ប្រែសម្រួល : កញ្ញាដាលីស (ដេល្លីម៉េល) ៖ យោធាអ៊ុយក្រែនបាននិយាយថា រុស្ស៊ីបានបង្ហោះដ្រូនអត្តឃាតចំនួន២៨ គ្រឿងនៅលើទីក្រុងកំពង់ផែភាគខាងត្បូង អូដេសា (Odesa) និង ទីក្រុងគៀវនៅព្រឹកព្រលឹមថ្ងៃអង្គារនេះ គឺតែប៉ុន្មានម៉ោងមុនពេលចាប់ផ្តើមកិច្ចប្រជុំកំពូលណាតូនៅប្រទេសលីទុយអានី ដែលនឹងផ្តោតលើវិធីដោះស្រាយការគំរាមកំហែងផ្នែកសន្តិសុខពីរដ្ឋាភិបាលក្រុងមូស្គូ។
កងទ័ពអាកាសអ៊ុយក្រែនបាននិយាយថា ប្រព័ន្ធការពារដែនអាកាសបានបាញ់ទម្លាក់ដ្រូន Shahed ផលិតដោយអ៊ីរ៉ង់ចំនួន ២៦ គ្រឿង ដែលរុស្ស៊ីបានបង្ហោះ។ អភិបាលតំបន់បាននិយាយថា នៅលើទីក្រុងអូដេសា ដ្រូន ២២ គ្រឿងត្រូវបានបាញ់ធ្លាក់ ហើយដ្រូនពីរគ្រឿងបានបុកអគាររដ្ឋបាលក្នុងកំពង់ផែ។
អភិបាលក្រុងអូដេសា លោក អូឡេ គីភើ (Oleh Kiper) បាននិយាយនៅលើកម្មវិធីផ្ញើសារ Telegram ថា គ្រាប់ធញ្ញជាតិនិងស្ថានីយមួយទៀតនៅជិតកំពង់ផែអូដេសាបានឆាបឆេះ ដែលត្រូវបានពន្លត់យ៉ាងរហ័ស មិនបណ្តាលឱ្យមាន “ការខូចខាតធ្ងន់ធ្ងរ” ឬមានអ្នករបួសនោះទេ។
យោធាបាននិយាយថា ដ្រូនទាំងអស់ ដែលបញ្ជូនទៅកាន់ទីក្រុងគៀវ ត្រូវបានស្ទាក់ចាប់ ប៉ុន្តែកម្ទេចកម្ទីបានបំផ្លាញផ្ទះមួយចំនួននៅក្នុងតំបន់។
លោក សឺហ៊ី ប៉ុបកូ (Serhiy Popko) ប្រធានរដ្ឋបាលយោធារបស់ទីក្រុងគៀវ បាននិយាយនៅក្នុងសារបង្ហោះនៅលើបណ្តាញ Telegram ថា “សត្រូវបានវាយប្រហារទីក្រុងគៀវពីលើអាកាសជាលើកទីពីរក្នុងខែនេះ”។
កិច្ចប្រជុំកំពូលនៅទីក្រុងវីលនៀស (Vilnius) ដែលចាប់ផ្តើមនៅថ្ងៃអង្គារនេះ នឹងត្រូវគ្របដណ្តប់ដោយផលប៉ះពាល់នៃការលុកលុយរបស់រុស្ស៊ីលើអ៊ុយក្រែន ដោយក្រុមមេដឹកនាំគ្រោងនឹងអនុម័តផែនការគ្រប់ជ្រុងជ្រោយលើកដំបូងរបស់អង្គការណាតូចាប់តាំងពីការបញ្ចប់សង្គ្រាមត្រជាក់ ដើម្បីទប់ទល់នឹងការវាយប្រហារណាមួយពីរដ្ឋាភិបាលក្រុងមូស្គូ។
រុស្ស៊ីបានរិះគន់ខ្លាំងៗលើសម្ពន្ធមិត្តនិងមហាអំណាចដឹកនាំសម្ពន្ធមិត្តនេះ គឺសហរដ្ឋអាម៉េរិកជុំវិញការគាំទ្ររបស់ពួកគេចំពោះអ៊ុយក្រែន ហើយបានព្រមានថា សមាជិកភាពដ៏មានសក្តានុពលរបស់រដ្ឋាភិបាលក្រុងគៀវក្នុងអង្គការណាតូ នឹងត្រូវបានឆ្លើយតបជាមួយនឹងប្រតិកម្ម “ច្បាស់លាស់និងរឹងមាំ”។
ការឈ្លានពានរបស់រុស្ស៊ីមកលើប្រទេសជិតខាងរបស់ខ្លួន ដែលឥឡូវឈានដល់ថ្ងៃទី ៥០៣ និងគ្មានសញ្ញានៃទីបញ្ចប់ បានសម្លាប់មនុស្សរាប់ម៉ឺននាក់ ផ្លាស់ទីមនុស្សរាប់លាននាក់ និង ប្រែក្លាយទីក្រុងជាច្រើននៅភាគខាងកើតនិងខាងត្បូងរបស់អ៊ុយក្រែនទៅជាគំនរបាក់បែក៕
ដ្រូនសឹងទាំងអស់របស់រុស្ស៊ីត្រូវបានបាញ់ទម្លាក់
អ៊ុយក្រែននិយាយថា ទាហានរបស់ខ្លួនរុលទៅមុខនៅទិសខាងត្បូងនិងខាងកើត ក្បែរក្រុងបាឃ្មុត