ពាន់លានដុល្លារ គឺកើនឡើងជិត ១១%៕
កុងតឺន័រនៅស្ថានីយតាន់ កាង ខៃ ម៉េប (Tan Cang Cai Mep) ក្នុងខេត្តបារៀវុងតៅ