ប្រែសម្រួល : កញ្ញាដាលីស (ដេល្លីម៉េល) ៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃព្រហស្បតិ៍នេះថា មេដឹកនាំកូរ៉េខាងជើងលោក គីម ជុងអ៊ុន បានប្តេជ្ញាពង្រឹងសមត្ថភាពប្រយុទ្ធនុយក្លេអ៊ែររបស់ប្រទេសលោកបន្ថែមទៀត ខណៈរូបលោកត្រួតពិនិត្យការហោះសាកល្បងលើកទីពីរនៃមីស៊ីលផ្លោងឆ្លងទ្វីបថ្មីមួយ ដែលរចនាឡើងដើម្បីវាយប្រហារសហរដ្ឋអាម៉េរិកដីគោក។
សេចក្តីថ្លែងការណ៍របស់លោកគីមបានលើកឡើងថា កូរ៉េខាងជើងនឹងបង្កើនសកម្មភាពសាកល្បងអាវុធដើម្បីពង្រីកឃ្លាំងអាវុធរបស់ខ្លួន ដើម្បីឆ្លើយតបទៅនឹងជំហានថ្មីៗរបស់សហរដ្ឋអាម៉េរិកក្នុងជំរុញការប្តេជ្ញាចិត្តផ្នែកសន្តិសុខរបស់ខ្លួនចំពោះសម្ពន្ធមិត្តកូរ៉េខាងត្បូង។
លោកគីមបាននិយាយថា “ស្ថានភាពមិនឋិតថេរទេនាពេលបច្ចុប្បន្ន ដែលបរិយាកាសសន្តិសុខនៅឧបទ្វីបកូរ៉េកំពុងត្រូវបានគំរាមកំហែងយ៉ាងធ្ងន់ធ្ងរដោយកងកម្លាំងអរិភាពគ្រប់ពេលវេលា។ (នោះ) ទាមទារឱ្យមានការខិតខំប្រឹងប្រែងកាន់តែខ្លាំង ដើម្បីអនុវត្តខ្សែបន្ទាត់នៃការជំរុញការទប់ទល់នឹងសង្គ្រាមនុយក្លេអ៊ែរ”។
ទីភ្នាក់ងារសារព័ត៌មានកណ្តាលកូរ៉េ (KCNA) បានបង្ហាញការអត្ថាធិប្បាយរបស់លោកគីមបែបនេះ បន្ទាប់ពីបានបញ្ជាក់ថា កូរ៉េខាងជើងបានបាញ់ដោយជោគជ័យនូវកាំជ្រួចមីស៊ីល Hwasong-18 ICBM កាលពីថ្ងៃពុធ។ ការបាញ់នេះត្រូវបានរាយការណ៍ភ្លាមៗដោយប្រទេសជិតខាង បន្ទាប់ពីវាហោះចេញភ្លែត។
Hwasong-18 គឺជាកាំជ្រួចចល័តតាមផ្លូវដែលកំពុងអភិវឌ្ឍ ដែលកម្លាំងរុញច្រានប្រើឥន្ធនៈរឹងរបស់វាបានធ្វើឱ្យមានការលំបាកសម្រាប់គូប្រជែងក្នុងការស្វែងរកការបាញ់របស់វាជាមុនជាងកាំជ្រួចដែលប្រើឥន្ធនៈរាវ។ កូរ៉េខាងជើងបានសាកល្បងកាំជ្រួចនេះជាលើកដំបូងក្នុងខែមេសា ហើយលោកគីមបានហៅវាថាជាអាវុធដ៏មានឥទ្ធិពលបំផុតនៃកងកម្លាំងនុយក្លេអ៊ែររបស់លោក។
KCNA បាននិយាយថា ការបាញ់សាកល្បងនេះគឺចង់បញ្ជាក់ឡើងវិញនូវភាពជឿជាក់ផ្នែកបច្ចេកទេសនិងភាពជឿជាក់នៃប្រតិបត្តិការរបស់មីស៊ីលនេះ។ KCNA បាននិយាយទៀតថា លោកគីមបានហៅការបាញ់នេះថាជា “ជំហានដ៏សំខាន់មួយទៀត” ក្នុងកិច្ចខិតខំប្រឹងប្រែងដើម្បីជំរុញដល់កងកម្លាំងយុទ្ធសាស្ត្ររបស់កូរ៉េខាងជើង។
យោងតាម KCNA កាំជ្រួចនេះត្រូវបានបាញ់នៅមុំខ្ពស់ដើម្បីបញ្ចៀសប្រទេសជិតខាង។ KCNA បាននិយាយថា អាវុធនេះបានធ្វើដំណើរ ៧៤ នាទីនិងបានចម្ងាយ ១.០០១ គីឡូម៉ែត្រនៅរយៈកម្ពស់អតិបរមា ៦.៦៤៨ គីឡូម៉ែត្រ មុនពេលធ្លាក់ក្នុងតំបន់ដែលបានកំណត់ទុកជាមុននៅក្នុងដែនទឹកបើកចំហនៃឆ្នេរសមុទ្រភាគខាងកើតរបស់កូរ៉េខាងជើង។
រយៈពេលហោះហើររបស់កាំជ្រួចនេះគឺជារយៈពេលយូរបំផុតមិនធ្លាប់កត់ត្រាពីមុនមកដោយអាវុធណាមួយដែលកូរ៉េខាងជើងបានបាញ់។ ប្រសិនបើបាញ់លើគន្លងស្តង់ដារ កាំជ្រួចនេះអាចហោះទៅដល់អាម៉េរិកដីគោក បើទោះជាអ្នកជំនាញខ្លះនិយាយថា កូរ៉េខាងជើងនៅត្រូវការបច្ចេកវិជ្ជាមួយចំនួនទៀតដើម្បីទទួលបានកាំជ្រួចដែលមានមុខងារនុយក្លេអ៊ែរពេញលេញក៏ដោយ។
កូរ៉េខាងត្បូង ជប៉ុន និងសហរដ្ឋអាម៉េរិក បានរិះគន់កូរ៉េខាងជើងជុំវិញការបាញ់មីស៊ីលនេះ ដែលពួកគេនិយាយថាជាការគំរាមកំហែងដល់សន្តិភាពក្នុងតំបន់និងអន្តរជាតិ៕
កូរ៉េបាញ់សាកល្បងមីស៊ីល Hwasong-18 ICBM ដោយជោគជ័យកាលពីថ្ងៃពុធ